Донысь Татьяна Непомнящая ичöтсяньыс нин мöвпалiс, мый быдмас да лоас мамыс моз жö гортса пемöсъясöс бурдöдысьöн. И кымын верстяммис, сымын ёнмис мöвпыс. Валентина Николаевна мамыс ветеринар, районса ветслужбаын уджалiгöн уна во тöждысис совхозса да сиктса олысьяслöн скöт вöсна. Уджыс бырис, но йöзыс велалöмвылысь пыр корлiсны видзöдлыны ли бурдöдны видзанторъяссö. Валентина Николаевна пыр дась вöлi петны лунын кöть войын. Аскöдыс тшöкыда босьтлiс и ичöтик на Татьяна нывсö (сэки сылы вöлi ар нёль-вит). Нывка чуймöмпырысь видзöдiс, кыдзи мамыс видлалiс пемöсъясöс, вöчис укол ли нöшта мыйкö. Сэсся ачыс кутiс вöзйысьны висьысь пемöсъяс дорö, здук кö сюрлiс, малыштлывлiс найöс — жалитiс. Мамыс бöрся вöтчылiс и ассьыныс мöсъясöс йирсянiнö вöтлiгöн да вайигöн. Радейтiс найöс ёна, кутлас-малалас вöлi бурпöт. Коркö быдмыштöм бöрын вöзйысис лысьтысьны. Сэсянь, ар 14-сянь, тырвыйö нин кужис дöзьöритны-идравны скöтöс.

-Татьяна вöлi аслыспöлöс кагаöн, — висьталiс Валентина Николаевна. — Некор эз ворслы аканьясöн, киас пыр босьтлiс машинаяс. Визув, быд уджын писькöс, ичöтсянь эз пов сьöкыдысь. Ми öд век бергöдчим гид тыр скöтöн, öнi на со кутам кык мöс, кык кук, ыжъясöс, кроликъясöс, чипанъясöс. Татьяна дзолясянь бергалiс пемöсъяс дорын, зiлис отсавны, мыйöн вермис. Кор Сергей пиöй восьтiс ассьыс удж, кыпöдiс скöт карта да босьтiс мöс-куканьясöс, ветлöдлiм тшöтш сы дорö на отсасьны, кытчöдз эз босьт уджалысьясöс. Да и найöс босьтöм бöрын на ветлывлiм вежны шойч-чан лунъяс. Школасянь весиг öлöдлiсны, мый оз пö позь уджöдны челядьтö. Но öд Татьяна ачыс вöзйысьлiс тшöктытöг, радейтiс уджсö, а скöтсö нöшта на ёнджык. И мöвпалiс нин мунны велöдчыны ветеринарö, сы вöсна уджас сям шедöдöм-ыс бытьысь колiс.

Валентина Николаевналöн Алексей Иванович верöскöд ыджыд семья. Асланыс куим ныв-пи да челядь керкаысь босьтöмыс нöшта нёль. Медводз босьтiсны нёль арöса Татьянаöс да Мария-öс, сёрöнджык Полинаöс да Викторияöс, кодъ-яс öнi велöдчöны витöд да квайтöд классъясын. Бать-мам быдöн дорö кужисны матыстчыны сьöлöмнаныс, ставныс нин лоисны  матыссаöн да асöн. Кöть челядь, дерт жö, быдöн аслыспöлöсöсь. Мария нэриник, ичöтсянь радейтiс вöчасьны-кысьыны, велöдчис госстрахса уджалысьö. Татьяна, мöдарö, вывтi визув, пемöсъясысь кындзи, радейтö техника. Медводз журъялiс велосипедöн, сэсся мопедöн. Бать-мамыс ньöбисны «кöрт ёртöс», кор ныв велöдчис öкмысöд классын. Зэв на и лöсялiс скöт картаö ветлыны. Кыдзи и кöсйис, велöдчис ветеринарö. Кольöм воын помалiс Выльгортса агропромышленнöй техникум. Öти сайын велöдчис да босьтiс медводз мопедöн, а сэсся машинаöн ветлан правояс. Медводдза кадас ветлыны ньöбис важиник машина, техникум помалöм бöрын босьтiс выльöс. Öнi журъялö «Киа-спектраöн».

