Мам

Мам. Тайö кывсö кага шуö аслас олöмын медводз. Сöмын тай мыйлакö эмöсь сэтшöм мамъяс, кодъяслы челядьныс дзик веськодьöсь: мамлöн небыд кияс пыдди кагукъяс кылöны зутшкöм ли вачкöм, чöскыд пирöг-шаньга пыдди пызан вылын кос сукар, оз вичмывлы мича паськöм. Код тöдас, кымынысь мыссьылöны ичöтъяс курыд синваöн, кымынысь пыдзыртлö ичöтик сьöлöмнысö шог. А öд найö чужöны нимкодясьöмöн, виччысьöны верстьöсянь муслун. И эмöсь ыджыд сьöлöма йöз, кодъяс шымыртöны шоныд сывъясаныс оз сöмын ассьыныс, но и йöзлысь челядьöс.

Талун ме кöсъя висьтыштны Дереваннöйысь Елена Васильевна Булышева йылысь. Сійö – овмöдчöминса юралысь, а нöшта уна челядя мам. Дас öти кагаысь аслас сöмын медводдзаыс, сэсся ставыс босьтöм. Кутшöм тöжд-могъясöн олö Булышевъяслöн ыджыд семья, мыйла гозъялы та мында челядьыс, кыдзи нывбаба сяммö йитны зэв кывутана удж да семьякостса олöм – тайö да нöшта унатор йылысь висьталіс Елена Васильевна.

Висьöм

Дереваннöйын чужис-быдмис Алёна нима нывка. Котраліс школаö, нинöмöн эз торъяв мукöдъясысь. Помаліс школа, пырис велöдчыны Сыктывкарса педучилищеö. 21 арöсöн чужтіс пиöс, пуктісны Тарас ним. Дзоля кагалы вöлі кык тöлысь, кор мамыс чорыда висьмис. Юрсиктса бурдöдчанінысь врач шуис верöсыслы, мый Алёна öдвакö бергöдчас, а ловзяс кö, коляс оз тыр сюсьöн, гашкö и, куйлыны кутас нэм помöдзыс. Том мортлы тайö, дерт, нимкодьлун эз вай. Пи вöснаыс эз тöждысь – сійöс видзис Алёналöн мамыс, но и виччысьны гöтырлысь бурдöм ли кулöм эз кут, сыліс-вошис налöн олöмысь.

Некод эз чайт, мый ныв бурдас. Алёналысь сьöлöмсö бурмöдіс сöмын öтитор: мамыс сяммас сувтöдны Тарасöс кок йылö, та йылысь тöждысьны оз ков. Нöшта шуліс: кула кö пö, баянöс нуöй менам класса челядьлы. Но кувны эз жö на вöв окота. Вежöрас бергöдліс ыджыд мамсяньыс кывлöм буркывъяс да кевмысис Енлысь. Тöлысь куйліс чеччывтöг, колис куш лыыс да кучикыс. Шуда на вöлöма Алёна – веськаліс зэв бур врач Тамара Александровна Суриналöн киясö, коді и бергöдіс нылöс мöдар югыдсьыс.

Ас вежöрö воыштöм бöрын Алёна босьтчис сьывны. Мед кö медводдза лунъясас артмис киргöм, но сьыліс. Вочасöн гöлöсыс ёнмис, кутіс бурдыштны и ань. Бурдöдчанінысь лэдзигöн вочаалiс мамыс, гортас кайисны «Заря» теплоходöн. Ныв куйлігöн сэтшöма эбöстöммис, мый чойяссö мамыс отсöгöн ковмис кайны бауöн.

Гортад пö и стенмыд бурдöдö. Алёна вочасöн сувтіс кок йылö. Велöдіс Ручын ичöт класса челядьöс, йöзлы да зонпоснилы лоис Елена Васильевнаöн. Уджысь орöдчытöг босьтіс вылі тшупöда тöдöмлунъяс. Сессия вылö ветлігъясöн Тарасöс видзис Алёналöн мамыс. Тадзи и кургисны-олісны, но том ань зэв кöсйис нöшта ассьыс челядьöс. Мамыслы шуис: ог кö пö 30 арöсöдз вай, босьта детдомысь.

