«Комилесбизнес» котыр «чужис» 1998-öд вося декабрын. Талун сы йылысь тöдöны оз сöмын районын, но и республикаын, странаын да суйöр сайын. А кызь во сайын ставыс пансис 20 морта котырсянь, «Урал» бензопиласянь да трелюйтчан öти тракторсянь. Котыр босьтчис уджавны вöвлöм Помöсдiнса леспромхозö пырысь Пузласа лесопунктлöн эновтöм уджалан базаын. «Комилесбизнес» пöрöдiс вöр, пилитiс тьöс-плака, вöчис пу шом. 
«Комилесбизнес» сöвмöдöмö тöдчана пай пуктiсны сылöн медводдза уджъёртъяс: Александр Георгиевич Мостовиц да сылöн котыр сетiсны вöр пöрöдан техника да мукöд оборудование, мый отсалiс заптыны да вöчны унджык вöр да пиломатериал. Найö жö ышöдiсны босьтчыны кутны туйяс. Буретш на отсöгöн Пузла-Крутая туй вуджöдiсны республикаса тöдчанлуна туйö, вöчисны да дзоньталiсны посъяс. Тайö сетiс позянлун петкöдны пиломатериал кöрт туй вылö да кыскыны котырлысь мукöд туйвизь сöвмöдöмö содтöд сьöм. 
Ыджыд воськолöн лоис 2002-öд воын Пузласа лесничествоын вöр юкöн кöртымö 10 во кежлö босьтöм, кытысь воöн позис пöрöдны 128 сюрс кубометра вöр. Тайö сетiс аскиа лунö зумыд эскöм. 
Котыр топыд йитöда сбербанклöн Кулöмдiнса юкöнкöд. «Комилесбизнес» районын медводдзаяс лыдын пыртiс «Клиент-банк» электроннöй документöн удж. Тайö öддзöдiс вузасьысьяс да ньöбасьысьяс костын вештысьöм, лоис позянлун вöдитчыны валютаöн, вексельясöн, унасикас кредитъясöн. 
Тöдчанаöн лоис 2004-öд во, кор котырлöн уджъёртöн лоисны Исландияысь бизнесменъяс. Инвестор Йон Хельги Гундмундсонкöд воис ыджыд сьöм. Вежсис уджаланног: бырис сьöкыд кипом удж, вöр босьтчисны заптыны харвестеръясöн да форвардеръясöн. Вужвыйöн выльмöдiсны вöр кыскан да туй вöчан-дзоньталан техника, вöр пилитан оборудование. Котыр босьтчис вöчны кыскасян туйяс, мый сетiс позянлун заптыны да петкöдны вöр во гöгöр чöж, а сiдзжö кутны миртуйяс. 
Ыджыд воськолöн сiдзжö лоис Верхнеижемскöй станцияын кöрт туй терминал ньöбöм. Тайö кадсянь вöр позис нуны во гöгöр чöж эз сöмын республикаö да Россиялöн регионъясö, но и петны Европалöн да Азиялöн рынокъяс вылö. Тайö жö воын «Комилесбизнес» вайöдiс ассьыс уджаланног мирса корöмъясöн урчитöмторъяс тшупöдöдз да босьтiс FSC сертификат. Сылöн медшöр куим (экономика, вöр-ва видзан да социальнöй) подулö кутчысьöм сетiс позянлун вöчны ыджыд воськов уджын да сьöмöн вöдитчöмын. Социальнöй туйвизь лоис котырлöн медся тöдчанаяс пиысь öтиöн. 
Пузлаын дыр эз вöв бур электроэнергия, и тайö ёна падмöдiс котырлысь удж. 2007-öд воын энергетикъяс «Комилесбизнес» отсöгöн вöчисны Вöльдiн-Пузла би визь. 
Талун котырын 151 морт, на пиысь 76-öн уджалöны волöмöн. Уджаланiнлöн ыдждаыс 75466 квадрата метра. Сiйöс кытшовтiгöн гöгöрвоан, мый ставсö вöчöма бура уджалöм могысь. Танi эм техникалы шоныд гараж, кытчö тöрöны и школалаöн автобус да би кусöдан машина. Токаралö В.В.Игнатов. Техника вöсна кывкутöны механикъяс А.Г.Цулаия да М.Н.Слепнёв. Жугалас кö мыйкö, эм шоныд вöчасянiн. Дзоньтасьöны асьныс водительяс, отсалöны механикъяс. Танi жö дзоньталöны кöлесаяс да сваритчöны. Талун кежлö «Комилесбизнеслöн» 22 техника: гидроманипулятора вöр кыскан машинаяс, пиломатериалъяс новлысьяс, самосвалъяс, грейдеръяс да К-701 грейдозер, экскаваторъяс, бульдозер, пилитчанiнын да сортиментъяс тэчанiнын форвардеръяс. Вöр пöрöдöны кык комплексöн (кык харвестер да кык форвардер). 
Эм пилаяс лэчталанiн да лöсьöданiн, сэнi станокъяс. Бур-ö лоас пилорама вылын лэдзöм плака, тшöтш и пилаяслöн лэчыдлун сайын. 
Öткымын оланiнысь öтдор, быдлаö шоныд воö ломтысянiнсянь, кöнi öта-мöднысö вежлалöмöн уджалöны нёльöн. Кольöм воын вежисны пач, сувтöдiсны ёнджыкöс. Ломтысьöны тьöс-плака помъясöн, кодъяс кольöны пилитчигöн. Найöс дасьтöны вочасöн чипасъясö тэчöмöн, водзвыв ставыс косьмö. Ломтысянiнын уджалысьяслы лöсьöдöма торъяс жыр, кöнi лöнь, оз кыв насосъяслöн жургöм. Танi жö сулалаö монитор, кытчö воö база гöгöрын сувтöдалöм видеокамераяссянь серпас. Ломтысьысьяс и база бöрся видзöдысьяс. 
«Комилесбизнеслöн» талун кежлö вöр пилитан кык цех. Öтисö восьтiсны 2015-öд вося декабрын. Тайö ыджыд воськов водзö, сы вöсна мый лоис позянлун пилитны вöсни керъяс, кодъяс водзтi мунлiсны баланс вылö. Пилорама дорын и пытшкас некыт абу тырöма, ставыс ас местаын. Вайöм вöр лэптöны да кыскöны пилитанiнö. Таöн веськöдлö öти морт. Сылы экран вылын тыдалö ставыс: и пырысь кер, и пилитöм, и пилипызь киссьöм. Шоныдiнын пукалöмöн, кнопкаяс личкалöмöн öти оператор вöчö уджсö матö нёль мортлысь. Пилипызь да гöрбыль форвардерöн нуöны торъя чукöртанiнö. Тьöс-плака тэчöны пачкаясö да кöртавлöны. Торйöдöны кузьта да пасьта серти, а сiдзжö сы серти, кутшöм пуысь пилитöма — козйысь ли пожöмысь. Гожöмнас тайö пачкаяссö кад кежлö вöйтлöны сораса ыджыд ваннаö, мед сiйö эз бакшась да лöзöд, эз сёй гаг. 
Дась чукöръяс сöвтöны вöр кыскан машинаяс вылö. Найö аслыспöлöсöсь: медым сöвтчыны вöлi кокниджык, абуöсь бокиса кутöдъяс. Ставсö зэлыда кöртавлöны да некор на эз киссьывлы. Тьöс-плака нуöны Верхнеижемскöй станция вылö. 
Вöр пилитанiнъяс уджалöны кык сменаöн шойччан лунъястöг. Луннас лэдзöны 70 гöгöр кубометр, тöлысьнас 2000. Удж чиныштлö гожöмнас да рöспутаяс дырйи, но дзикöдз некор оз сувтлыны. 
Ылöсалöмöн, таво котыр заптiс 110 сюрс кубометр вöр. Став тшупöдын сертифицируйтöм удж сетiс позянлун вузавны вöчöмтор суйöр сайö. «Комилесбизнес» уна во нин ёртасьö Латвиякöд, сэтчö мунö тьöс-плака. Таво вузалiсны 18096 кубометр. Миян кö вылöджык донъялöны пожöм, то Латвияын окотапырысьджык да донысьджык ньöбöны козйысь вöчöмтор. 
«Комилесбизнесын», кыдзи пасйи нин, джынсьыс муртса этшаджык морт уджалö бокиысь кад кежлö волöмöн, кызвыныс ас районса йöз. Вель унаöн уджалыштöм бöрын локтiсны Пузлаö да овмöдчисны семьяясöн. Тайö котырын уджалысьяс кутчысьöны, öд танi ас кадö вештöны бур удждон, а кад кежлö волысьяслы лöсьöдöма бур оланiн, быдöнлы вичмöдöны уджалан паськöм. Олöны 2-4 мортöн балокъясын да керкаясын. Балокъясын пачьяс, керкаясö шоныд воö ломтысянiнсянь. Эм куим пывсян, кодъясöс ломтöны кор окота. Тыдалö уджалысь мортöс пыдди пуктöм. Та вöсна и кутчысьöны, тöдöны, мый бурджык уджаланiн öдвакö кытыськö сюрас. 
Ыджыд пöв вылö пасъялöны, уна-ö пöрöдiсны комплексъяс, петкöдiсны, пилитiсны. Ставыс синъяс водзын. Вöчöма кö этшаджык, сёрнитöны, мыйла тадзи лоис, да пуктöны водзö вылö могъяс. 
«Комилесбизнес» нималö и аслас вердчанiнöн, кöнi уджалö вит пусьысь. Удж вылö найö локтöны нёль час асылын, медым квайт час кежлö вöлi нин пöсь сёян. Рытнас тупкысьöны 8 часын. Татчö волöны оз сöмын котырын уджалысьяс, но и Пузласа олысьяс, сы вöсна мый танi век эм чöскыд пöжас. 
«Комилесбизенес» талун — районын медгырысь зумыда сулалысь котыръяс лыдысь öти. Сыкöд ёртасьöм вылö донъялiс «Вöльдiн» овмöдчöминса юралысь И.А.Андриевская: 
— «Комилесбизнес» вичмöдö овмöдчöминлы донъявны позьтöм отсöг. Буретш сiйö кутö Пузла-Ягкöдж туй, код кузя быд лун новлöдлöны челядьöс школаö. Сiйö отсалö гырысь гажъяс нуöдiгöн. Öнi вичмöдiс Пузласа клуб дзоньталöм вылö пиломатериал. Котырöн веськöдлысь Александр Светозарович век мунö миян корöмъяслы воча. Став сьöлöмсянь чолöмала «Комилесбизнесöс» гöгрöс пасöн. Сиа уджын ыджыд шедöдöмторъяс, ясыд аскиа лун, пуктан могъяс олöмö пöртöм. 
«Комилесбизнес» котырöн 20 во нин веськöдлö Александр Светозарович Игнатов, Пузлаын чужöм-быдмöм морт. Сылöн кывъяс серти, 90-öд воясын босьтчигöн вöлi сьöкыд. Ёнакодь мöрччис мирса экономикалöн 2010-2013-öд воясся кризис, сы вöсна мый котырлöн 67 процентыс — суйöрсайса капитал, и вöчöмторйыс кызвыннас мунö сэтчö жö. Котырлы тöдчана лунö А.С.Игнатов пöся чолöмалö танi уджалысьясöс: 
— Пыдди пуктана öнiя да вöвлöм уджалысьяс! 
«Комилесбизнес» чужис 1998-öд вося декабр 23-öд лунö. Талун ми пасъям сылöн котыртчöмсянь 20 во. Миян серти, тайö сэтшöм арлыд, кор чöжсис ыджыд сям. Талун бизнес сöвмöм вылö эм став коланторйыс: выль ногöн вöр заптöм, новлыны вöр да пиломатериал автопарк, вöр пилитан ён цехъяс, техника дзоньталанiнъяса ыджыд производственнöй база, туйяс вöчан-дзоньталан юкöн, пиломатериал мöдöдöм вылö кöрт туй терминал, и волöмöн уджалысьяслы посёлок, сёянiн, вузасянiнъяс, нянь пöжаланiн. Ми томöсь, збодерöсь, миян эмöсь выль мöвпъяс, и миянлы быдмыны водзö! 
Чолöмала тiянöс, котырса дона уджалысьяс, тайö мича, тöдчана лыдпасöн! Миянöс öтувтiсны выль балаяс, выль могъяс да ыджыд кöсйöм пöртны найöс олöмö, кыдзи öнiяясöс, сiдзи и дыр кежлö урчитöмъясöс, котырлöн аскиа лун вöсна ыджыд кывкутöм. «Комилесбизнеслöн» водзö сöвмöмыс да могъяс олöмö пöртöмыс — котырлöн öтувъя удж сайын. Ми унатор вöчим да асланым кывкутана уджöн вайим котырлы уна бур. Öнi «Комилесбизнесын» зiльöны уна том йöз, кодъяс быдмöны котыркöд тшöтш да петкöдлöны бур уджалан сям. 
Шоныд чолöмалан кывъяс висьтала воддза уджалысьяслы, кодъяс öнi шойччöг вылынöсь, да налы, кодъяс, арлыд вылö видзöдтöг, зiльöны и öнi, алсланыс бур уджöн петкöдлöны томъяслы ыджыд сямлунлысь, кывкутöмлысь, уджö сьöлöмöн сетчöмлысь пример. 
Мед миянлы ставнымлы бура уджавсис, мед быдöн локтiс удж вылö нимкодь сьöлöмöн! 
Александр Светозарович серти, медым сöвмыны водзö, котырлы быть колö пыртны уджö выль уджаланног, пöртны олöмö ас водзö сувтöдöм могъяс, кужны «видзöдлыны» аскиа лунö да пытшкöсöн аддзыны, мый лоас водзö. И нинöмысь не повны. 
Гöгрöс паскöд йитöдын котырын уджалысьясöс пасйисны районса администрациялöн, министерствояслöн да ведомствояслöн пыдди пуктана грамотаясöн. 

Лидия ЛИПИНА. 
Гижысьлöн да котырлöн чукöртöмысь снимокъяс вылын: директоръяслöн сöвет, 2008-öд во, Рига (медводдза радын шуйгавывсянь мöдыс Й.Х.Гундмундсон, коймöдыс А.С.Игнатов, веськыдвылын сулалö «Комилесбизнес» котырысь главнöй бухгалтер В.А.Кипрушев; тадзи уджалöны öнi; тайö пиломатериалыс мунас Латвияö; котыр вöчö туй.