Бадьёльйылысь Галина Николаевна Чисталёвалы июнь 16-öд лунö тырис 90 арöс. Тшупöда пасöн волiсны чолöмавны да козьналiсны В.В.Путинсянь козин олöмаяслöн районса котырöн веськöдлысь Г.А.Кравченко, райадминистрацияöн веськöдлысьöс вежысь Н.А.Левченко, «Помöсдiн» овмöдчöминса юралысь А.Е.Уляшев. Сиисны ён дзоньвидзалун. 
Галина Николаевна пырис уджавны колхозö война пансян воö. Сылы вöлi 12 арöс. Василиса Ивановна мамыс сэнi уджалiс 68 арöсöдз. Галина Ивановна вöвъяс вылын новлöдлiс ылыс видзьяс вылысь турун. Öтчыд Дiасёръяын шор вомöн лёк важмöм пос вуджигöн вöлыс чеччыштiс йöрданö, Галина муртса эз вöй. Тöв шöрын сылы ковмис ва паськöмöн мунны Москапасöдз скöт видзысьяс дорöдз, кöнi сiйöс шонтiсны да сетiсны кос кöлуй. 15 арöссянь кöкъямыс во чöж Галина Николаевна уджалiс кер дорын — Юшкаёльын да Ниакосьтын. Лучковкаöн пöрöдiс уна вося пожöмъяс. Век вöчис урчитöмтор. Бур уджысь вичмис и бур удждон. Том арлыд вылö видзöдтöг сiйö вöлi зэв зiльöн да быдлаö нырччысьöн. «Эз кольччыв некор верстьöясысь» — тадз сы йылысь гижöма «Усть-Куломский район в годы Великой Отечественной войны. Труженики тыла» книгаын. 1952-öд воын вуджис овны бöр чужанiнас, Бадьёльйылö. Вит во конюкалiс. Вöлыс вöлi зэв уна. 
Зэв сьöкыд вöлi война кадö. Галина Николаевна казьтылiс, мый фронт вылö нуисны зэв уна чаньöс, буръясöс да дзоньвидзаясöс. Бöрас видзис куканьясöс. Сiйöс пасйылiсны медбуръяс лыдын. Сетлiсны сьöма отсöг да козинъяс. Бура уджалöмысь эмöсь медальяс. Совхозын уджалiс 31 во. Öтнас быдтiс куим нылöс, сылöн эм кык внучка, нёль правнук, öти праправнук. Öнi олö Валентина нылыскöд, кодi зэв бура тöждысьö мам вöсна. 
НИНА УЛЯШЕВА. 
Снимок Наталья Левченколöн.