Кекурысь Анна Семёновна Миронова вермис видз-му овмöс министерствоöн котыртöм балаяслöн конкурсын да кыдз босьтчысь крестьянин овмöс кутысь шедöдiс грант. Сьöм вылö ньöбис трактор да «Пожöг» кооперативысь 15 куканьöс.
Фермеравны босьтчис 2017-öд вося декабрсянь. Ыжъяс вöлiны нин, воча вокыслысь, крестьянин овмöс кутысь Иван Егорович Шаховлысь, ньöбис мöскöс. Сiйö жö воын кыпöдiс скöт карта да мöд вонас сюрукъяс пырисны нин сэтчö. Öти аньлысь нöшта ньöбис мöскöс да тыра куканьöс. Но сьöкыд вöлi заптыны кöрым. Медавлiс техникаа йöзöс, ньöблiс турун, тайö сувтлiс вель дона. Буретш техника да куканьясöс ньöбöм кузя балаöн и пырöдчис конкурсö.
Грант вылö босьтiс «Беларус» трактор, содтöд ачыс ньöбис додь. Ытшкан кöртымавлiс кооперативлысь. Ытшкис аслыс да тшöтш и кооперативлы. Кооператив жö отсалiс аньлы вöчны 300 да 700 килограмм сьöкта гöрддзымъяс. Мед эз кöтась зэр улын, пыр жö вайис горт дорас, сюйис лэбулö, разялiс, тöлöдiс да чöвтiс. Анна Семёновна тöв кежлö заптiс 53 тонна кöрым, öти мöс вылö артыштöмöн 26 центнер. Тайö медся уна лыдпас кооперативъяс да крестьянин овмöс кутысьяс пиын. Пуктысьны отсалiсны ныв гозъяыс да 14 арöса двöйни пиян, а сiдз жö рöдвуж.
— Талун менам овмöсын 24 скöт юр, куимыс лысьтан мöс. Ыджыд картаын 16 сюрук, мукöдыс важ дзоляджыкас, кодöс локтан воын резьöдам да кыпöдам выльöс. Сiдзкö, лоас позянлун паськöдчыны, сöвмыны водзö, — кывкöртiс ань.

Анастасия Ярова,
районса видз-му овмöс
юкöнöн веськöдлысь.
Владимир Шомысовлöн снимок вылын: А.С.Миронова В.В.Чупин верöсыскöд выль трактор дорын.