Некод оз вун, нинöм оз вун
Май витöд лунö Вылыс Воч дорын Апим грездö сувтöдiсны казьтылан пас, кытчö пасйисны Иван Кириллович да Григорий Андреевич Лютоевъяслысь нимъяссö. Водзмöстчис олöмаяслöн котырöн юрнуöдысь Иван Егорович Гичев.
— Война вылын вöвлöмъяс да туй ни пом вошöмъяс кузя юöръяса книгаын пасйöма, мый Иван Кириллович вошис юöртöг. Но сiйö бергöдчис ловйöн. Трактористалiс «Молотов» нима колхозын. Меным вöлi кöкъямыс арöс, и мекоддьöмыс котралiм сы дорö. Сюся видзöдiм, кыдзи сiйö уджалiс, видзöдiс техника бöрся. Сы гöгöр и бергалiм. Миянлы тайö и колiс. Сiйö кулiс 1959-öд воын. Апим грездын шойна вылын сыкöд дзик орччöн гуалiсны Григорий Андреевич Лютоевöс, кодi тшöтш вöлi война вылын. Кыкнанныслы и лоис тайö пасыс. Вöчи ачым, — висьталiс Иван Егорович.
Сiйö ачыс Вылыс Вочса, гöтрасис да вуджис Улыс Вочö. Олöмаяслöн котырö пырысьяскöд кöсйöны лöсьöдны войнаса мукöд ветеранъяслысь дöзьöриттöм гуяс да крестъяс. Таöн найö тöдчöдöны — некод эз вун, нинöм эз вун.
Марина ДАДАШОВА.
«Улыс Воч» овмöдчöминса администрациялöн снимок вылын: казьтылан пас дорын.
Комментарии: