Медводдзаяс лыдын

[ A+ ] /[ A- ]

Юалан кö районсаяслысь, кодi сiйö Николай Напалковыс, томджыкъяс шуасны, мый сёрни, буракö, таксист йылысь, а арлыдаясджык тöдöны сiйöс спорт сöвмöдöмö ыджыд пай пуктысьöн. Николай Ивановичлы декабр 8-öд лунö тырис 70 арöс, но та мындасö он сет. Мукöд 50 арöсаыс сыысь пöрысьджык. Кыдзи висьталiс ачыс, нэмсö кутчысис дзоньвидза олöмö да спортö. 
Чужис да быдмис Донын уна челядя семьяын. Вöлi медыджыдöн, та вöсна сюрлiс быдтыны дзоляджык сизим чоя-вокаöс. Велöдчис гортас и Керчомъяын, бöръяас помалiс шöр школа. Гортын сюрлiс быдсяма удж. Олiсны скöтöн да турун пуктiгъясöн медыджыд пи нинöмысь эз öтдортчывлы, а гортгöгöрса быдлунъя удж йылысь и сёрни абу. Та вöсна быдмис ёнöн да винёлöн. Радейтiс физкультура урокъяс, котралiс лыжиöн. Школа помалöм бöрын велöдчис Пезмöгса училищеын, лоис трактористöн. Армияö веськалiс Киров обласьтса Юрья карö. Висьталiс, мый котралö лыжиöн да кык во сэсся дорйис часьтлысь нимсö быдсяма ордйысьöмъяс вылын. 
Кулöмдiнö воис 1969-öд воын. Сылы чуйдiсны, мый «Урожай» спорт котырö колö инструктор. Уджö босьтчис сьöлöмсянь и во мысти нин лоис котырöн юрнуöдысьöн. «Урожай» кывкутiс совхозъясын да леспромхозъясын уджалысьясöс спортö кыскöм вöсна. 1976-öд воын Николай Иванович уджысь орöдчытöг помалiс тренеръяслысь Москваса шöр школа. 1978-öд воын лоис районса спорт школалöн директорöн да уджалiс 1986-öд воöдз. Сэки воссялiсны юкöнъяс Помöсдiнын, Дереваннöйын да Кулöмдiнын. Челядькöд босьтчисны уджавны енбиа тренеръяс Н.Игнатов, К.Ульянов, И.Мишарин. Районса спорт школа век вöлi медбуръяс лыдын республика тшупöдын. Николай Ивнович серти, ыджыд вермöмъяс — бур велöдысьяс сайын, кодъяс кужисны ышöдны, сибыд сьöлöмнаныс сяммисны кыскыны челядьöс спортö да быдтыны наысь ыджыд сяма спортсменъясöс. Николай Иванович тшöкыда ветлiс видзöдлыны, кыдзи уджалöны местаяс вылын тренеръяс, векджык юöрттöг, да ставöн уджалiсны сьöлöмсянь. 
Кор сiйö вöлi спорт школаса директорöн, юкöнъяс воссялiсны Керчомъяын, Скöрöдумын, Носимын, Зимстанын да Немдiнын. Быдлаысь аддзисны жыръяс, вöчалiсны югзьöдöм котраланiнъяс. Спорт школа шедöдiс тöдчана вермöмъяс. Таын ыджыд пайыс тренеръяс Н.И.Игнатовлöн, И.Д.Пашнинлöн, И.Г.Мишаринлöн, И.Е.Тарабукинлöн. Налöн зiльöмöн спорт школаса öкмыс быдтас шедöдiсны спортса мастерлысь ним, а Помöсдiнысь Эмилия Мингалёва лоис лыжиöн сиктса котралысьяс пиын СССР-са чемпионöн. 
1987-öд воын Николай Иванович бöр бергöдчис профсоюзъяслöн физкультурно-спортивнöй котырö да уджалiс сэнi 1995-öд воöдз. Ветлöдлiс совхозъясö да леспромхозъясö, сёрнитiс веськöдлысьяскöд спортлöн коланлун да тöдчанлун йылысь, корис мöдöдны ордйысьöмъяс вылö. И найö век мунлiсны воча, сетлiсны транспорт, лэдзлiсны удж вылысь. Районса ордйысьöмъяс вылö чукöрмылiс 12 котырöдз. Кулöмдiнысь волейболысь ворсан котыр вöлi агитбригада кодь: сiйö ветлöдлiс районлöн быд пельöсö, ордйысьлiс верстьö йöзкöд. Ыджыд тöдчанлун спортлы сетiс районса власьт, отсалiс быдторйöн. 
Республикаса районъяс костын медтöдчана ордйысьöмöн лыддьöны ыджыд чукöртчылöм, кор спортсменъяс котралöны лыжиöн, лэпталöны гира, ворсöны пызанвывса теннисöн, шахматöн, шашкиöн, волейболöн. Медводдзаысь чукöртчылiсны 1990-öд воын да районса котыр лоис медводдзаöн. 1991-öдын — коймöдöн. 2018-öд воын вöлi татшöм ордйысьöмыс дас квайтöдысь. Ковмис 28 во, мед районсаяс лоисны коймöдöн. Николай Иванович серти, тайö висьталö сы йылысь, мый воддза спортсменъяс вöлiны ёнджыкöсь, йöзкöд удж котыртлiсны бурджыка. 
Öнi республикаыны мунö олöма йöзлöн спартакиада, и районса котыр, кытчö пырöны спортсменъяс, кодъяскöд уджавлiс Н.И.Напалков, 2017-öд воын лоис медводзын. 
1996-öд воын Н.И.Напалков петiс ас кöшта вылö — медводдзаяс лыдын босьтчис таксиставны. Машина руль сайын 22 во нин. Кор колö йöзлы, туйö петö водз асылын. 
— Ачым весиг ог эскы, мый меным 70, кыла ачымöс 50 кымын арöсаöн. Чайта да, кутö сiйö, мый томдырсянь спортын. Котралi лыжиöн, петкöдчи ордйысьöмъясын школа, училище, район да республика вöсна. Ас район вöсна петкöдчи и биатлон, шахмат, пызанвывса теннис да волейбол кузя ордйысьöмъясын. Пенсия вылö петöм бöрын спортысь, эг орöдчы, босьтчи ворсны пызанвывса теннисöн. 2013-öд воын аслам арлыдаяс пöвстын весиг верми республикаса ордйысьöмъясын. Век медводдза лыдын и районса котыркöд. Ог куритчы ни ю. Гажъяс дырйи кö юа öти-кык румка, тырмымöн. Та пыдди ветла ворсыштны теннисысь, ломтыла пывсян. Томдырсянь тöда удж да диван вылын телевизор водзын куйлöмыд меным сё мат. Кытчöдз эм вын-эбöс, колö легны, мыйкö вöчны. Мöд ногыс ме ог куж. Тайö, буракö, и кутöдыс. 
Николай Ивановичлы шойччöмыс — вöрö тшак-вотöсла ветлöм. Лунвыв оз кыскы. Томдырйиыс матö быд гожöм новлöдлiс спорт школаö ветлысь челядьöс шойччыны да ёнмöдчыны лунвылö. Тайö лоис пöтмöныс, öнi поезд вылас дыш весиг видзöдлыны. 
Николай Иванович, чайта да, шуда морт: сылöн вöлi сьöлöм серти удж, кодi сетiс нимкодьлун. Öнiя уджыс ньöти оз падмöд спортзалö ветлöм. Быдмисны ныла-пиа, эмöсь куим внучка да кык внук. Олöм мунö водзö. Мый нöшта мортлы и колö? 
Лидия ЛИПИНА. 
Николай Напалковлöн снимокъяс вылын: Н.И.Напалков; 1990-öд воын Айкатылаын республикаса фестиваль вылын районса котыр лоис медводзын.


Комментарии:

Добавить комментарий

Свежий выпуск: за 28 февраля