Миян йöз

[ A+ ] /[ A- ]

Кулöмдiнысь Евгений Анатольевич Нестеров 2009-öд воын Сыктывкарса торгово-экономическöй техникумлысь юриспруденция факультет помалöм бöрын дасьтысис армия кежлö. Мöвпалiс веськавны тöдчанаджык войскаясö. Карса военкоматын вöзйисны сынöдса десант войска да морфлот. Бöрйис медводдзасö. Веськалiс Псковса 76-öд дивизиялöн десантно-штурмöвöй батальонö. И эз жалит, кöть ковмис вуджны уна сьöкыд. Служитiс во, а джын кадсö ковмис овны военно-полевöй лагерын. Томуловлы шойччан здук сюрлiс гежöда: лунтыръясöн котралiсны, песiсны ки-кок, велöдчисны лыйсьыны автоматысь, пулемётысь, БМД-2-ысь пушкаöн, чеччалiсны парашютöн. Том морт нёльысь чеччыштiс АН-2 самолётсянь, куимысь ИЛ-76Д-сянь, кытысь сынöдö öтпырйö петавлiсны матö 100 морт. Овлiс, войыс сулiс да, узьмöдчылiсны эз сöмын крöватьын, но и окопын, вöрын, аэропортын. Евгений Анатольевичлы сьöкыдсö венны отсалiс школасянь спорткöд ёртасьöм: вын песiс сьöкыд атлетика, а карын велöдчигöн — бокс отсöгöн, мöд кузяыс шедöдiс верстьöлысь медводдза разряд, тшöкыда петкöдчылiс ордйысьöмъясын. Армияын томулов пöвстын физическöй дасьлун кузя вöлi медводдзаяс лыдын. 
— Армияын служитны кöть вöлi сьöкыд, но воис сьöлöм вылö, — висьталiс том морт. — Öнiя том йöзлы сиа, медым эз повны армияысь. Служба сетö том мортлы пытшкöс вын, быд мытшöдысь петан туй аддзыны сям, медым водзö олöмын вермис венны став сьöкыдсö, велöдö повтöмлунö. 
Евгений Анатольевич армияысь локтöм бöрын пырис уджавны карын МВД юкöнö, 2015-öд воöдз зiлис вневедомственнöй охраналöн юкöнын, зiль уджöн шедöдiс старшöй сержантлысь ним. 
Служба бöрын жö öтлаасис радейтана Ирина нывкöд, кодi виччысис армияысь. Том мортöс кыскис чужанiнас, Кулöмдiнö, кытчö 2015-öд воын бöр локтiсны семьянас. И, дерт жö, пыр кежлö нин, сы вöсна мый босьтчисны кыпöдны оланiн. Локтöмсяньыс Евгений Анатольевич пырис вневедомственнöй охранаö. Талун сiйö Росгвардияса уджалысь, инспектор. Зiльö зэв кывкутöмöн, эз весьшöрö вичмöдны старшöй лейтенантлысь ним. 
Галина НЕСТЕРОВА.

Комментарии:

Добавить комментарий

Свежий выпуск: 28 марта

Осторожно — мошенники!