Декабр помын чукöртчылiсны овмöдчöминъясса юралысьяс. Сёрнитанторъяс лыдын вöлi и лöп-ёг да гортса овмöсъясысь колясъяс петкöдöм. 
Казьтыштам, мый кольöм вося ноябрсянь та вöсна кывкутö «Ухтажилфонд» котыр. Миян районын сiйöс петкöдлысьöн лоö В.Д.Напалков. Сiйö дженьыдика висьтыштiс, кыдзи котыртöма удж, кутшöм мытшöдъяскöд паныдасисны да кыдзи кутасны разьны гöрöдъяс. Сiдз, лунöн шöркодя чукöрмö 150 гöгöр кубометр шыблас. Ноябрын районысь лöп-ёг чукöртанiнö нуисны 3900 кубометр. «Ухтажилфондлы» пöдрадöн уджалö «Север» котыр, но техникаыс абу тырмымöн. Кöнсюрö оз тырмыны контейнеръяс. Öткымын овмöдчöминын овмöсъясысь чукöртöм лöп-ёг чукöртанiнö вöр пилитысь котыръяс кисьталöны пилипызь. Татшöм сора шыбласъяссö «Ухтажилфонд» оз босьт. Уна элясьöм воö йöзсянь, кодъяслы вайисны лöп-ёг петкöдöмысь вештысьöм кузя квитанцияяс. Кодлыкö арталöмаöсь унджык олысь лыд серти (шуам, меным аслым воис вештысьны вит мортысь, кöть эськö семьяын нёльöнöсь), кодлыкö квитанция эз во. Деревнясаяслы арталöмаöсь, быттьö найö ломтöны оз пач, а керкааныс воö шоныд. Эмöсь овмöсъяс, кöнi, керкааныс кындзи, торъя би счётчик сулалö гидын ли гожся пусянiнын — быд торъя стрöйба вылö воöма торъя кабала. Югыдъягысь öткымын помка вöсна ноябрын лöп-ёг эз чукöртны ни эз петкöдны. Олысьяслы та йылысь юöртiсны водзвыв да висьталiсны, мый вештысьны сiйö тöлыссьыс оз кутны, но квитанцияяс воисны быд керкаö. Артмö, мый котыр уджö босьтчис йöзöс ылöдлöмсянь. Кутшöмсюрö сиктъясын (сiйö жö Помöсдiнын да Кулöмдiнын) эмöсь керкаяс, кытчö воö шоныд, сэкжö найö и пачаöсь, кодöс ломтöны матö быд лун. Налы, закон серти, ковмас вештысьны кыдзи бур патераысь. Унаöн оз вештысьны сы вöсна, мый абу лöп-ёг петкöдöм кузя «Ухтажилфондкöд» сёрнитчöм. Законын урчитöма, мый котыр вермас уджавны сiдз шусяна публичнöй договор серти, кор сiйö вöчö урчитöм удж, кодi инмö дзик быдöнлы, да таысь корö вештысьны. Сёрнитчöм кырымавны абу быть, а вештысьны — быдöнлöн мог. Морт кö кöсйö кырымавны «Ухтажилфондкöд» сёрнитчöм, сылы колö аслыс шыöдчыны котырö. 
Дзик абу гöгöрвоана, кыдзи кутасны уджавны тулыснас, кор «дi вылö» колясны «Пожöг», «Тимшер», «Югыдъяг» овмöдчöминъяс. Мый вöчны лöп-ёгкöд, кодi лоас тулыснас жö йöръяс пелькöдiгöн: сiйö абу овмöсын артмöм коляс, сотны оз жö позь. Кытчö воштыны шойнаяс пелькöдiгöн чукöртöмторъяс? Код дорö шыöдчыны, уна-ö да кытчö вештысьны, морт кö, шуам, кöсйö шыбитны важ диван ли жугалöм кöзöд? 
Сёрни помын кывкöртiсны, мый медводз колö стöчмöдны олысьяслöн лыд кузя юöръяс, мöд-кö, кöнi пача керкаяс, а кытчö воö шоныд, коймöд-кö, лöп-ёг петкöдны медводз сэтысь, кытысь эз нуны ноябрын-декабрын. 
Районса администрацияöн веськöдлысь С.В.Рубан пасйис, мый лöп-ёг да колясъяс чукöртöм да иналöм йылысь закон колана. Öнi сiйö пöртсьö олöмö дзуртöмöн, эм уна мытшöд, кодъясöс ковмас разьны вочасöн. С.В.Рубан ошкис «Керчомъя» да «Зимстан» овмöдчöминъясса юралысьясöс, кодъяс зэв кывкутöмöн матыстчисны тайö выльтор дiнö да вöчисны ставсö, мед йöз майшасисны этшаджыка. 
Лидия ЛИПИНА.