Россияса Президент Владимир Путин «Мам капиталöн вöдитчöм кузя Россияса Федерациялöн торъя законодательнöй актъясö выльпыртöмъяс» март 1-öд лунö 35-öд номера Федерарацияса закон кырымалöмöн вынсьöдiс мам капитал программаö пыртöм вежсьöмъяс. Стöчджыка та йылысь юöртiс Пенсия фондлöн Коми республикаса юкöнысь управляющöй Ольга Михайловна Колесник март 12-öд лунся пресс-конференция дырйи.

Медводз, тавося январь 1-öд лунсянь мам капитал сетсьö медводдза кага чужтöмысь. Быд семьялöн, кöнi кагаыс чужис либö чужас 2020-öд вося январь 1-öд лунö либö сёрöнджык, эм право мам капитал босьтöм вылö. Сылöн ыдждаыс 466 сюрс 617 шайт.

Мöд кага чужтысьяслы капиталыслöн ыдждаыс содö 150 сюрс шайт вылö да лоö 616 сюрс 617 шайт.

2021-öд восянь мам капитал позяс босьтны öдйöджык. Сертификат сетöм вылö кадыс индöма 5 лунöдз, сьöм видзöм вылö шыöдчöм видлалöм вылö — дас лунöдз. Пасъям, мый 2020-öд во помöдз сертификат сетан да сьöмöн вöдитчöм вылö шыöдчöм видлалан кадыс кольö важног: 15 лунöдз да öти тöлысьöдз.

Семьяöн мам капиталсö босьтöм öддзöдöм да босьтанногсö кокньöдöм могысь тавося апрель шöрсянь Пенсия фонд вуджö мам капиталсö проактивнöя сетанногö. Мый тайö татшöмыс? Кага чужöм бöрын мам капиталсö оформитасны автоматическöя да семья вермас заводитны вöдитчыны сьöмнас сертификатла шыöдчытöг. Став коланасö вöчас ачыс Пенсия фонд. Кага чужöм йылысь юöр Пенсия фондö воас гражданскöй состояние йылысь актöвöй гижöдъ-яслöн государстволöн реест-рысь. Öнi фондлöн юкöнъяс видлалöны ЗАГС-лöн юöртöм серти сертификатъяссö гижанног да стöчмöдöны та могысь бать-мам да челядь йылысь колана юöръяс. Сертификат оформитöм йылысь даннöйяссö пасйöны Пенсия фондлöн информационнöй системаын, а сэсся мöдöдöны мамлöн лич-нöй кабинетö, кытчö позьö пыравны Пенсия фондлöн сайт пыр либö «Госуслугаяс» портал пыр.

Босьтöм челядя семьяяслы ковмас на гижны сертификат оформитöм вылö заявление, сы вöсна мый кагаöс усыновитöм йылысь юöр вермасны сетны сöмын асьныс бать-мам.

Мам капиталсö семьяяс медся тшöкыда видзöны оланiн бурмöдöм вылö. Выльпыртöмыс кокньöдö тайöс. Медым öдйöджык сьöмсö веськöдны банкын кредит вештöм вылö, колö шыöдчыны сöмын банкö, кытысь босьтанныд кредитсö, да сэнi жö гижны шыöдчöмсö кредит либö первоначальнöй капитал вештöм вылö. Пенсия фондö шыöдчöмыс оз нин ков. Тайö услугасö пыртöны банкъяс да пенсия фонд костын соглашение гижöмöн.

Выльпыртöмыс вынсьöдiс семьяяслысь садöвöй участок вылын олан керка стрöитöм вылö право. Та вылö, кыдзи и водзын, колö му юкöн оформитöм да стрöитчыны лэдзöм йылысь кабалаяс.

Мам капитал сетан кад нюжöдiсны 2026-öд воöдз. Быд семьялöн, кöнi тайö кадöдзыс чужас кага, лоö мам капитал вылö право.

Пресс-конференция дырйи Ольга Колесниклысь ёна юасисны мам капитал йылысь. Лыддьöй найöс.

— Мам чужтiс медводдза кагасö 2020-öд вося апрельын. Лоö-ö сылöн мам капитал вылö право да ыджыд-ö суммаыс?

— Да, татшöм правоыс сылöн лоö. Ыдждаыс 466 сюрс 617 шайт.

— Нывбаба чужтiс кык челядьöс мам капитал йылысь законсö примиттöдз на 2003-öд да 2006-öд воясын. 2020-öд вося январын сылöн чужис коймöд кага. Сетсьö-ö сылы мам капитал да сетсьö-кö, уна-ö ыдждаыс сылöн?

— Да, сылöн эм мам капитал вылö право коймöд кага чужöмкöд йитöдын. Ыдждаыс 616 сюрс 617 шайт.

— Нывбабалöн вöлi нин 2012-öд воын чужöм кага. 2020-öд вося майын сылöн чужас мöд кага. Сетасны-ö сылы мам капитал да уна-ö сiйö лоö?

— Да сылöн лоö мам капитал вылö право. Мöд кага чужтöм бöрын мам капиталыс лоö 616 сюрс 617 шайт.