«Енмöй, сет батьöс!»

Со и 29 арöс тырис, 30 кутіс матыстчыны. Ас челядь урчитöм кадöдз эз лоны. Öтчыд Алёна видзöдіс телевизор. Сэні петкöдлісны детдомса челядьöс. Сёрнитіс пиыскöд, коді велöдчис коймöд классын, сійö эз пыксьы, мед гортаныс котраліс нöшта чой либö вок. Ань лэччис карö. Опека юкöнын сылы петкöдлісны фотографияяс. Öти вылын вöлі нюмъялысь нывка – вожа ныра, посньыдик пиньяса, юрси вылас ыджыд тугъяс. Тайö пö Каролина. Сьöлöмыс шуис: босьт, тайö тэнад. Аддзысигöн нывка пыр и уськöдчис Елена Васильевна дорö. Сэки вöлі сэтшöм кад, мый Каролинаöс сетісны пыр жö, документъястöг (чукöртіс да мöдöдіс сёрöнджык). Автобусысь петöм бöрын нывка уськöдчис Алёналöн мам дорö, чеччыштіс морöс вылас, сывйыштіс голяöдыс да шуис: «Бабушка!»

Нывка тшöкыдакодь юасьліс выль мамлысь, мыйла налöн абу батьныс да рытъяснас кевмыліс: «Енмöй, сет миянлы батьöс!», кöть эськö таö сійöс некод эз велöд. Кыдзи висьталіс Елена Васильевна, сійö пö, вöлöм, олö орччöн, дзик стен саяным, кык патераа керкалöн мöдар джынъяс. Михаил дзик пыр лоис налöн семьяын ас мортöн, челядь регыд и кутісны шуны сійöс батьöн.

Квайтöд классын Каролина тöдмаліс, мый Елена Васильевна оз ло сылы збыль мамöн. Ковмис висьтавны, кыдзи нывка веськаліс Дереваннöйö. Сідзжö висьталіс, мый сылöн нöшта эм вок, и олöны найö Луздор районын. Каролина зэв сьöкыда босьтіс сьöлöм дорас тайö юöрсö, «тупйысис» ставсьыныс, тыдаліс, мый юрас бергалiс уна сьöкыд мöвп. А сэсся корис нулыны вок дорас. Елена Васильевна тöдіс, мый Каролиналысь воксö босьтлiсны жö мам дорсьыс, сідзжö быдмис мöд семьяын. Пуксисны машинаö да мунісны Луздор районса сиктö. Улича вылысь аддзисны зонкаöс да юалісны, кöні олö сэтшöмтö ним-ова кага. Тайö пö ме, вочавидзис сійö. Тадзи и аддзысисны чоя-вока.

