Миян йöз

[ A+ ] /[ A- ]

Ручысь Диана Алексеевна Гребенюк Сыктывкарса öтиöд номера педколледж помалöм бöрын босьтчис уджавны ас сиктса школаын. Уджысь орöдчытöг помалiс нöшта Сыктывкарса госуниверситет. И со 21-öд во нин велöдö роч да коми кыв и литература. Ыджыд вын пуктö, медым и водзö кутчысис, сöвмис да юргис чужан кыв. И эз сöмын школаын, но и сиктын. Интернет методика литература отсöгöн, велöдысьяслöн чукöртчылiгöн öтарö кыпöдö сям, кодöс вочасöн пыртö уджас. Велöдчысьяслы сетö джуджыд тöдöмлунъяс. Ышöдö найöс петкöдчыны олимпиадаясын да конкурсъясын. Таво на коми кыв да коми фольклор кузя район да республика тшупöда олимпиадаясын челядь петiсны вермысьяс лыдö. Бур тöдöмлунъяс петкöдлiсны «Отечество — земля Коми» районса конкурсын. Диана Алексеевна нуöдö и чужан му туялöм кузя ыджыд удж. Выль велöдан программа серти челядькöд быд во дасьтöны балаяс. Таво тайö уджас сюртчисны витöн. Велöдчан во помын балаяссö доръясны. Ошкана и сiйö, мый таво татчöс школаын 9-öд класса öткымын велöдчысь госэкзаменсö медводдзаысь бöрйисны буретш коми кыв кузя. Кутасны гижны сочинение. 
Февральын сиктын кыпыда колисны коми кывлы да культуралы сиöм лунъяс. Ыджыд пай татчö пуктiс и Диана Алексеевна, а сiдзжö культура керка да сад. Нуöдiсны шмонитысьяслысь рыт, кöнi петкöдчисны велöдчысьяслöн, велöдысьяслöн, садса уджалысьяслöн да олöма йöзлöн котыръяс. «Лямпиада» дырйи юргисны коми ворсöмъяс. Пöжасьны да пусьыны радейтысьяс дасьтiсны коми пöжасъяс да важ сикас вöлöга. Торъя рытъяс сиисны шегъясьны да важся коми йöктöмъяс велöдöмлы. Гижисны коми диктант. Помасис коми кывлы сиöм уджыс öтувъя ыджыд гажöн. 
Диана Алексеевна водзмöстчö и велöдан балаяс дасьтöмын. Кольöм воын та кузя районын лоис мöдöн, Россия тшупöдын уджсö донъялiсны медвылö да лоис вермысьöн, мыйысь вичмöдiсны диплом. Конкурсын бура петкöдчöмыс отсалiс шедöдны квалификациялысь вылыс тшупöда категория. 
Галина НЕСТЕРОВА.


Комментарии:

Добавить комментарий

Свежий выпуск: за 16 мая