Кöсъя тöдны

[ A+ ] /[ A- ]

— Ме матö кöкъямыс тöлысь ола карын, сиктö вола сöмын гожöм кежлö. Кольöм воясын ме юöртлi «Энергосбытö», дыр-ö ог ло сиктын, да сiйö кадысь меным квитанцияяс эз волыны. Кольöм восянь «Энергосбыт» мыйлакö кутiс мöдöдны квитанция быд тöлысь, кöть эськö гортын эг вöв да би видзны некыдз эг вермы. Шуисны, мый биысь лыдпасъяс öнi ковмас мöдöдны быть быд тöлысь помын. Ог кö тайöс вöч, лыддьыны кутасны нормативъяс серти. Оз-ö «Энергосбыт» торк закон да вöч тайöс аснаукöн? 
Ми шыöдчылiм «Коми энергосбыт» котырö. Со мый найö вочавидзисны: 
— Котыр уджалö Россия Федерацияса правительстволöн 2011-öд волöн май 6-öд лунся 354-öд номера индöд вылö мыджсьöмöн. Законодательствоын урчитöма, мый котырлöн мог — быд тöлысь ыстыны олысьяслы би видзöм кузя квитанцияяс. Та вöсна «Энергосбытлöн» помкаыс, мед дугöдлыны кад кежлö квитанцияс мöдöдöм, весиг мортыс кö оз ов патераын, абу. 
Тi кö кад кежлö мунiнныд кытчöкö, тöлысь помын быть ковмас юöртны миянлы счётчиклысь лыдпасъяс. Он кö олöй да би оз мун, тайö лыдпасъясыс лоасны сэтшöмöсь, кутшöмöс тi сетлiнныд мунöм водзвыланыд. «Энергосбыт» квитанциын пасъяс, мый тiян видзöма 0 киловатт, вештыны оз ков. 
Закон серти, олысьлöн мог — счётчиклысь лыдпасъяс висьтавны дзик быд тöлысь помын (кöть биысь, кöть ваысь, кöть шоныдысь). Он кö тайöс вöчöй, котыр кутас артавны шöркодя нормативъяс серти, а оз счётчиклöн лыдпасъяс серти. Сэки нин квитанцияын лоасны ыджыд лыдпасъяс. Сы бöрын, кор тi юöртанныд «Энергосбытö», уна-ö мунiс электроэнергия счётчик серти, котыр арталас выльысь да «люкöдас» лыдпасъяс. Вештысьны урчитас збыльысь видзöмысь. 
«Энергосбыт» котыр казьтыштö, мый счётчикъяслысь лыдпасъяс колö сетны быд тöлысь 18-23-öд лунъясö. 
— Кывлi, мый Помöсдiнын февраль помсянь апрель панасöдз оз кут уджавны сбербанклöн юкöн. Йöз унаöн вештысьöны коммунальнöй услугаясысь буретш танi. Абу быдöнлöн позянлун ветлыны юрсиктö либö вештысьны интернет пыр. Мый вöчны Помöсдiн вожса олысьяслы? 
Вочавидзис сбербанклöн районса юкöнöн веськöдлысь О.Еникеева: 
— Март 13, 21-öд лунъясö Помöсдiнö волас мобильнöй сберкасса. Сiйö кутас сулавны овмöдчöминса администрация дорын 10 час 30 минутсянь 16 часöдз. Нöшта öтчыд волас март 25-29-öд лунъясö, стöчджыка юöртам. Сбербанклöн Помöсдiнса юкöнысь уджалысьöс тайö кад кежлö вуджöдлам Кулöмдiнö. Сiйö кутас могмöдны Помöсдiн вожса олысьясöс.

Комментарии:

Добавить комментарий

Свежий выпуск: 28 марта

Осторожно — мошенники!