Пыж ныр кутысь

Öтчыд Елена Васильевна вöтасис: воссис öдзöс да пырис зонка, киас кутö сись. Верöсыс шуис, мый колö пö нöшта пи, «пыж ныр кутысь». Димаöс аддзисны Ухтаысь, челядьлöн «Гнёздышко» керкаысь. Медводз бöрйисны фото серти. Михаиллы сьöлöм вылас воысь зонка йылысь позис шуны, мый сійö, буракö, радейтö вильшасьны: збой синъяса, шырöм юрсиыс сувтса. Туйö петісны апрель помын. Мед удитны поезд вылö, шуисны веськыдавны Аныб пыр. Кор матыстчисны ю дорö, сьöлöмныс ыркнитіс – йиыс дзик нин лöз, кыдзи таті вуджны машинаöн?Мöдар берегö воисны пернапасасьöмöн да молитва лыддьöмöн, кутчысьöмла брöд пöсялöмöн. Мöд луннас звöнитісны – йиыд пö кылаліс. Ухтаын на дорö петкöдісны фото серти бöрйöм Димаöс и … гозъя шемöсмисны: на дорö петіс кузьсьыс-кузь син лысъяса мичаник зонка. Ми пö вöйим сылöн синъясö, висьталіс Елена Васильевна. Зонка медводз сибöдчис ань дорö. Тадзи нывбабалöн лоис мöд муса пи. Садъяс зонкалысь юалiсны, кыдзи сійöс шуöны гортас. «Мушпожем» пö (муспозöн, сідзкö). Дима быдмис шаньöн. Булышевъяс эскöны Енлы, ветлöны вичкоö, висьтасьöны да даръясьöны, таö велöдöны и челядьöс. Дималы тайö ставыс лоис зэв матыс. Квайтöд класс бöрын зонкаöс мöдöдісны велöдчыны Сыктывкарö искусствояслöн гимназияö. Сійö ичöтсяньыс радейтіс петкöдчыны ворсöмöн, и Елена Васильевна чайтіс, мый сылысь енбисö бурджыка восьтасны карын. Зон велöдчис гимназияын куим во театральнöй юкöнын. 10-öд классö вуджигöн коліс выльысь сдайтны филология, а Дималы ёнджыка сетчис математика. Сiйö бöр локтіс гортас. Öні мам жалитö, мый мöдöдіс писö бокö: векжö пö бурджык, мед ныв-пиыд быдмисны орччöн, аслад видзöдлас улын. Дима карын ёна вежсис, и öні бать-мамлы колö пуктыны вын, мед бара велöдны пиöс овны семьяын, öтув.

Асшöр олöмö

Кор Каролина велöдчис квайтöд классын, Булышевъяслöн семья бара содіс – челядьлöн Зимстанса керкаысь босьтісны Сашаöс, кодöс нулісны сэтчö Ручысь. Öти классын и велöдчисны сэсся чоя-вока. Нырччысьöсь, водзмöстчысьöсь, найö сьöлöмсянь пырöдчисны школаса олöмö, быдлаын зілисны лоны медводзын.

Школа помалігкежлö коліс мöвпавны, кöні кутасны велöдчыны Каролина да Александр. Елена Васильевна кöсйис, мед ныв лоис бурдöдысьöн, а Сашалы вöзис велöдчыны полицияса уджалысьö. Öти лунö Елена Васильевна пиыскöд мöдöдчисны Кулöмдінö, медым босьтны полицияысь МВД-лöн Улыс Новгородса академияö велöдчыны пырöм могысь гижöд. На дорö «сирасис» Каролина, ме пö ветла тiянкöд гаж пыдди. Лоис сідзи, мый гижöд сетісны нывлы, а Саша эз вермы вуджны колана урчитöмторъяс. Гортаныс бать-мамысь да нылысь кындзи бöръя здукöдз некод эз тöд, кытчö збыльвылас кöсйö пырны Каролина. Висьталісны сöмын сэк, кор ныв аддзис ассьыс ним-овсö студентъяслöн лыдысь. Мамлы вöлі нимкодь и шог. Нимкодь, мый нылыс сяммис вуджны сы ыджда конкурс, шог, мый колö лэдзны сойборд увсьыд ассьыд кагатö.

Каролинаöс колльöдігöн поезд вылö пуксьöдтöдз Елена Васильевна корис прöща, мый быдтіс нылöс зэв стрöга. Сійö, мамыслöн синъясö видзöдöмöн, лöниника шуис: «А татöг ме эськö эг ло сэтшöмöн, кутшöм эм». Ырзöмöн сэк бöрдіс Елена Васильевна поезд бöрся котöртігмоз. Сэкжö аттьöаліс Енмöс, мый сетіс сылы татшöм нылöс.

Кольöм воын Каролина помаліс велöдчöм да муніс Севастопольö, уджалö участкöвöйöн, водзö вылö кöсйö веськавны уголовнöй розыскö. Мамыс ветліс видзöдлыны нылыслысь выль оланін. Сылöн ставыс бур, и таысь Елена Васильевналы зэв нимкодь.