Пемöсъясöс бурдöдан уджö сюртчöмын, медводдза воськовъяс вöчöмын медшöр отсасьысьöн, велöдысьöн-туйдысьöн, дерт жö, вöлi мамыс. Эз öд тай этша кытшлавны ас сиктса олысьяслысь скöтсö, дöзьöр улын кутiсны тшöтш Сергейлысь (ыджыд овмöс кутысьтö позьö ыдждöдлыны и Сергей Алексеевичöн) сюрукъяссö. Валентина Николаевна велöдiс, кутшöм висигöн кыдзи асьсö кутö пемöс, мый колö вöчны, медым личöдны сылысь нёрпалöмсö, кыдзи вöчны укол, торйöн нин вир сöнö. Öнi том ань тöдö нин: мöс кö ружтö, пöдö, сьöкыда лолалö, ыджыд температура, сiдзкö, висьöны тыясыс. Куканьяс тшöкыда майшасьöны кынöм висьöмöн. Сэки найöс колö юктöдны йöлöн, зыравны кынöмлысь шуйга боксö, котрöдлыштны, мед личалас висьöмыс. Тöдö и, кор кöсйö вайсьыны мöс: педзö бöръя кокъяс вылас, легöдö бöжнас, ымзö, водö-чеччö. И кужö нин вайсьöдны сюрукöс. Дерт, таö ставнас велöдiсны техникумын, Висерса видз-му овмöс кооперативын да Кулöмдiнса ветстанцияын практика дырйи. Но унджык тö-дöмлунсö сетiс да велöдiс, кыдзи найöс пырт-ны уджас, мамыс. Öнi Татьяна уджалö Сергей Алексеевич вокыс дорын аслас специальносьт серти. Колiгöн юасьлывлö на мамыслысь, кор да мыйöн бурдöдны сюрукъясöс, мед эз ло сорсьöма. Сиктсаяс öнi корлöны оз сöмын Валентина Николаевнаöс, но и том ветеринарöс. А со пон-каньяс дорö Татьянаöс оз ёна кыскы, сьöлöм серти гырысьджык пемöсъяс. Та вöсна водзö вылö мöвпъясыс ыджыдöсь. Медводз кöсйö велöдчыны водзö, шедöдны вылыс тшупöда велöдчöм, а сэсся восьтны вокыс моз ассьыс удж, котыртны крестьянин овмöс.

Валентина Николаевналы нимкодь, мый нылыс мунö сылöн кок туйöд, сы моз жö бöрйис радейтана удж, мöвпалö велöдчыны водзö. Верöсыскöд дасьöсь отсавны, мыйöн вермасны, мед сöмын зумыда сувтiс кок йылас, петiс асшöр олöмö. Нинöм шуны, сиктын видз-му овмöс пыкысьяс колöны. Сергей Алексеевич пиныс ыджыд овмöс лöсьöдöмöн, уджсö пась-кöдöмöн — скöт видзöмöн да яя вöлöга вöчö-мöн, нималö оз сöмын районын, но и республикаын. Чайтсьö, Татьяна ыджыд кöсйöмнас да нырччöмнас оз жö кольччы сыысь да ас кадö сiдзжö панас ассьыс удж.

— Сиктад удж бергöдтöгыд некыдз. Ми асьным быдмим сы помысь, сы отсöгöн велöдiм овны челядьöс, и со внукъясöс нин тшöтш туйдам. Сы вöсна и отсасьöны найö быдтор-йын, бергöдöны гортса овмöс. Карын олысь Лидия нывлöн Диана, менам внучка, волас да пыр жö сибöдчö пемöсъяс дорö, радейтö вöтлыны йирсянiнö мöскöс да вайны рытнас бöр. Оз-ö скöт видзысьöн жö кöсйы лоны? — нимкодьпырысь шензис Валентина Николаевна.

Галина Нестерова.

Снимок вылын: В.Н.Тимушева да Т.Непомнящая.