Сергей Александрович Романов чужлiс Кебанъёльын. Сiйö военнöй. Олöмыс вайöдлiс Перымö, Сыктывкарö да Санкт-Петербургö. Сэсся бергöдчис чужанiнас. Уджалö районса администрацияын гражданскöй оборона, видзчысьтöм лоöмторъяс да йöзöс доръян юкöнöн веськöдлысьöн. Зэв кывкутана удж вылö видзöдтöг, Сергей Александрович шань бать да бур верöс. Татьяна Васильевна гöтырыскöд быдтöны кык пиöс. Константинлы 8 арöс, велöдчö мöдöд классын. Мöдöд во ветлöдлö дзюдо секцияö, сыöдз котралiс футбол вылö. Сьöлöмыс медсясö нимкодясьö футболысь. Дзоляджык Витялы ноябрын тырас вит арöс. Ветлöдлö садйö. Радейтö вöчавны конструкторъясысь роботъясöс да машинаяс. Бура серпасасьö. Кыдзи пасйис батьыс, ачыс дзолядырйи тшöтш ворсiс футболысь да вöчасис конструкторъясöн. Öнi выль конструктор ньöбöм бöрын пиыскöд вöчасьöны öтлаын. Гожöмнас ставöн öтув ворсöны футболысь. Ветлöдлöны велосипедъяс вылын. Тöвнас керка дорас исласьöны ватрушкаясöн да лыжиöн. Дзоляджыкыс оз на ёна куж да сылы нимкодьджык котравны на бöрся. Медводдзаысь таво Костякöд ветлiсны Кулöм ю вылö кыйны чери. А нимкодьыс мыйта вöлi зонкалöн! Таво Сергей Александрович тесьтыскöд вöчисны гараж да пияныс бергалiсны на дорын, юасисны, мыйöн отсыштны. А кутшöм жö сьöлöмсянь тувъясисны да веськöдлiсны кöрт тувъяс!
Татьяна Васильевналы, дерт, нимкодь верöслöн отсасьöмысь. Костялы коркö ковмис ветлыны пинь бурдöдысь дорö. Зонка полiс, да батьыс жö нуöдлiс. Сiдзжö новлöдлö шырсьыны. Петкöдчöны öтув «Весёлые старты» ордйысьöмын. Таво майын вöлiны дзюдо кузя ордйысьöмъяс да пи вöсна «висьны» волiсны Олимпикö став семьянас. Дерт жö, медсясö Костялы сьöлöм вылö воö, кор батьыс босьтлö сiйöс удж вылас. Озъягын кусöдчысьяслöн ордйысьöмъяс дырйи сьöлöмсянь видзöдiс кусöдчысьяс вылö, пуксьылiс налöн ыджыд машинаö. Пожöма ягö батьыс нулывлiс «Зарница» вылö. Коркö Помöсдiн дорын нуöдiсны туйвывса неминуча бырöдöм кузя велöдчöм, да зонкалöн öзйис синмыс, кор аддзис сиренаясöн да мигалкаясöн быдпöлöс машинаяс.
— Ми быд тöлысь ветлывлам став котырöн карö. Челядьлы сьöлöм вылö воöны ворсан автоматъяс. Сiдзжö найöс новлöдлам музейясö. Дыр казьтыланаöн колис, кыдзи краеведческöй музейын уджалысь пöрысь пöль ставсö висьталiс, петкöдлiс да лэдзис видлыны ас киöн. Гожöмын öтув ветлам тшакла. Челядь окотапырысь вотчöны и тöдöны нин öткымын тшаклысь нимъяс. Пиян отсасьöны гортын: ыджыдыс быд вежон пылесоситчö, мекöд пыртлöны пес. Вокъяс öта-мöдкöд ёртасьöны, ворсöны öтлаын. Ме отсала дасьтысьны урокъяс кежлö. Кор эм прöст кад, пыр зiля сiйöс коллявны челядькöд да семьякöд, — висьталiс Сергей Александрович.
Татшöм батьяскöд челядь быдмöны шудаöсь.
Гижöд Галина КЛЮЖЕВАЛÖН.
Снимок С.А.Романовлöн чукöртöмысь.