Александр пыраліс велöдчыны Сыктывкарса университетлöн физкультура да спорт факультетö. Мыйкö абу сдайтöма ас кадö да нёльöд курсын велöдчöмсö шыбитіс. Ветліс армияö, öні Сыктывкарын, корсис удж. Елена Васильевна гöгöрвоö, мыйла сійö эзджык кут волыны гортас: буракö пö, яндысьö, мый эз помав велöдчöм, кöть эськö бать-мам öти кывйöн эз лёкöдны сійöс, öд быд мортлöн аслас туй. Булышевъяс эскöны, мый налöн туйдöм-велöдöм оз вош, сійö эз ло весьшöрö, и Сашалöн олöмас водзö лоас ставыс бур.

Дзик батьыс кодь

Опекалöн да попечительстволöн районса юкöнын бура нин тöдісны Булышевъяслысь семьяöс да вöзйисны босьтны Эдикöс. Висьталісны, локтöмаöсь пö весиг кытыськö Москваысь, зонка öні öтнас. Юасисны, тöдмалісны, коді сэтшöмыс. Вöлöмкö, Эдик лоö водзті босьтöм Сашалы рöдвужöн. Аддзысигöн зонка матыстчис Михаил дорö, сибöдчис кокъяс дорас. Айловлöн сыліс сьöлöмыс. Ичöт классын велöдчигöн «Кыдзи тэнö шуöны?» юалöм вылö зонка вочавидзліс: «Эдуард Михайевич» (кöть эськö ачыс Иванович).

Дима кö лоис мамлöн, то Эдик – ёнджыкасö батьлöн пиöн, пыр вöтлысис сы бöрся бöж моз. Окотапырысь ветлывліс батькöд кыйны чери, вöравны. Кыдзи и колö семьяын, бать велöдö пиöс айловлöн быдпöлöс уджö, тшöтш и гортгöгöрсаö. Та вöсна Эдик окотапырысь ломтö пывсян, тöвнас весалö лым, пыртлö гортö пес, ставсö вöчö индавтöг да тшöктытöг.

Юля, Эля, Тася

Елена Васильевналы коркö звöнитіс тöдсаыс да висьталіс, мый Куратовоын тыр арлыдтöмъяслöн приютö веськаліс зэв бур нывка. Сылы пö эськö колö семья, детдомын кага вермас вошны. Тадзи Булышевъяс дорö веськаліс Юлия. Нывка зэв аслыспöлöс, и Елена Васильевналы ковмис небыдика корсьысьны сылöн сьöлöм дорö туй. Ёна отсаліс сійö, мый Юлиялы бур примерöн лоис ыджыдджык Каролина. Быд мам, дерт, ошкö ассьыс кагасö, но Елена Васильевна серти, колö на корсьны Юля кодь кывкутысь мöд сэтшöм мортöс. Тайö нылыслы (öні велöдчö 11-öд классын) позьö урчитны кöть кутшöм удж да тöдны, мый ставыс лоö сідзи, кыдзи колö. Дерт, семьяын овлö быдторйыс, и кор челядь асныралöны, мам гöгöрвоöдö мывкыд сетан дженьыдик висьтъясöн.

Öтчыд Елена Васильевна Кулöмдінö аслас могъясöн волігöн пырис опека да попечительство юкöнö. Тэнö пö ачыс Енмыс миян дорö ыстіс, — шуисны сэтчöс уджалысьяс да вöзйисны 16 арöса Эльвираöс. 16 арöсаыд абу ичöт кага – сылöн аслас этш, олöм вылö видзöдласъяс. Мытшöдыс вöлі уна, ёна ковмис сёрнитны, унатор гöгöрвоöдны: сійö нырö ассьыс, а бать-мамлы колö бергöдны ас ногöн. Эльвира небзис, «воссис», воськовтіс воча.

2018-öд воын Дереваннöйын сотчис керка. Сэні кувсис ань, и 15 арöса Таисия колис öтнас. Елена Васильевна верöсыскöд корисны сійöс овны ас дорас. Сэкжö нывкаöс кöсйис босьтны рöдвужыс. Тася кольччис Булышевъяс дорö. Ыджыд керкаын нывлöн лоис аслас жыр.

Юлия, Таисия да Эльвира вежласьöмöн пусьöны, пелькöдчöны, мыськöны тасьті-пань, видзöдöны поснияс бöрся. Мöд ногыс ыджыд семьяын некыдзи, ставсö öд мам вылö он öшöд. Нывъяс гöгöрвоöны, кывзысьöны, гортса уджысь оз ыръянитны.

Маргарита

Маргаритаöс аддзисны Воркутаысь. Куим арöса кага «чукöстчис» Булышевъяслы фото вывсянь, кодöс аддзисны интернетысь батьтöм-мамтöм челядь йылысь юöртан кудйысь. Мунісны тöдмасьны. Нывка шашаритчис Елена Васильевна дорö да эз кöсйы лэдзны. Вир синваöн бöрдіс нывбабалöн сьöлöмыс янсöдчигöн, öд кагаöс босьттöдз коліс чукöртны да вайны документъяс. Кыдз-мый öдйö вермисны, лöсьöдісны колана бумагаяс. Лунъяс öдва колисны, öд и öтчыд аддзысьлöмöн ичöтик Рита лоис дзик асланыс кагаöн. Пыр мöвпалiс, кыдзи сійö сэні сытöг, оз-ö кодкö дойдав.

Мыйта ковмöма терпитны аслас дженьыдик олöмöн тайö нывкаыслы, Елена Васильевна да Михаил Юрьевич тöдмалісны сылöн личнöй делöысь. Гозъялöн юраныс бергаліс öти мöвп: позьö öмöй тадзи кагаыскöд?!

Маргарита быдмö сюсьöн, збойöн, зэв сибыдöн, мукöдöс жалитысьöн. Сэкжö тыдалö, мый и сылы бать-мамсянь радейтöмыс колö вывті ёна: луннас сёысь юалас, радейтöны-ö сійöс. А мам да бать сёысь жö вочавидзöны, мый нывка – налöн шöвк туг, медся муса да радейтана кага. Маргарита мичаа йöктö, мамыскöд рифмаясысь ворсігöн артмöны дженьыдик кывбуръяс.

Елена Васильевна эскö, мый воас кад, кор нывка дугдас садьмыны войнас аслас лёкысь горзöмысь. Мый колис пыдö-пыдö вежöрас дзолядыр йывсьыс Маргариталöн, код тöдас, но ань лыддьö, мый лоас бурджык, лёк казьтылöмъяс кö дзикöдз вошасны-сыласны, и кольöмыс некор оз дзерöд нылуксö.

Чипанпиян

Быттьöкö и тырмымöн нин Булышевъяслöн челядьыс, а Михаил коркö шöпнитіс гöтырыслы, вай пö нöшта öтиöс босьтам, сöмын ичöтикöс. Елена Васильевналы кыкысь шуöм эз ков, паныд верöслы эз мун – босьтам кö и, босьтам. Бара жö медводз бöрйисны фотография серти. Пемыдлöз ыджыд синъяса ичöтик Али вöрзьöдіс сьöлöмнысö. Детдомын зонкакöд орччöн котраліс сэтшöм жö кымын арлыда мöд кага, и сэтшöм мича да муса! Юалісны воспитательлысь, коді сэтшöмыс. А сійö нориника шуис: «Тайöс некод оз босьт». Вöлöмкö, Рома коркö ичöтдырйиыс ас вылас кисьтöма пöсь, сöмын на пусьöм пельнянь. Сотчалöма ставнас, абу веськалöма сöмын чужöмас. Эз вермыны Булышевъяс кольны зонкаöс, и тадзи Дереваннöйö воисны öтлаын Али да Ромка. Налöн локтöмöн керка тырис шуда серамöн, ворсöмöн, гажöн, коді овлö сэк, кор сэні олöны посни челядь. Зонкаяс пыр öтлаынöсь. Гожöмнас пö пырöмаöсь картупель град вылö, мунöны визь костіыс, тыдалöны сöмын шондіысь чышъяналöм юръясныс. Быттьö кык чипанпи, варгыльтöны-пышйöны кытчöкö. Сильöпиян моз жö сьöрсьöн-бöрсьöн пырöны пывсянысь, банйöмаöсь батьыслöн пывсьöдöм-корöсялöм бöрын.

Выль во водзвылын Булышевъяс дорö быд во волö Кöдзыд пöль, вайö челядьлы козинъяс. Кодлы мый колö, нывкаяс да зонкаяс гижöны водзвыв письмöын да сюйöны кöмкотаныс. Гырысьджыкъяс, дерт, гöгöрвоöны, коді збыльвылас Кöдзыд пöлялö, да оз вывтіасьны корöмъясöн. А сэсся нин Елена Васильевналöн да Михаил Юрьевичлöн мог, мед кöсйöмторъясыс челядьлöн збыльмисны. Нокыс, дерт, уна, но гозъялы медыджыд шуд – аддзыны ныв-пиныслысь шуда синъяс. 12 час бöрын ставöн петöны ывла вылö лэдзны енэжö дзирд. Уна нимкодьлун вайö и лотерея, кодöс нуöдöны асьныс.

Быд гожöм Булышевъяслöн ыджыд семья ветлö шойччыны войколöн вöр-ваö. Пусьöны бипур вылын, узьлöны палаткаясын. Кыйöны чери, ворсöны, вермасьöны, перйöны корöсь да вотчöны. Тадзи гозъя велöдöны челядьöс венны сьöкыдлунъяс, кутчысьны вöр-ваын. А кутшöм лöсьыд сёрнитны гусяторъяс йылысь рытнас бипур дорын, мам дорö сибöдчöмöн.

Зэв гажаа кольöны чужан лунъяс, öтув дасьтысьöны гажъяс кежлö. Челядь оз вунöдны и бать-мамлысь венчайтчан лун.

Челядь – медся ыджыд шуд

Ме кори Елена Васильевнаöс юксьыштны аслас олöмысь гусяторъясöн. Со мый сійö висьталіс:

— Мый кöдзан, сійöс и босьтан. Томдырйи век кöсйылі, мед менам вöлі ыджыд семья. Синъяс водзын сувтліс серпас: кузь-кузь пызан сайын пукалöны верöс да вит челядь, ме пöжася. Позьö шуны, мый мöвпъясöй збыльмисны. Эм ыджыд керка, кытчö тöрам ставöн, эм верöс, челядьöй 11. Нинöм ог шу, сьöкыд, но сэкжö мöд олöм меным оз ков. Быд выль кагаöс босьттöдз чукöртчам ставöн да сёрнитам, верöскöд висьталам, мый регыд семьяын лоас выль олысь. Некор на эз шулыны, мый оз ков. «Ассьыным» каганымöс ми Михаилкöд тöдмалам фото сертиыс. Тырмымöн öтчыдысь видзöдлыны, и сьöлöмыд ёкмунö. А сэсся войяссö он узь: кыдзи сійö сэні тэтöг, öтнас? Кутшöм эськö бур, вöлі кö сійö öні орччöн. А, гашкö, кодкö дойдалö кагуксö? Терпитны он вермы, сьöлöмыд доймö дзик на тöдтöм, но аслад нин кага вöсна.

