Сиктса уджач йöз пыр нимавлiсны зiльлуннас, аддзасны мый вöчны прöст кадö, медым уджавны да перйыны кынöмпöт. Донысь Дмитрий Липинлы дышöдiс помся медавны йöзлысь техника да шуис аслыс ньöбны выль трактор. Виччысис Москваысь нёль тöлысь чöж. Сентябр помын Сыктывкарсянь дивö кодь выль ичöт «ёртöс» вайис öти сиктын олысьлöн доддя машинаöн. Маркаыс – «Синтай». Тракторлöн эм гöр да культиватор. Вайöмнас техника сувтiс 410 сюрс шайт гöгöр. Трактор кабинатöм. Но гожöмын сiйö ёна оз и ков. Позис жö пуктыны, но сыысь эськö ковмис содтыны 100 сюрс шайт. Водзö вылö позьö босьтны додь, лым весалан да кöрым заптан оборудование. Комиын да миян районын татшöм ичöт «кöрт вöвъяс» вылын уджалöны нин.
Дмитрий Александрович висьталiс, мый тракторыс дзонь привода — йöткасьöны нёльнан кöлесаыс. Выныс — 24 вöвлöн. Мича турунвиж рöма тракторлöн нырас красуйтчö «Рустрак» гижöд да кузь тшын петан труба.
Техника вайöм бöрын Дмитрий Липин дзик пыр видлiс сiйöс уджын – гöрис-небзьöдiс картупель муяс ассьыс, рöдвужлысь да ёртъясыслысь. Некымын мужичöйлы тшöтш лоис окота ньöбны аслыс татшöмсяма техника. Ыджыд тракторъяс пыдди муяс да видзьяс вылын кутасны мургыны дзоляяс. Шуöны тай — кутшöма пö уджалан, сэтшöма и босьтан. Кутам ыджыд лача, мый Донын аслыспöлöс выль техника ваяс уна бур сиктын олысьяслы да дыр служитас аслас кöзяинлы.
Артур Гарнов.
Гижысьлöн снимок вылын Дмитрий Липин.