Май öкмысöд лунö Ручса олысьяс кывтыдсянь и катыдсянь восьлалiсны «Кувлытöм полкöн» да вочаасисны казьтылан пас дорын. Кольöм воын серти таво унджыкöн нуисны снимокъяс: пöльяслысь, ыджыд батьяслысь — миянöс дорйысьяслысь фотографияяс. Медся водзын нуисны плакатъяс да флаг. Матö ставныслöн кианыс вöлiны ичöтик флажокъяс. Мунiсны сьылöмöн, юргисны и частушкаяс. Быттьö корöм серти, луныс вöлi шондiа, югыд, мича. 
Казьтылан пас дорын сулалiсны караулын школаса велöдчысьяс, челядь висьталiсны кывбуръяс. Пас дорö ставöн пуктiсны дзоридзьяс. Чукöртчысьясöс чолöмалiс да сёрнитiс Ручса юралысь Д.В.Кирушев, а сэсся зэв мичаа сьылiс «Венский вальс». Кодъяс кужисны, сьылiсны тшöтш. Олöмаяслöн котырöн юрнуöдысь А.И.Адамова казьтылiс, мый сиктысь война вылö 700 сайö мунысьысь бöрсö бергöдчис 200 сайö морт. Корис, мед эз вунöдны найöс, кодъяс повтöг тышкасисны вöрöгкöд миян шуда олöм вöсна. Этшаммöны. Таво сöмын тылса куим уджалысь пукалiсны челядькöд тшöтш. 
Владимир Леонидович Трегубов ставнысö чöсмöдлiс салдат рокöн. Ыджыд пöртйыд öдйö и рекмис. 
Зэв гажа вöлi культура керкаын. Садйö ветлысьяс висьталiсны кывбуръяс, сьылiсны. Зэв мичаа йöктiсны «Синий платочек». Аттьö Т.В.Поповалы найöс велöдöмысь, дасьтöмысь. Сьылiсны и воспитательяс. Салдат паськöмö вöччöмöн, юр выланыс пилоткаясöн гажсö нуöдiсны школаса велöдчысьяс Яна Попова да Надежда Хворова, кодъяс тшöтш и сьылiсны зэв мичаа. Гаж чöж кино петкöдлiс Е.М.Адамова. «Вдовы России» сьыланкыв улö йöктiс «Сударушки» котыр. Н.М.Подюкова, кодi пуктiс гажсö, сьöлöм вöрзьöдiс «Скрип-скрип саночки» сьыланкывйöн. Сьылiсны и В.Л.Трегубов да И.А.Попов. Уналöн петiс синваыс, öд быд петкöдчöмын тыдалiс, кутшöм курыд кöра вöлi война. 
Екатерина УЛЬНЫРОВА. 
Гижысьлöн снимок вылын: 
караулын школаса велöдчысьяс.