Оз вунöдны чужанiн

[ A+ ] /[ A- ]


Кодлы дона ас чужан му? Чайта, мый быдöнлы. Öд морт сэнi чужис, вöчис медводдза воськовъяс, медводдзаысь шуис «мам» кыв, мунiс школаö да тöдмасис ас тшöтшъяяскöд, медводдза велöдыськöд. И со воис кад торйöдчыны чужан мукöд, водзö олöмлань писькöдны туй. А чужан му?! Дерт, сэки некод эз куж мöвпыштлыны, мый коркö тупкасны-бырöдасны ичöтик сикт-грездъяс, а йöзöс овмöдасны орчча посёлокъясö. Бырöдiсны и миян районысь Яков, Öкöс, Дёма да Сотчöмув грездъяс, Виль, Чипсись, Гараж, Важ Зимстан да Мöскашор посёлокъяс. Сэтчöс олысьяс овмöдчисны Зимстанö да орчча мукöд сикт-посёлокъясö. Нывбабаяслöн Зимстанса котыр, кодöн юрнуöдö Г.А.Кичун, да школаса водзмöстчысь йöз — Э.Л.Шульц, Е.А.Лодыгина, И.В.Исакова, О.А.Кутькина, А.Л.Коваленок да И.А.Стогниенко — мöвпыштiсны «Öти сиктса олысьяслöн аддзысьлöмъяс» пас улын кыдзкö öтувтлыны-чукöртлыны найöс, кодъяс коркö овлiсны сэнi, кузь пызан сайын пукалiгмоз да чай юигмоз сёрниясöн бергöдчывны важ кадас. 
Медводдза аддзысьлöмыс вöлi 2015-öд вося декабр 3-öд лунö. Сэки чукöртчылiсны Чипсисьса олысьяс. Тайö посёлокыс артмылiс 1945-öд воын. 1959-ын сэнi олiс 248 морт, а 1973-öд воын сiйö тупкысис бöр нин, йöзöс овмöдiсны Зимстанö. 
2016-öд вося март 11-öд лунö чукöртчылiсны Вильса да Лöгинъягса олысьяс. 1949öд воын Вилльын олiс 52, 1959-öдын — 228 морт. 1976öд воын сэтысь йöзöс овмöдiсны Зимстанö да Керчомъяö. 
2016-öд вося март 31-öд лунö чукöртчылiсны климовсксаяс, фроловсксаяс да яковсаяс. Найö овлiсны бура, кынöмпöт перйылiсны вöрва отсöгöн да му вылын мырсьöмöн: быдтiсны нянь, видзисны скöт. 
2016-öд вося апрель 14-öд лунö аддзысьлiсны Дёмаса, Вöльса, Сотчöмувса, Канаваса, Мöскашорса, Улыс да Вылыс Вочьясса, Öкöсса, Дзольса да Габовса олысьяс. 
Татшöм аддзысьлöмъяс дырйи Э.Л.Шульц, зэв зiль да йöз понда ловнас висьысь морт, вöзйис бырöм сикт-грездъясын да посёлокъясын сувтöдны казьтылан пасъяс — изъяс, кытчö пуктыны нимыслысь пастор. Йöзыс ошкисны вöзйöмсö да шуисны сетны вермана отсöг. 
2016-öд воын казьтылан из пуктiсны важ Зимстанын. 2017-öд воын — Вилльын да Яковын. Таво гижöда ыджыд из пуктiсны Мöскашорын. Отсасисны-зiлисны Зимстанса школаысь велöдысьяс да велöдчысьяс, Мöскашорса вöвлöм олысьяс. Казьтылан пас восьтiгöн, кузь да няйт туй вылö видзöдтöг, чукöрмылiс 40 морт — Вочысь, карысь и Зимстанысь. Казьтылiсны танi воддза олöм-вылöмсö, видзöдалiсны важ снимокъяс, сёрнитiгмоз юисны чай. Кытшлалiсны видз вывтi, кöнi коркö сулалiсны керкаяс да весиг кирпич вöчан завод, школа, пекарня, клуб да с.в. Ме ветлi жö, кöть ме абу сэтчöс, верöсöй овлiс Мöскашорас. Ветлöдлi уна дзоридзьяса, кузь туруна видз вывтi да веськавлi быттьö аслам чужан сиктö, кодлы коркö сии тайö кывбурсö: 
Кутшöм гажа öд 
местаыс сэнi — 
Мойдын кодь дзик. 
Ичöтдырсяньым 
чайтсьылiс меным — 
Медмича сикт. 
Синтö восьты 
да гöгöрбок видзöд, 
Дырсö эн узь. 
Кутшöм паськыдöсь 
ю сайын видзьяс. 
Туруныс кузь… 
Ольга ЗЕЛЁНАЯ. 
Зимстан. 
Снимок вылын: Мöскашорын казьтылан пас восьтiгöн.

Комментарии:

Добавить комментарий

Свежий выпуск: за 8 августа июня