Ми ставным — мамъяс

[ A+ ] /[ A- ]


Матыстчö зэв мича гаж — мамъяслöн лун. Тайö жö лунö ручса «Сударушки» сьылан-йöктан котырлöн чужан лун, ичöтик тшупöда пас — сылöн артмöмсянь тырас 15 во. Сiдз нин лоис, мый коркö аньяслöн сöветö пырысьяс сьывлiсны сикт-сöветын олöмаяслöн лун дырйи, петкöдчисны тöдчана лунъясö Великöй Отечественнöй война вылын усьöмъ-ясöс казьтылан пас дорын, чукöртчывлiсны и библиотекаö. Наöн веськöдлiс А.И.Адамова. Кор олöмаяслöн сöвет бöрйис сiйöс юрнуöдысьöн, аньяслöн сöветöн босьтчис веськöдлыны Н.М.Подюкова. Сэки сэтчö ветлöдлiсны В.Э.Чувьюрова, Т.Н.Расова, волiс и клубса уджалысь В.И.Напалкова. Кыдзкö зэв кокниа артмис, мый ичöтик котыр ыдждiс да кутiс волывлыны клубö сьывны. Праздник водзвылын окота казьтыштны ас сиктсаясöс, районсаясöс, карсаясöс да ылi Коряжмасаясöс — гажöдысьясöс, кодъяс томсянь сьылiсны-йöктiсны, удитiсны костас и кага вайны, быдтысьны, но эз дугдыны водзö «овны» сцена вылын. Тайö Любовь Ремовна Попова, кодi и гортгöгöрсö бергöдö, и мича дзоридзьяс быдтö, и дзолюкъясöс садйын видзö, и сьылö-йöктö, став тешас петкöдчö. Мöд «Чветочек» «Новые русские бабкиысь», дай ставыс. Анна Ильинична Адамова быдлаын медводзын, видзö 98 арöса мамсö, отсалö быдтыны внук-внучкаяссö, миянöс кыпöдö выльторъяс вылö. Елизавета Егоровна Жаровских зэв мича гöлöса, уджавлiс велöдысьöн, ок и чöскыда пöжасьö! Иван Андреевич Попов коркö водзынджык сьывлiс Светлана гöтырыскöд, öнi миян котырын — вежны позьтöм морт: кытчö ковмас, нуас-ваяс аслас транспортöн, да и кужö ворсны тешъясын, сьывны-йöктыны. Дыр жö нин котырын Валентина Дмитриевна Зезегова, кодлöн öшинь улас дзоридзыс мойдын кодь. Сiдзжö чöскыда пöжасьö, вöчалö сэтшöм салатъяс, мый кывтö ньылыштан. Но медшöрыс сылöн — семья, внук-внучкаяс. А сьывнытö радейтö. Капиталина Григорьевна Есева хорын котыртчöмсяньыс, сьылö-гажöдö сиктсаясöс. Велöдысьыд кольö велöдысьöн аслас сёрнинас, мöвпъяснас кöть мыйта кад кольöм бöрын. Татшöм миян Григорьевнаным. Владимир Леонидович Трегубов Мария Витальевна гöтырыскöд хорлöн медрадейтанаяс лыдын. Натöг оз коль ни öти гаж, öд оз нин сöмын миян районын, но и республика пасьта йöзыс номсасьлiсны налöн тшака да капустаа пирöгъясöн, чöскыд лязöн, тшынöдöм ас чериöн. Анна Ивановна Попова зэв шань, лöниник ань, но кор сьылö, тайö колö кывны, зэв мича гöлöса, радейтö дзоридзьяс, но медся нин ассьыс пиянсö да внукъяссö. Маргарита Александровна Нестерова, сьылöм-йöктöмысь öтдор, миян «политинформатор»: мый кöть он юав мирса выльторъясысь, лоöмторъясысь, ставсö тöдö, ставсö бура висьталас, гöгöрвоöдас. Юöръяс босьтö радиоысь да телевизорысь. Зэв бур кöзяйка, внук-внучкаяслы бур пöч да ыджыд мам. Сьывны-йöктыны, ворсны тешъясын радейтö Зоя Михайловна Гуляева. Öтнас кок йылö сувтöдiс кык нылöс да внучкаöс. Уджалö соцработникöн, но корсьö кад волыны клубö. Неважöн локтiсны сьывны-йöктыны акань кодь кык том ань — Екатерина Юрьевна Расова да Алёна Анатольевна Рассыхаева. Кöть и уджалöны, сьылöм дорад муслуныд вермö. Кыкнанныслöн зэв мича, ён, мыла гöлöсъяс. Водзын сьывлiс Зоя Никифоровна Попова, öнi ветлöдлö вичкоса хорö. Котырын Людмила Альбертовна Зезегова, ачыс уджалö садйын. Ёна радейтö ассьыс внук-внучкаяссö, а лов кыпöданторйыс — дзоридзьяс. Жанна Михайловна Нестерова мырсьö бурдöдчанiнын, видзö ас дорас внучкасö, кытчöдз карса садйысь дзолюклы оз сюр места. Öнi оз волывлы, и сылöн мича гöлöсыс, нюмыс да серамыс ёна оз тырмыны «сударушкисаяслы». Сыысь бурасö «Новые русские бабкиысь» Матрёнаöс некод оз ворс. Анна Михайловна Зезегова — збыльысь «сударушка»: верöсыскöд быдтiсны вит челядьöс, век уджалiс совхозын, видзис порсьясöс, а тайö сьöкыд удж. Дугдiс ветлöдлыны хорö Надежда Александровна Метлякова, öнi ёна оз тырмы миянлы сылöн гöлöсыс. Уджалö библиотекаын, и кöть кор огö шыасьлöй, век отсалö. Быдтысьö да, оз волывлы Людмила Анатольевны Адамова, кодi уджалö миян больничаын пинь бурдöдысьöн. Лэптiс выль керка, горт гöгöрыс мичасьыс-мича дзоридзьяс.
Талун хорö ветлö 13 ань да кык айлов. Юрнуöдö, велöдö, корсялö выль мича сьыланкывъяс, йöктöмъяс, тешъяс, петкöдчанторъяс Надежда Михайловна Подюкова. Сiйö нэмсö нин культураын: босьтчывлiс Ручса клубын, вöлi Кулöмдiнса культура керкаын директорöн, öнi, матö дас во нин, миянкöд. Быдторйыс овлö котырад, но ми клубын, сьылöм-йöктöмысь öтдор, и шойччам, сёрнитам быдтор йылысь, чай чашка сайын пасъям чужан лунъяс, челядьлы нуöдам викторинаяс, спорт ворсöмъяс. И миянлы тайö зэв воö сьöлöм вылö. Ми ставным — мамъяс, и тайö ыджыд гажöн чолöмала «Сударушки» котырын сьылысь-йöктысь аньясöс, тшöтш и водзынджык ветлысьясöс! Дзоньвидзалун, водзö вылö вермöмъяс да, кыдз шуö миян веськöдлысьным, «ми кöть и абу народнöйяс, но йöзöн радейтанаяс»! Мамъяслöн лунöн!
Екатерина Ульнырова.
Руч.
Гижысьлöн снимокъяс вылын: «Сударушки» котыр.

Комментарии:

Добавить комментарий

Свежий выпуск: 28 марта

Осторожно — мошенники!