Март 25-öд лунö чукöртчыліс вуджан висьöмъяслы паныд сулалысь районса комиссия. Сёрнитісны ляті (корь) висьöм йылысь, коді бöръя кадö кутіс паськавны Европаын, паныдасьлö Украинаын, висялöны и Россияын. Коми республикаса медшöр санитарнöй врачлöн индöдöн, быд районлы колö видзöдлыны, кымын мортлы öтисянь 18 арöсöдз абу вöчöма тайö висьöмлы паныд прививка, абу нуöдöма ревакцинация, да вöчöдны быть. Ляті висьöмысь прививка медводдзаысь вöчöны арöсöн, мöдысьсö квайтöн. Босьтасны тöдвылö и найöс, кодъяслы прививка вöчлісны сöмын öтчыдысь да кодъяслöн абу вакцина сюйöм йылысь юöр. Быть ковмас вöчны прививка 35-55 арöсаяслы, найö кö уджалöны велöдан, бурдöдан, вузасян, йöзöс новлöдлан юкöнъясын. Уджалысь верстьö йöз вöсна кывкутöны веськöдлысьяс: роспотребнадзор видлалас уджалан котыръяс да индас вештыны удж вылысь найöс, кодъяслöн оз ло вöчöма лятіысь прививка. 
Öні медшöр мог – артыштны, уна-ö ковмас вакцина, медым тырмис урчитöм став йöзлы. Районса бурдöдчанінысь медшöр врач Д.В.Пермяковлöн кывъяс серти, вакцина лоас тырмымöн. 
Роспотребнадзорлöн районса юкöнöн веськöдлысь В.Д.Никитина тöдмöдіс, мыйла сэтшöм чорыд видзöдлас улын тайö висьöмыс. 
Ляті – висьöм, коді зэв öдйö вуджö сынöдті öти мортсянь мöдлы кызігöн либö несъялігöн. Мортын висьöм вермас «лöня пукавны» 7-21 лун да петкöдчыны вöлисти. 39-40 градусöдз кыптö температура, зэв ёна висьö юр, морт эбöстöммö, сійöс восöдö, висьмö кынöмыс, гöрдöдö горшыс. Мöд лунас мортöс кутö кызöдны да несйöдлыны, тюрö синваыс, синъясыс вермасны оравны, пыкталöны вылыс синлапъяс, висьысь оз вермы видзöдны лунъюгыд вылö. Ляті висьöмысь бурдöдантор абу, сыысь позьö видзчысьны сöмын прививка вöчöмöн. Бöръя кадö пыр унджыкöн кутісны бöрыньтны вуджан сьöкыд висьöмъяслы паныд вакцинаяс вöчöм, тшöтш и челядьлы. Шуöны, мый прививка бöрын кага вермö чорыда висьмыны. Збыльвылас мöдарö. Мирын быд час ляті висьöмысь кулö 15 морт. Ляті бöрся вермас кöвъясьны пневмония либö менингит (40 процентыс сыысь кулöны), чорыдджыка висьöм бöрын морт вермас синтöммыны либö пельтöммыны. Ляті висьöмöн морт оз вермы водзсасьны весиг кокни висьöмъяскöд. 
Лидия Липина.