Миян йöз

[ A+ ] /[ A- ]

2018-öд во помын райсöветса депутатъяс вичмöдісны «Районса пыдди пуктана олысь» ним Кулöмдінысь Н.А. Лютоевлы. 
Николай Александрович чужис да быдмис Керчомъяын. Школа бöрын уджыштіс Керчомъяса кылöдчан участокын. Армияын служитöм бöрын бергöдчис чужанінас. 1971-öд воын Н.А.Лютоевöс корисны уджавны районса «Ленин туйöд» газетлöн редакцияö. Сэнi 23 во уджалігöн воліс районса быд пельöсö, тöдмасис уна йöзкöд. Тайö лоис «Удивительные люди Верхней Вычегды» книгалы подулöн. Таöдз вöліны Кулöмдінысь войнакадся челядь, Сöветскöй Союзса Герой Г.Ф.Тимушев, Славалöн куим ордена А.А.Тимушев, Помöсдінса кыйсян котыр йылысь книгаяс. Öні Николай Александрович дасьтö районса шензьöдана йöз йылысь мöд книга. 
Н.А.Лютоевлы абу веськодь районлöн да Кулöмдінлöн олöм: сійöс куимысь бöрйылісны райсöветса депутатöн, öні – «Кулöмдін сикт» овмöдчöминса депутат. 12 во вöлі «Коми войтыр» öтмунöмлöн районса юкöнын. Николай Александровичлöн, кыдзи райсöветса депутатлöн, водзмöстчöмöн Пятигорскын сетісны стрöитчöм улö муяс, сэтчö нюжöдісны би, вöчисны автобуслы сувтланін, Кулöмдінса Катыдпомын да Пятигорскын нюжöдісны ва. Николай Александрович зэв водзмöстчö олöма йöзлöн районса котырлöн уджын, буретш сы отсöгöн содісны олöмаяслöн меставывса котыръяс. 
Н.А.Лютоевöс пасйылісны Коми республикаса Государственнöй Сöветлöн, Россияса журналистъяс котырлöн, печать, телевидение да массöвöй коммуникацияяс комитетлöн пыдди пуктана грамотаясöн, Коми республикалöн пыдди пуктана грамотаöн, сылы сетлісны «За безупречную службу Республике Коми» пас. 
«Районса пыдди пуктана олысь» нимысь вичмöдöм сьöм Николай Александрович кöсйö видзны «Удивительные люди Верхней Вычегды» выль книга лэдзöм вылö. 

Лидия ЛИПИНА. 
Снимок районса 
администрацияысь пресс-службалöн.

Комментарии:

Добавить комментарий

Свежий выпуск: за 27 июня