— 2016-öд воын нывбаба чужтiс двöйни. Мам капиталла эз на шыöдчыв. Уна-ö мам капиталсö сылы сетасны 2020-öд воын?

— Мам капитал вылö правоыс лоис мöд кага чужтöм бöрын 2020-öд вося январ 1-öд лунсянь законö выльпыртöмъясöдз на. Сылы вештасны 466 сюрс 617 шайт.

— Нывбабалöн медводдза кагаыс чужис 2019 вося декабрын. Лоас оз сылöн мам капитал вылö правоыс медводдза кага чужтöмысь?

Оз. Тайö правоыс сетсьö 2020-öд вояс январь 1-öд лунö да сёрöнджык кага чужтысьяслы.

— Нывбаба босьтiс мам капитал вылö сертификатсö 2009-öд воын мöд кага чужöм бöрын. Сетасны-ö сылы 150 сюрс шайт содтöдсö 2020-öд воын?

— Содтöдыс та пöрйö оз сетсьы, сы вöсна мый кагаыс чужис мам капитал йылысь законас выльпыртöмъясöдз на. Мам капиталыслöн ыдждаыс коляс 466 сюрс 617 шайт.

— Нывбабалöн нёль челядь, чужисны 2006-öд, 2008-öд, 2010-öд да 2017-öд воясын. Сертификатсö босьтiс 2010 воын коймöд кага чужтöмысь. Лоö оз сылöн мам капитал дорö содтöд вылö правоыс, чужтас кö кага таво либö бöрынджык?

— Тайö пöрйö мам капитал вылö правоыс нывбаблöн вöлi нин мöд кага чужöм бöрын. Выльöн примитöм законыс оз сет мам капитал вылö выль право, но воддза закон серти правоыс эм. Такöд йитöдын мам капиталлöн ыдждаыс кольö 466 сюрс 617 шайт. Мам капитал дорö содтöд вылö правоыс оз ло.

— Таво январ тöлысьö нывбабалöн чужис öтпыр куим кага. Ыджыд-ö мам капиталыс лоö?

— Сертификатсö сетасны 616 сюрс 617 шайт вылö.

— Мамлöн эм кык челядь, чужисны 2012-öд, 2015-öд воясын. Мам капитал вылö сертификатла пенсионнöй фондö эз на шыöдчыв. Шыöдчас тавося апрельын, уна-ö лоö мам капиталыслöн ыдждаыс?

— Тайö нывбабаыслöн мам капитал вылö правоыс лоис мöд кага чужтöм бöрын. Сертификат тайö мам капитал босьтöм вылö правосö вын-сьöдысь документ, но тайö правоыс оз йитчы сертификатсö сетöмкöд. Индöм нывбабаыслы мам капиталыслöн ыдждаыс лоö 466 сюрс 617 шайт, кыдзи выль закон примиттöдз чужтöм кагалы.

— Нывбаба усыновитiс медводдза кагасö таво. Сетсьö-ö сылы мам капитал?

— Правоыс сылöн лоис, медводдза кага усыновитöмкöд йитöдын. Мам капиталлöн ыдждаыс 466 сюрс 617 шайт.

— 2018-öд воын нывбаба усыновитiс кагаöс. 2020-öдын сылöн чужис кага. Сетсьö-ö сылы мам капитал?

— Мöд кага чужтöм бöрын капитал вылö правоыс сылöн лоис, сетасны 616 сюрс 617 шайт.

— Мужичöй мамыслöн кув-сьöм бöрын усыновитiс ас-сьыс ичöт чойсö. Мамыс вöлi быдтö челядьсö öтнас. Судлöн кывкöртöдыс вынсялiс 2020-öд вося февральсянь. Эм-ö мужичöйлöн мам капитал вылö правоыс?

— Мужичöйлöн капитал вылö правоыс эм кыдзи öтка усыновительлöн. Ыдждаыс лоö 466 сюрс 617 шайт.

— 2016 воын мужичöй усыновитiс кагаöс. 2019-öд воын гöтрасис, 2020-öд воын семьяас чужас кага. Сетсьö-ö сылы мам капитал?

— Тайö пöрйö мужичöйлöн мам капитал вылö правоыс оз ло, но сiйö лоö гöтырыслöн, сетасны 466 сюрс 617 шайт.

-Гöтырыс кö усыновитас мужичöйлысь медводдза кагасö, сетасны-ö мам капитал дорö 150 сюрс шайт содтöдсö?

Оз, содтöдсö оз сетны, сы вöсна, мый медводдза кагаыс чужигас эз вöв усыновитöма.

— Öтка мужичöй усыновитiс кык кагаöс. Судлöн кывкöртöдыс вынсялiс 2020-öд вося январ 1-öд лунысь сёрöнджык. Ыджыд-ö мам капитал сетсьö сылы?

— Мужичöйлöн лоö кыдзи öтка усыновительлöн мам капитал вылö право, ыдждаыс 616 сюрс 617 шайт.

Дасьтiс Ольга Андреева.