«Культура» национальной балалöн «Культураын ас окотаöн отсасьысьяс» уджтас серти кольöм вося августын кык вежон кежлö Псков обласьтса Печоры карö республикаысь ветлiсны кызь вит морт, районысь — дасöн. Пырöдчисны культура керкаясса да клубъясса, библиотекаясса уджалысьяс, дизайнерö, архитекторö велöдчысь студентъяс да мукöдъяс. Студентъяслöн тайö вöлi практикаöн.
Кор вöзйисны пырöдчыны балаö, районсаяс дыр эз майшасьны: куим лунöн ставыс вöлi дась мунiгкежлö. Сэтчöдз кык сутки чöж воöдчисны поездöн. Сувтлiсны Москваын, ветлiсны Краснöй площадь да Арбат вылö. Печорыын йöзыс чукöрмис уна, локтiсны странаса кызь регионысь. Ставыс вöлi 3000 морт. Ас окотаöн отсасьысьясысь медся томлы вöлi дас квайт, а медолöмаыслы-кöкъямысдас куим арöс. Сергей Ефремов висьталiс, мый веськалiсны Енлы эскöмкöд йитчöм оласногö, и тайö лоис шензьöданаöн. Овмöдiсны Псковско-Печорскöй монастырын — вежа местаястi ветлысьяслы юр сюянiнын. Поводдяыс пуксис бур, мича вöр-ва гажöдiс сьöлöм, воисны нин яблöк да груша. Вердiсны куимысь луннас, нöшта чöсмöдлiсны манастырса ырöшöн да няньöн. Уджалiсны пажынöдз: идралiсны ветлан туй бокъяс, мавтiсны потшöсъяс, пуктiсны дзоридзьяс, кодсюрöяс серпасасисны манастырса стенъясö, отсалiсны чукöртны урожай. Прöст кадö пырöдчисны уна сикас гажö. Аньяс велöдiсны выль сьыланкывъяс да йöктöмъяс. Тшöкыда сёрнитiсны вичкоын служба нуöдыськöд, юасисны политика, странаын олöм йылысь да с.в. Ас окотаöн отсасьны локтiсны тшöтш Москваса велöдысьяс, кодъяс юксисны тöдöмлунöн. Рытнас пестылiсны куим бипур да чукöртчылiсны сы гöгöр. Öтилаын ворсiсны, мöдлаын сьылiсны, коймöдлаын пöжалiсны печенча. Ставныслöн сьöлöм выланыс вöлi долыд, овсис да мöвпавсис кокниа. Мукöд дырйи уджалiсны и Печоры карас. Олысьясыс вочаалiсны бура. Волiсны губернатор да владыка. Найö пасйисны, мый карыс сöстöммис. Ас окотаöн отсасьысьяс ветлiсны Изборскса крепосьтö, тайö культуралöн памятник, кодi сулалö Эстониясянь неылын. Танi ставыс гажöдö синтö, кыпöдö ловтö: садъяс, паськыд ты вылын шлывгысь юсьяс, вежа источник, кытчö волывлöны туристъяс. Ас окотаöн отсасьысьяс дасьтысисны Енлы эскысьяслöн Яблöклöн Спас лун кежлö: идралiсны крепосьтбердса ветланiнъяс, часовня дор, том яблоняяс улысь небзьöдiсны мусö, нетшкисны быдмысь турун. Кызь во мысти танi лоасны гырысь пуяс, а йöзыс чöсмасясны юмов яблöкъясöн. Тайö лунö паськыд видз вылын мунiс гаж, воисны унаöн. Ас окотаöн отсасьысьяс матыстчылiсны ыджыд крест дорö, кытчö подулас пукталöмаöсь изъяс, на вылö волысьяс гижöмаöсь ассьыныс нимъяссö. Сергей висьталiс, мый сменасö восьтiгöн да тупкигöн котыртлiсны гаж, ставöн петкöдлiсны регионъяслысь аслыспöлöслунсö. Районсаяслöн юргис коми сьыланкыв, йöктiсны, Сергей сьылiс и öтнас. Август кызь кыкöд лунö, Печоры карлöн лунö, Сергей Ефремов да Тимшерысь Виталий Паршуков сьылiсны Россия, а аньяс — Коми му йылысь. «Культуралы ас окотаöн отсасьысьяс» бала збыльмöдiгöн культураса уджалысьясöс чукöртлiсны медводдзаысь, чайтам, уджсö нуöдасны водзö, а кöсйысьясыс содасны. Сергей чайтö, мый татшöмторсö позяс котыртны и Уллянаса манастырын.
Сергей Ефремов висьталiс, мый ветлöмыс воис сьöлöм вылас, сетiс уна аскылöм, вын, творчествоын выль мöвпъяс. Ас окотаöн отсасьысьяс öтувтчисны, лöсьöдiсны бур йитöдъяс, ёртасьöны интернет пыр. Аттьöалiс районса администрацияын веськöдлысьöс вежысь Н.А.Левченкоöс, районса культура керкаясöн веськöдлысь А.И.Касеваöс, районса культура керкаысь директор К.Ю.Апостолидиöс «Культураын ас окотаöн отсасьысьяс» балаö пырöдчыны позянлун сетöмысь.
Нина Калистратова.
Снимок вылын: ас окотаöн отсасьысьяс Печоры карын.