Мича керкаяс кыптöны Ручын. Выль ёнмöдчанінö волігöн пыр нимкодясям Наталья Михайловна Попова да Евгений Николаевич Ульныров гозъялöн чача кодь выль керкаöн. Гырысь öшиньяса, пелькиник, сідзи и корö пыравны. И ме пыралі. Дерт, Наталья Михайловнаöс да Евгений Николаевичöс бура тöда, öд кыкнанныс чужисны, быдмисны, велöдчисны Ручын, карын велöдчöм бöрын бöр воисны ас сиктö. Юаси кöзяйкалысь, кыдзи-мый олöны, кутшöмöсь водзö вылö мöвпъяс (кöзяинсö уджысь эг торкöй, мыйкö ноксис-вöчис да).
Ыджыд да мича жырйö пырöм бöрын медводз ворсышті ичöтик Владиславкöд. Сійö — бать-мамлöн муспоз. Наталья Михайловна висьталіс, мый 11-öд класс помалöм бöрын юркарын велöдчис 6-öд номера профтехучилищеын секретар-референтö, бöрынджык вузасьысьö, а сэсся бухгалтерö. Галина Владимировна мамыскöд öтув восьтісны лавка, кöні ачыс вузасьö. Евгений Николаевич верöсыс электрик. Зэв киподтуя. Уджавліс бурдöдчанінлöн ломтысянінын, тупкысьöм бöрас шöр котельнöйын.
Аслас матыссаяс йылысь висьталігöн Наталья нюмъялö. Том йöз аддзысисны 2012-öд воын, сэксянь öтлаынöсь. Вöлі гажа кöлысь. Во сайын петісны ас керкаö. Кыкнанныслöн зэв ёна отсасьöны бать-мамъясныс. Натальялöн батьыс бергаліс нылыслöн керка дорас сійöс панöмсянь, öд Михаил Васильевич водзджык кыпöдіс нин аслыс зэв мича керка, кöні олöны Галина Владимировна гöтырыскöд да Александр пиыскöд.
Майбыр, быдлаö тырмöма сямыс: орччöн ас киöн жö лэптöм лавка, пелькиник гожся пусянін, шойччанін. Тöдчö, мый ставсö вöчöма сьöлöмсяньыс. Тесть кодьыс жö Евгений зятьыс. Со и вöчисны öтув чача-керка, кытöні öні олö нылыслöн семьяыс.
Наталья радейтö дзоридзьяс, керкаас ставыс дзим-дзурк, пельк, нинöм ковтöмыс ли лишаланаыс абу, ставыс сулалö ас местаын. А Евгений радейтö кыйсьыны, вайö пöтка да чери. Сылöн Валентина Михайловна да Николай Владимирович бать-мамыс отсалöны видзны внуксö. Наталья шуö: со пö орччöн сад, тані жö школа, öшинь улын дзолюкъяслöн ворсанін, а сэсся и ёнмöдчанін воссис — кутшöм гажа!
Медъя. Овмöдчисны ас сиктаныс, уджалöны, олöны öта-мöдсö радейтöмöн да пыдди пуктöмöн. Мый сэсся и колö? Керка тырыс мед вöлі шуд да тыр-бур олöм, ичöт пиныслы да гозъялы дзоньвидзалун. И мед збыльмас став кöсйöмныс!
Екатерина Ульнырова.
Руч.
Снимок вылын: шуда гозъя.