Корöй, отсаласны

[ A+ ] /[ A- ]


Коронавирусысь видзчысьöм могысь öнi йöзлы мыйкö дыра быть овны гортаныс. Олöмаяслы да вермытöмъяслы отсалöны, лавкаысь ньöбасьöны овмöдчöминса администрацияысь специалистъяс, социальнöй уджалысьяс да ас кöсйöмöн отсасысьяс, мöд ног волонтёръяс. Буретш налысь ми и тöдмалiм, кыдзи котыртöма удж тайö туйвизьын.

Велöдан управлениеысь том йöзкöд уджалан юкöнöн, а сiдзжö «Ас окотаöн отсасьысь» шöринöн веськöдлысь Вероника Пантелеймоновна Савельева талун кежлö нöшта на лоö «#Мывместе» паса Россияса акциялöн районын удж öтувтысьöн. Сiйö висьталiс, мый сикт-посёлокъясын йöзсянь кö абу некутшöм шыöдчöм, волонтёр ачыс морт дорöдз оз лок. Корöмъясöн позьö шыöдчöны овмöдчöминса юралысь дорö. Кулöмдiнын «пöсь йитöдлöн» номерыс 89128602510.
Морт дорö локтöдз волонтёр звöнитö да сёрнитчö, мый колö ньöбны да вайны сылы. Пасъям, мый отсасьысьяс керкаöдз оз пырны. Тöвар кольöны кильчö помö либö мыччöны кöв кузя öшинь пыр. Сьöкыд кадö тшöкыда паныдасьлöны йöзöс бöбйöдлысьяс. Та вöсна колö тöдны, мый кодкö кö локтö кортöг да сёрнитчытöг, мырдöн пырö керкаöдз – сiйö ылöдчысь. Олöмаясöс олöдöны налькйö шедöмысь.
Быд туйö петöм водзын волонтёръясöс могмöдöны чуня кепысьöн да маскаöн. Талун кежлö найö отсалiсны сё сайö шыöдчысьлы. Вероника Пантелеймоновналöн кывъяс серти водзмöстчöны, зiля уджалöны Тимшер вожын, Керчомъяын, Зимстанын, Кулöмдiнын. Шыöдчöны и мукöд сикт-грездын — Дiасёръя, Мыс, Ульяна, Немдiн, Ягкöджын. Тимшерса школаысь старшöй вожатöй Анастасия Тарабукина лöсьöдiс да веськöдлö ас окотаöн отсасьысьясысь «Тимуровецъяс» котырöн. «#Мы-вместе» акция йылысь юöр аддзис öтуввезйысь. Сiйö вурис уна маска да разöдiс сьöм босьттöг. Та кындзи шань сьöлöма ань новлö вермытöмаяслы сёян-юан. Анастасия юксис миянкöд: «Менам эм нывъёрт, кодöс тшöтш шуöны Анастасияöн. Сiйö уджалö Тимшерса бурдöдчанiнын. Сиктса администрациясянь вöзйисны вурны дöра маскаяс, Настякöд öтлаын рытъяснас окотапырысь босьтчим уджö. Корсим öтуввезйысь вуранногсö, вöчим быд чужöм вылö лöсялана маскаяс. Вурим вель уна да разöдiм посёлоксаяслы. Нывъёрткöд ми быдлаын öтлаынöсь. Настя важöнсянь нин тшöтш отсасьö ас окотаöн». Маскаяс разöдiгöн олысьяс ёна шензисны, мый öнiя кадö, кор ставсö вузавлöны, том нывъяс сеталöны сьöм босьттöг. Сёян-юан да лекарствояс новлiгöн нывъёртъяс тшöтш сеталöны маскаяс. Асьныс пыр ветлöны чуня кепысьöн да маскаöн. Анастасия Тарабукиналöн «Тимуровцы» котырысь челядь окотапырысь, эськö, босьтчисны тшöтш тайö бур уджö, но найö тыр арлыдтöмаöсь на. Карантин дырйи отсасьны позьö сöмын 18 арöс тырöм бöрын.
Анастасия серти талун медся сьöкыд олöма да öткöн олысьяслы, кодъяслöн омöль дзоньвидзалуныс да кокниа вермас кöвъясьны коронавирусылöн инфекцияыс, да буретш медся ёна колö отсавны налы. Тимшерысь жö крестьянин овмöс кутысь Николай Васильевич Паршуков быд лун йöзлы новлö йöв (луннас артмö 6-7 мортöдз).
Керчомъяын ёна отсасьöны волонтёръяс Галина Напалкова, Степан Уляшев да Валентина Лютоева. Тайö бур йöзыс ньöбöны да вайöны кильчö помöдз сёян-юан, бурдöдчанторъяс, отсалöны вайны почта, мынтысьöны коммунальнöя могмöдöмысь. Зимстанысь Валерий Осокин да Эдуард Гойхенберг сiдзжö быд лун ньöбöны да разöдöны сёян-юан. Та кындзи Зимстанса юралысь Владимир Николаевич Лодыгинлöн висьталöм серти коланаторъяс новлöны и Дзолльö, Фроловскö да Климовскö сёян-юан ваялöны асьныс олысьяс да рöджвужыс. Кулöмдiнын медыджыд отсöг талун кежлö воö «Надежда» вузасянiнсянь. Екатерина Скобелева ачыс чукöртö телепон пыр корöмъяс, да новлö йöзлы. Новлöмсьыс некутшöм сьöм оз босьт. Вöчны кö кыв-кöртöд, то позьö аддзыны, мый быд лун эм шыöдчöм да отсöг вичмö быдöнлы. Талун кежлö миян районын матö 100 волонтёр, найö артасьтöг отсасьöны и мукöдлы.
Видзöй асьнытö! Кольччöй гортад да лöсьыда олöй! Став лёкыс помасяс!
Артур Гарнов.

Комментарии:

Добавить комментарий

Свежий выпуск: 28 марта

Осторожно — мошенники!