Кыпалö выль школа

[ A+ ] /[ A- ]

Помöсдiнын выль школа кыпöдöм йылысь сёрнитлiсны 1974 воын. Весиг урчитлiсны, мый мöд вонас босьтчасны уджö. Но кöсйöмöн и колис. Ёна кöсйысисны, эскöдiсны и бöръя воясын, но «йи вöрзис» сöмын таво, июньын локтiс Архангельскысь «Белый дом» котыр. 
— Бур йитöдаöсь овмöдчöминса администрациякöд, водзмöстчысьяслöн котыръяскöд. Найö корсисны миянлы оланiнъяс, мунöны быд корöмлы воча. Ме кыски ас дорö мукöд уджалан котыръясысь колана йöзöс: кран вылын уджалысьöс, механизаторъясöс, сваритчысьöс, плöтникъясöс да мукöдöс. Сетам ас кадö бур удждон, — висьталiс «Белый дом» котырлöн юкöнса начальник Александр Николаевич Климов. 
Уджалöны кöкъямыс час асывсянь сизим час рытöдз. Пемдöм бöрын уджаланiнсö югзьöдöны. Гöгöр потшисны. Вöчисны нин школалы подув да лэптöны кирпичысь стенъяс. Выль воöдз вöчöминас пуктасны 43 öшинь. Кирпич, кöртысь да бетонысь вöчöмторъяс вайöны Ухтаысь, мукöд коланторъяс Сыктывкарысь, мыйсюрö Вологдаысь да мукöдлаысь. Нюжöдiсны шоныд да ва мунан визьяс, вайöдiсны школаöдз. Вöчисны и öзйылöмъясысь кык ыджыд ва видзанiн. 
— Содтысям öти метра кыпöдöмöн, öтпырйö джуджыда лэптыны оз позь. Бокынджык вöчам бетонысь сорас. 25 градус кöдзыд дырйи, дерт, стен кыпöдысьяслöн удж сувтлас, но сы кындзи мукöд уджыс тырмымöн, — сёрнитiс юкöнса инженер Дмитрий Николаевич Лопатин, а сэсся бала вылысь петкöдлiс, кöнi мый урчитöма вöчны 400 велöдчысь вылö школаын. Лоасны кык спортзал, гажъяс нуöданiн, öнiя корöмъяслы лöсялан велöдан жыръяс, нуръясянiн, пусянiн да с.в. Школакöд орччöн лоас кык автобуслы гараж. 
— /нi вöчам сылы подувсö. Сварита сетка сяма, а сэсся сэтчö кисьтасны бетон. Уджала августсянь, ас кадö вештöны бур удждон. Школасö урчитöма вöчны кык воöн, сiдзкö, та дыра лоас и меным бур удж, — сёрнитiс Помöсдiнысь Иван Сергеевич Чёрный. 
Йöрын лоасны 1-4-öд да 5-11-öд классъясын велöдчысьяслы торъя ворсанiнъяс, шойччанiн, видзчысьтöм лоöмторъясысь велöданiн, баскетболысь да волейболысь ворсанiнъяс, гырысь классаяслы гимнастика вöчанiн, айму дорйысьясöс дасьтанiн. 
Школа дорö вöчасны асфальта туй. Лоасны асфальтысь ветланiнъяс. Йöрö пуктасны кыдз, пелысь, клён, сирень, дзоридзьяс, кöдзасны турун. 
Мый урчитöма бала серти, вöчöны ас кадö. Эштöдны колö 2020-öд вося июльöдз. 
— Мыйöн вермам, сiйöн и отсалам школа лэптысьяслы. Зэв бур, мый Помöсдiнса 30 гöгöр мортöс могмöдiсны уджöн. Выль школаöн йöз оз сэсся пышйыны чужанiнысь. Удж сюрас «Помöсдiн» кооперативысь, кодi кыпöдiс скöт карта, кытчö пырасны 2019-öд воын. Кыпöдöны и кык вузасянiн. Эм бурдöдчанiн. Танi ыджыд «Оптималес» котыр, «Мондилöн» юкöн, — аскиа лун вылö кутö лача Помöсдiнса юралысь Анатолий Егорович Уляшев. 

Марина ДАДАШОВА. 
Гижысьлöн снимокъяс вылын: кыпалö школа; 
И.С.Черный; Д.Н.Лопатин.


Комментарии:

Добавить комментарий

Свежий выпуск: за 17 января