Ноябр 28 лун — Мамлöн лун

[ A+ ] /[ A- ]


Водзмöстчысь да ышöдысь мам


Сиктса водзмöстчысь ань, депутат, бать-мамлöн котырö да культура керка сöветö пырысь, шуда мам. Тайö ставыс Анна Александровна Макаева йылысь. Нюмсера, мича еджгов юрсиа, сибыд сиктса нывбаба.
А.А.Макаева чужис да быдмис Дереваннöйын. Уджалö школаын секретарöн. Выль кывкутана уджö — депутатö босьчытöдз на аньлöн жуис-бергалiс юрас уна мöвп, мый нöшта позьö вöчны да кыдзи отсавны ас сиктсаяслы, медым олöмыс нöшта на лоис кыпыдöн. Ас окотаысь быд во чукöртлö бать-мамöс да челядьöс, ышöдö бур да колана уджö, медым сиктын вöлi сöстöм да гажа. Со и таво велöдчан во пансьытöдз посёлокын олысь нывкаяс да зонкаяс петалiсны весавны лöп-ёгысь школабердса стадион, челядьлысь ворсанiн да парк.
Галина Васильевна Гуляева мамыс вöлi школаын роч кыв да литература велöдысьöн, а бöрынджык сиктса юралысьöн. Сылöн сикт да сэнi олысь йöз вöсна тöждыс вуджис и нылыслы. Велöдiс радейтны йöзöс да кытшалысь вöр-ва, сьöлöмсянь босьтчыны быд уджö, вöчны бура да помöдзыс. Буракö, сэк и Анналöн чужöма вежöрас айму вöсна тöждыс, чужанiн радейтан сьöлöмкылöмыс.
Анна Александровналöн кык челядь. Ыджыдыс — Виктория, олö юркарын, помалiс Сыктывкарса педколледж. Алексей велöдчö сизимöд классын, быдмö мамлöн отсасьысьöн да тöждысьысьöн.
Зiль да кывкутысь ань велöдö и писö лоны ас кодьыс жö уджачöн да водзмöстчысьöн. Лёша отсасьö мамыслы верстьö морт моз нин кыдзи гортас, сiдз и сиктса олöмын.
Татьяна Чувьюрова.
Снимок Анна Макаевалöн чукöртöмысь.

Комментарии:

Добавить комментарий

Свежий выпуск: за 14 мая

Осторожно — мошенники!