Миян йöз

[ A+ ] /[ A- ]

— Таво зэра гожöм видзис вöр öзйылöмъясысь. Кольöм воын сöмын öтчыд ас кадö казялiм да пöдтiм бисö, водзö дзикöдз кусöдiсны öзйылöмъясысь сынöдсянь вöр видзысьяс. А таво миян юкöнын вöр эз сотчы, — сёрнитiс Помöсдiнса лесничестволöн Пузласа юкöнысь лесничöй Алексей Михайлович Шомысов, кодi вöр овмöсын нёль во.
Мунiс Михаил Анатольевич батьыслöн, кодi вель уна во нин веськöдлö Помöсдiнса лесничествоöн, кок туйöд. Школа помалöм бöрын велöдчыны пырис кыклаö, искусствояслöн колледжö да Сыктывкарса вöр институтö. Кыкнан специальносьтыс вöлi матын сылы. Волывлiс батьыс дорö уджаланiнас, сыкöд жö ветлöдлiс Помöсдiнса народнöй театрö. Артист ворсöмъясöн век туйын. А öд том мортлы колö лöсьöдны семья, быдтыны челядьöс да аскиа лунö видзöдöмöн эновтiс колледж, велöдчис сöмын институтын. Диплома мортлöн удж пансис Помöсдiнса лесничестволöн Вöльдiнса юкöнын. Вöлi мастерöн, а сэсся лесничöйöн. Во мысти вуджöдiсны Пузласа юкöнö.
Видзöдö, мед закон торкалöмöн эз пöрöдны вöр, мед сöстöмöн колисны уджалöм бöрын вöр юкöнъяс кöртымалысьяс да пöрöдчöминъясö пуктiсны пуяс. Шыöдчысьяслы сетö вöр кыпöдны керка, пывсян да мукöдтор. Таво челядьлысь енби сöвмöдан «Патриот» керкаса велöдысьяскöд лöсьöдiс челядьлы лесничество, кутасны öтув велöдны сöстöма видзны вöр.
Алексей Михайлович водзмöстчö сиктса олöмын. Сiйö да батьыс пырöны народнöй дружиналöн котырö, кодi тöждысьö лöнь олöм вöсна, видзö челядьöс лёкö сетчöмысь. Нöшта сiйö ворсö шмонитысьяслöн Скöрöдумса котырын. Кыпöдiс керка, шуда поз, кöнi сiйöс пыр виччысьöны муса гöтыр да пи.
Марина Дадашова
Снимок Валерий Мингалёвлöн.

Комментарии:

Добавить комментарий

Свежий выпуск: 28 марта

Осторожно — мошенники!