Ме чужи Ручын, а öнi 51 во нин ола Сыктывкарын. Курсъяс помалöм бöрын уджалi ЛПК-ын, а сэсся шоныд сетан шöр ломтысянiнын.
Пенсия вылö петöм бöрын кутiс кыскыны чужанiнö. Тöвъя Эжваын, матö кызь во нин ветлöдла «Эжва катыд» сьылан котырö, а гожöмнас ас сиктын, кöнi кыпалö лолöй да бурмö сьöлöмöй.
Локта гортö тулыснас, а орчча керкасаяс виччысьöны нин да вочаалöны нимкодьпырысь. Ноп отсалöны нуны пос помöдз, а кор кöлуй уна, овлö, кильчö дорöдз пыртöны ичöтик тракторöн.
Быд во отсалöны пуктысьны Иван Александрович Холопов да Светлана Альбертовна Расова. И куйöдтö му вылö петкöдасны, и морковтö, луктö да картупельтö отсаласны пуктыны. Найö жö гожöмнас мудйысьöны, а воас ар да öтвылысь идралам градвыв пуктас.
Бать-мамлöн керкаыс важ нин, öтарö колö мыйкö дзоньтавны. Николай Васильевич Мишарин вежис кильчиöс, ывлаын вöчис асмогасянiн, потшис керка йöр. Овлö, мый абу сьöм да лавкаын сетöны уджйöзöн, вешта бöрыннас. Зэв бура вочаалöны бурдöдчанiнын. Сотöвöй телефонöн вöдитчыны велöдöны том йöз.
Корсюрö нёрпалышта да орччöн олысьяс Апполинария Александровна Порошкина да Надежда Ильинична Мишарина пыр и воласны видлыны.
Меным зэв нимкодь, мый миян Ручын йöз татшöм шаньöсь да бур сьöлöмаöсь. Муöдз копыр налы ставныслы!
Но менö майшöдлö сiйö, мый быдлаын быдмöны азьгум да бадь. Ме уналы нин шулi, мися, пуктыны кö туй пöлöныс пелысь да жов (та могысь колö кыпавлыны том йöзлы), тулыснас найö кутасны гажöдны да кыпöдны лов дзоридзьясöн, а арнас — вотöсöн. И сиктным лоас мичаджык да мусаджык. Лавкаын уджалысьяс эськö водзмöстчöны — пуктöмаöсь дзоридзьяс. Кöть туй дорын, но некод оз таляв.
Анна ИГНАТОВА.
Сыктывкар.