Кулöмдiнысь Татьяна Романова помалiс 9-öд класс, сылы 16 арöс. Зэв нырччысь, шань сьöлöма нывка. Бура велöдчö. Таво петкöдчис Сыктывкарын «Лидер XXI века» конкурсын, кытчö волiсны республикаса школаясысь да колледжъясысь велöдчысьяс. Ветлiс сэтчö медводдзаысь. Бура петкöдчöмысь, нырччöмысь нывкаöс казялiсны да корисны челядьлöн Россияса öтмунöмлöн чукöртчылöм вылö, кодi лоас сентябрын Усинскын. 
Татьяна петкöдчö быдлаын: «Вежа берба», «Вежа ва» нуöданторъясын, РДШ-лöн конкурсъясын. Чужан сиктын, Носимын, йöктö, сьылö, асланыс котырöн петкöдчöны мукöд сикт-грездъясын, унапöлöс гаж вылын, шуам, Купальнича, Троича лунъясö. 
Нывка ёна радейтö лыддьыны кывбуръяс. 2018-öд воын лоис мöдöн «Планета талантов» районса конкурсын. Кык во котралiс лыжиöн, тшöкыда ветлö бурмöдны мыгöр. 
Россияса челядьлöн öтмунöмын коймöд во нин. Чайтö, мый сэнi томуловлы эм уна позянлун. Нырччысь ныв-зонмöс казялöны, корöны быдпöлöс чукöртчылöмъяс вылö, сетöны козинъяс. Челядь асьсö кылöны коланаöн. Водзö велöдчыны пыригöн сетсьö содтöд балл. Таня — ас кöсйöмöн отсасьысь. Сылы зэв нимкодь, мый вермö отсавны йöзлы. Век эм кутшöмкö удж. Ныв шуö, мый бурджык отсыштны пöль-пöчлы, а не пукавны гортын телевизор водзын. 
Мамыс пыдди пуктö нылысьлысь быдлаö пырöдчöмсö. Таня и гортас удитö унатор вöчны: пусьыны, ваявны ва. Костас котралö репетицияяс вылö. 
Мöдöд во нин уджалö школабердса площадка вылын вожатöйöн. Гижö сценарийяс, дасьтö да нуöдö челядьлы быдпöлöс гажъяс да конкурсъяс. Ёна накöд ворсö. Челядьлы, дерт, нимкодь тайö пыр нюмъялысь нывкакöд. 
Бур кывъяöн пасйис Татьянаöс и велöдан управлениеысь том йöзкöд уджалан юкöнöн веськöдлысь В.П.Савельева: 
— Таня — быдлаö пырöдчысь, олöм вылö нюмсорöн видзöдысь, выль мöвпъяс чужтысь ныв. Петкöдчö уналаын. Ветлöдлiс миянкöд районса школаясö, мед унджык челядь тöдмаласны РДШ йылысь. Молодеч! 
Галина КЛЮЖЕВА. 
Снимок интернетысь.