Кык Елизавета

[ A+ ] /[ A- ]


Колö жö волi лоны сiдзи, мый öти вужйысь, чужисны öти лунö, налы сетiсны öти ним да вичкоын пыртiсны öти купельын. Öткодя и асьныс чужтiсны ныла-пиöс. Öткодя и нывъясыс велöдчисны бурдöдысьясö.

1930-öд вося югыд август 31-öд лунö Кулöмдiнын чужисны кык шань да мича аньяс Елизавета Фёдоровна Нестерова да Елизавета Григорьевна Игнатова.
Елизавета Фёдоровналöн батьыс вöлi Кулöмдiнысь, а мамыс Кужйысь, но батьыс кувлiс водз. Ичöтдырся кадыс вöлi зэв сьöкыд, öд война сувтан воын нывлы вöлi 11 арöс. Ёна тшыгъялöмысь дорйылiс ыджыд мамöн вöдитöм град йöр да овмöсын скöт видзöм.
Елизавета Фёдоровна помалiс Коми пединститут да 30 сайö во уджалiс Кулöмдiнса 8 класса школаын коми кыв да литература велöдысьöн. Öнöдз на велöдчысьясыс оз вунöдны, пыравлöны весиг Германиясянь волiгöн. Бур уджысь видзö Россияса велöдан министерствосянь, районса велöдан юкöнсянь аттьöалан письмöяс, дипломъяс, граммотаяс. Елизавета Фёдоровнаöс пасйöма «За доблестный труд в годы Великой Отечественной войны» медальöн.
Аслас челядьыс казьтылöны, кыдзи мамыс школаысь локтöм бöрын чöскыда пусис-пöжасис, бергöдiс гортса овмöс да рытъясын пукалiс велöдчысьяслöн тетрадьяс сайын, дасьтысис урокъяс кежлö.
Ань быдтiс да ас олöмö петкöдiс ныла-пиаöс. Валентина велöдчис Челябинскын педиатрö, а Юрий – Кировын инженерö. «Мамö велöдiс миянöс сöмын бурö: кывзысьны, овны ылöдчытöг, уджавны зiля, да ра-дейтны öта-мöдöс», — юксьö Валентина Александровна нылыс.
Елизавета Григорьевна Игнатова бать-мамыслöн вöлi медiчöт 16-öд кагаöн. Война пансигöн вöлi 11 арöса. Странаöс вöрöгъясысь дорйыны гортысь мунiсны нёль вок да чöйыслöн верöсыс. Бöрсö некöд эз лок, а кор усис медiчöт вокыс, зэв чорыда висьмис мамыс, да Елизавета Григорьевна босьтчис старайтны сiйöс. Та вöсна 7-öд классö ковмис пырны рытъя школаö, а луннас уджав-ны госбанкын, войяснас бергöдiс гортса уджъяс. Банксянь нёль тöлысь кежлö велöдчыны бухгалтерö мöдöдлiсны Горькийса сьöм овмöс техникумö. Локтöм бöрын уджалiс госбанкын артасьысьöн, контролёрöн, вöлi и медшöр бухгалтерöс вежысьöн.


Сiйö воясас жö Кулöмдiнын тöдмасис Михаил Терентьевич Игнатовкöд, кодi лоис верöсöн. Гозъя öтлаын лэптiсны ыджыд мича керка, чужтiсны Надежда нылöс да Николай пиöс. Бать-мам вöчисны ставсö, мед сетны челядьлы ыджыд позянлун велöдчыны да бура петны олöмö. Шуда и вöлi öтлаын олöм, но 29 во мысти Михаил Терентьевич другысь кувсис. Елизавета Григорьевна öнöдз на шоныда казьтывлö верöс йылысь.
Олöмыс мунiс водзö, да 1955-öд воын аньöс райисполкомсянь мöдöдлiсны уджавны «Олень» нима колхозö бухгалтер-ревизорöн. Позьö шуны, мый нывбаба нэмсö вöлi бухгалтерöн, уджалан стажыс 45 во.
Том дырсянь Елизавета Григорьевна век нуöдiс общественнöй удж: вöлi народнöй заседательöн, Кулöмдiнса сельполöн ревизия нуöдан комиссияса председательöн. Унаысь донъявлiсны аттьöалан письмö да наградаясöн. И öнi весь оз ов, радейтö кысьыны. 2019-öд воын ас кыöмторъясысь сетiсны республикаса Госсöветсянь диплом.
Ачыс Елизавета Григорьевна нюмъялысь да шань нывбаба. Некор оз лёкав. Некор он кывлы сылысь няргöм да висьöмъяс вылö элясьöм. Öнi на сыын олöмыс пуö. Регыд на рöдвужыскöд ветлiс ельдöгла, а град йöрыс дзим-дзурк, абу некöн ёгчир, туй вывсянь тыдалöны мича дзоридзьяс. Дерт, арлыдыс босьтö ассьыс, да Елизавета Григорьевна гöжöмсö сöмын коллялö сьöлöмлы дона керкаын, а тöвнас олö нылыс дорын, Эжваын.
Олöма кык ань висьталöны öнiя олöм йылысь: «Йöзлы позьö нин овны, майбыр, ставыс эм: сёян, паськöм, да и уджыд корсьысьлы век сюрö».
Кыкнанныс тöдчöдiсны, мый налöн озырлуныс внук, внучка да правнукъяс.
Тылса уджалысьяс да уджвывса ветеранъясöс, Елизавета Фёдоровнаöс да Елизавета Григорьевнаöс, 90 арöс тырöмöн чолöмалiсны «Кулöмдiн» овмöдчöмин администрацияöн веськöдлысь В.П. Игнатов, олöмаяслöн Кулöмдiнса котырöн юрнуöдысь В.П.Нестеренко да олöмаяслöн районса котырсянь А.М.Николаева. Сетiсны Россияса президент В.В.Путинсянь чолöмалан гижöд, козинъяс, дзоридзьяс.
Оксана ЛЕБЕДЕВА.
Снимокъясыс гижысьлöн.

Комментарии:

Добавить комментарий

Свежий выпуск: 28 марта

Осторожно — мошенники!