Асшöр уджалысь Денис Игоревич Богданов районын медводз босьтчылiс вöчны вöр колясъясысь ломтас. 2010-öд воын сiйö юрсикт бокö восьтiс пилорама. Уджöн могмöдiс юрсиктсаясöс, районсаясöс. Ньöбöм вöрысь вöчис косьтöм пöвъяс, евровагонка да мукöдтор. Пилипызьысь вöчис брикет да иналiс республикаын. Сэки выль ломтасöн вöдитчисны омöля, да кык во мысти эновтчис. Пилипызь мунiс аслас овмöсын кык ломтысянiнö, кысянь шоныд воö пиломатериал косьтанiнö, стружитчанiнö. 
Кольöм во помын бöр ловзьöдiс ломтас вöчöм. Оборудование Россияысь, доныс квайт миллион шайт. Заводсянь волiсны специалистъяс, сувтöдiсны да лöсьöдiсны. Велöдiсны кöкъямыс выль уджалысьöс. Тöлысьнас урчитöма вöчны 200 тонна. Сы мында и вöчöны. 10-15 килограмма тубыртöм ломтас ньöбöны йöз. Ыджыд мешöкъясöн иналö Сыктывкарö, босьтöны Помöсдiнса аптекалöн, Одыбса видз-му овмöс кооперативлöн ломтысянiнъясö. 
— Водзö вылö мöвпала содтысьны пеллет вöчöмöн, босьтны вöр коляс и мукöдлысь. Талун ме дорын уджалö 40-50 морт. Ставныс районысь. Кольöм воын вöчим 15 сюрс кубометр пöв, 19 сюрс кубометр евровагонка да стрöитчыны мукöд коланторъяс. Ставсö инала республикаын да Россияын, — кывкöртiс Денис Игоревич. 
Марина ДАДАШОВА.