Ми верöскöд торъялам – ме стрöгджык, Миша небыдджык (ачыс быдмылöма уна челядя семьяын), но челядьöс быдтöмын, олöмас туйдöмын век öти кывъяöсь. Челядьöс оз ков велöдны мырдöн, найö кызсö босьтöны бать-мам вылö видзöдöмöн. Тэ кö зіль, и челядьыд оз дышöдчыны, гортын вöчасны урчитöмторъяс. Дерт, быдторйыс овлö, но век дорйö сьöлöмсянь сёрни. Ме кö пукала челядь пиысь кодкöдкö пусянiнын, ныр уланым чай, сідзкö, миян гуся сёрни, некод оз сюйсьы. Ёна отсалö, кор кутшöмкö лоöмтор вылö он скöрав да пинясь, а бергöдан серамвыв. Сэки ставлы кокни сьöлöм вылын, а мыжмöм морт и пинявтöг ставсö гöгöрвоö да мöдысь сэсся татшöмтор оз вöч.

Öтчыд Иван Васильевич Нестеров шуис, ті пö сьöкыдлунсьыс вöчанныд шуд. Но медым тайö артмис, колö мунны пыр водзö. А он кö вермы водзöсö мунны, колö водны да кöть нин куйлöмöн, но водзланьыс видзöдны. Ыджыдсьыс-ыджыд аттьö Галина Николаевна мамлы, коді уна во велöдіс Дереваннöйын ичöт класса челядьöс. Мам да ыджыд мам век велöдісны лоны йöз дорö восьса сьöлöмаöн, сетны колігъясöн вермана отсöг, венны сьöкыдлунъяс. Шулісны: эн лэпты ачыд асьтö вылö, Енмыс ачыс аддзас, кор, кыдзи да кöні тайöс вöчны. Мамлöн «Верман!» кывйыс век на пельын. Кор усьлас лолöй, зэв öдйö сылысь «вермансö» кыла, и тайö сетö вын восьлавны водзö. Мам квайт во нин абу ловъя, но век на сыысь вежавидза, мед эськö ог янöд сылысь югыд нимсö.

Ми велöдам челядьöс вöчны йöзлы бур. Лёк вылö оз позь вочавидзны лёкöн. Ми эскам Енлы, велöдам таö челядьöс. Мамлысь керка сеті вичколы, и сэні öні мунöны службаяс. Гозъя венчайтчим.

Медыджыд Тараслы 27 арöс, сійö олö карын, гöтыра, котралö нин Алиана внучка. Та мында челядьöс быдтöмöн сійöс, колöкö, мыйöнкö лоис удзöдöма, но некор эг кывлы писянь увган кыв. Найö окотапырысь волöны гортö, бать-мам дорö, и кöть кымын арöсаöсь ныв-пиныд, найö век кежлö кольöны тэнад кагаясöн.

Унаöн юасьöны, кыдзи та ыджда семьяöн пыри татшöм кывкутана удж вылö. Кор вöзйисны лоны депутатöн, а сэсся овмöдчöминса юралысьöн, кевми Енлысь: «Енмöй, тэныд тыдалö водзö олöмыс. Аддзан кö, мый сямма уджавны, отсав, а ог кö — кöть кыдзи, но тасав туйсö, сувтöд джуджыд потшöс».

Ме серти, уна челядьöн велалан кывкутны, сувтöдны ас водзад могъяс да быть пöртны найöс олöмö. Тадзи и удж вылын. Медыджыд отсасьысьöй быдторйын – верöсöй. Збыль артмö, мый ме верöс сайын, а абу сы водзын ли бокын.

Асшöр олöмлöн туй вылö петігöн, гашкö, эз прöста сідз мен Енмыс сет ыджыд сьöкыдлун, висьöм, кор таладор югыдас кольлі öти кок чуньöн. Сійö видліс месьым вынöс, оз-ö личкы муöдзыс шудыс, кодöс сійö меным бöрыннас сетіс – челядьöс.

Верöс шуö: босьтам кö пö нöшта, то сöмын öтпырйö кыкöс, мед быдмисны гажаджыка.

Менам öні на морöсöй кыпавлö, кор мам йылысь шуасны буртор. Кöсъя, мед и менам челядь, водзö вылö, кор локтасны асланыс сиктö, эз гöрдöдны да лэдзны юрнысö ме вöсна.

Лидия Липина.

Снимокъяс Булышевъяслöн чукöртöмысь.