Кöнi чужи, сэнi кола

[ A+ ] /[ A- ]

Керкаын некод эз ов. Кöзяйкаыс вöлi Кулöмдiнын, а сылысь оланiнсö кадысь-кадö видзöдлiс тöдсаыс. Майся öти лунö орчча керкаса олысьыс казялiс, кыдзи керкаас гöбöч öшиньöдыс пырис морт. Пыр жö звöнитiс сöмын на уджö босьтчысь участокса уполномоченнöй Никита Николаевич Игнатовлы. Локтiс да пырны эз вермыны: джуджыд потшöс, йöрас пыранiныс саморезъяс вылын. Керка видзысьсö виччысигöн пыр жö юöртiс пытшкöсса делöяс кузя министерстволöн районса юкöнö. Веськалiсны керкаö, но некодöс эз аддзыны. Пырисны гöбöчö, а кортöм гöсьтыд куйлiс ылi пельöсас, быттьö эз кыв, мый погона морт корис петны сiйöс. Öшинь дорас сулалiгöн Никита Николаевич кылiс кутшöмкö шы да казялiс, мый шышыд петö гöбöч öшиньöдыс, пыр и уськöдчис суöдны. Тшапкис да нуис аслас уджалан жырйö, дасьтiс колана гижöдъяс. Водзö уджалiсны туясьысьяс. Тайö лоöмторйыс висьталö: буретш участокса уполномоченнöй дорö медводз шыöдчöны йöз, да сiйö медводз босьтчö туявны-разьны гöрöд. 
Том мортöс Помöсдiн вожын лöнь олöм вöсна тöждысьны корисны олысьясыс. Никита Николаевич эз бöрыньт. 
Помалiс Сыктывкарса каналан университет, лоис физкультура да ОБЖ велöдысьöн. Студенталiгöн жö аддзис ассьыс шудсö: сьöлöмсö вöрзьöдiс медколледжын велöдчысь Кулöмдiнысь Анастасия. Гöтрасис, чужтiсны кагаöс. Том гозъя овмöдчисны Помöсдiнö. 2018-öд воын Никита Николаевич босьтчис велöдны Пожöгса школаын. Вöзйисны оланiн, но сiйö ветлiс быд лун Помöсдiнсянь. Кор йöзкöд сёрнитны Помöсдiнö волiс пытшкöсса делöяс кузя министр, сы дорö и шыöдчис юалöмöн. И со воысь дырджык нин тайö кывкутана удж вылын. Туйдысь-велöдысьнас вöлiны ыджыд сяма уполномоченнöйяс Б.В.Зезегов да Э.В.Лажанев. 
Ачыс Помöсдiнса да бура тöдö йöзöс, уджалан котыръяс. Велöдысьыд тшöтш и психолог. Кужö сёрнитны и томуловкöд, и верстьöкöд. Пыравлö школаö, рытъясын да шойччан лунъясö ас окотаöн полициялы отсасьысьяскöд петавлö сиктö, кытшлалöны йöзаинъяс. Сылöн видзöдлас улынöсь сьöкыд мыжысь пукавлöм йöз, кодъяслы бытьысь кутчысьны торъя урчитöмторъясö. Ветлö вöралысьяс дорö, мед найö колананог видзисны ружье да патронъяс. Никита Николаевич лöнь олöм вöсна недыр кывкутiс и Вöльдiн вожын. 
— Университетын коймöд восяньыс öттшöтш велöдчи юристö, но пыдди пуктана помка вöсна дипломсö эг дорйы, дасьтыся босьтны öнi. Тöдöмлуныс зэв отсалö менам уджын. Талун менам шуда позйын кык челядь, ыджыдыслы квайт арöс, дзоляыслы квайт тöлысь. Овлö, шондi моз петкöдчывла гортын. Гöгöрвоа, гöтырлы сьöкыд. Отсасьöны менам бать-мам, волöны и гöтырлöн. Уджын пыр отсасьöны ыджыд сяма уполномоченнöйяс, — кывкöртiс Н.Н.Игнатов. 
Марина Дадашова. 
Снимок пытшкöсса делöяс министерстволöн райöнса юкöнысь.

Комментарии:

Добавить комментарий

Свежий выпуск: за 14 января