Кулöмдiнса кодзув

[ A+ ] /[ A- ]


Кулöмдiнысь балетса артист Иван Сорокинлы сöмын на тырис 18 арöс, но зонлöн водзö мунысь могъясыс паськыдöсь да ыджыдöсь. Иван серти Коми Республикаын, торйöн нин Кулöмдiн районын, енбиа йöзыс медся уна. Талун том морт велöдчö Россияса юркарын да быд во ыджыд сцена вылын вылö донъялöны сылысь петкöдчöмсö.
Ичöтсяньыс винёв зонка быдсикас шылад кылiгöн босьтчылiс йöктыны. Кулöмдiнса школаö пыригöн мамыс сетiс сiйöс челядьлысь енби сöвмö-дан районса керкаысь «Фантазия» йöктан котырö, кöнi Иванöс песны ки-кок велöдiс Татьяна Анатольевна Кочанова. Нёль во бöрын велöдысь вöзйис Иванлы пырны Коми Республикаса юралысь бердса искусствояс гимназияö. Сэнi зон босьтiс йöктан сям матö квайт во. Гимназияын öкмысöд класс помалöм бöрын том зон пырис Сыктывкарса искусствояс колледжö. 2018-öд воын найöс Москваса балет труппакöд нулiсны Китайö. Иван висьталö, мый сэнi ёна радейтöны балет. Тöлысь чöж Иван да сылöн уджъёртъясыс петкöдлicны Китайын олысьяслы мичаа йöктöм. Сэнi и паныдалicны Выль во.


Китайö ветлöм бöрын Иван водзö мунiс аслас бöрйöм туйвизьöд, пырис велöдчыны Ыджыд театр бердын Москваса государственнöй академияö. Колис велöдчыны бöръя во, эштöдны коймöд курс, но ставсö дзугис коронавирус. Висьöм паськалöм водзын найöс ыстicны гортаныс. Март помын зон воис Кулöмдiнö. Водзö велöдчис öтуввез отсöгöн, гортас вокыскöд лöсьöдic кутчысянiнъяс да тшöтш жö ёнмöдiс пластика.


Иван тшöкыда пырöдчö быдсяма конкурсö. Позьö шуны, быд во. Медводдзаысь сiйö пырöдчис 2016-öд воын «Щелкунчик корö» конкурсö, кодi мунiс Екатеринбургын. Сэнi зон босьтic лауреатлысь медводдза тшупöда диплом. 2017-öд воын пырöдчиc Ыджыд театрын мунысь конкурсö. 2018-öд воын бара жö Екатеринбургын Иванлы вичмис лауреатлöн коймöд тшупöда диплом. 2019-öд воын, Москваын велöдчигöн нин, пырöдчис войтыркостса конкурсö, кöнi бара босьтic ыджыд тшупöда пас — лоис медводдза тшупöда лауреатöн. Таво Иванлы мойвиис пырöдчыны Иосиф Кобзонлы сиöм «Dance Moscow» конкурсö, кöнi тшöтш жö босьтiс лауреатлысь медводдза тшупöда ыджыд пас.
Балетын йöктöм кындзи Иван ворсö фортепианоöн, радейтö пусьыны, ветлыны музейястi да нимкодясьны мича вöр-ваöн. Москваын олiгöн cылöн ёна бырö гаж коми пöжасъясысь — шаньгаысь да чери няньысь.
Кулöмдiнын гожся кад коллялöм кындзи Иван ветлic саридз дорö да тöдмасис выль йöзкöд. Сентябрсянь пансис выль велöдчан во. Сиам миян районысь петöм том кодзувлы водзö дзирдавны ыджыд сцена вылын, шедöдны ыджыд выль вермöмъяс да нимöдны Коми мунымöс.
Артур Гарнов.
Снимокъяс гижысьлöн да Иван Сорокинлöн чукöртöмысь.

Комментарии:

Добавить комментарий

Свежий выпуск: за 17 сентября