«Коми кыв мем дона»

[ A+ ] /[ A- ]


Кулöмдiнысь Наталия Владимировна Рассыхаеваöс тöда важысянь нин. Варов, сöстöма сёрнитö комиöн. Но некор эг куж мöвпыштны, мый волöма Комиö Волгоград обласьтса öти ыджыд карысь да комисö велöдны босьтчöма сöмын Смолянка посёлоксянь Немдiнса школаö локтöм бöрын. 
— Школаса лыддьысянiнын сэк вöзйисны коми буквар – заводит пö тасянь. Сэсся посёлокъяс-ысь воöм ме кодь роч нывкаяскöд да зонкаяскöд коми кыв велöдны босьтчис Нина Михайловна Гуляева, кодi кужис юраным сюйны, мый коми сёрни зэв мича, коми литература, культура да традицияяс озырöсь, и ставсö тайöс тöдöмыс озырмöдö и мортсö. 
Ме шуда, мый веськалi татшöм велöдысь дорö да школа помалi коми кыв да литература бура тöдöмöн. Öнi челядьлысь гортса уджъяссö вöчигöн сы дорö жö звöнитчывла — пыр отсалö. Аттьö тöлка аньлы да бур велöдысьлы. Тадз жö шуö сылöн вöвлöм уна велöдчысь, — кывкöрталiс Н.В.Рассыхаева. 
Н.М.Гуляева ачыс Пожöгысь, Немдiнö волöма Коми пединститут бöрын 1973-öд воын. Чайтöма: во-мöд мысти эновтас татчöс местаяссö да бöр мунас чужанiнас. Ёна гажтöмтчöма Вичкодорсьыс, муса мамсьыс, чой-воксьыс. Öнi та йылысь казьтыштiгöн сöмын нюмдывлö. Ставсö шыльöдiс-бурöдiс татчöс зонкöд паныдасьöм. Немдiнын чужис выль семья, гозъя кыпöдiсны керка, öти бöрся мöд чужисны пиян. И вöлi радейтана удж, кодлы сетiс 37 во. Крепыда лэдзис вужъяссö нэм кежлö да кытчöкö мунöм йылысь и мöвпыштны оз кöсйы. Сиктсьыс унджыкыс нин сылöн вöвлöм велöдчысьяс, йöзлöн пыдди пуктöмыс – ыджыд дон. 
— Сiдзсö олöм кöсйи йитны связькöд. Ветлi весиг Архангельскö, бура сдайтi экзаменъяс. Но мам эз лэдз мунны: ичöт пенсияöн пö та ылнаын велöдны ог вермы. Мöд вонас пыри пединститутö роч кыв да литература факультетö. Коми велöдысьясöс дасьтан юкöн эз на вöв. Но кодi кöсйис, кыдзи ме, коми кыв да литература велöдiм содтöд лекцияяс вылö волöмöн. Мекöд велöдчисны Алексей Одинцов, Алексей Белых, Всеволод Багаев – ставныс лоисны коми кыв дорйысьясöн. Меным сiдзжö коми кыв дона нэм помöдз. 
Немдiн школаын том велöдысьлы сетiсны юрвыв тыр удж: коми кыв да литератураысь öтдор роч кыв да литература, история урокъяс. 80-öд воясöдз, шойччöг вылö петтöдз, коми велöдiс тшöтш Лидия Фёдоровна Мамонтова, кодлöн вöлi нин уна вося опыт. Сылöн уджысь босьтiс уна буртор. Ассьыс уджсö ёна радейтiс да дзоньнас сьöлöм пöсьсö челядьлы сетiс Галина Фёдоровна Чеснокова. Нина Михайловна аттьö висьталö тайö аньясыслы — уджлы кок подувнас пö найö лоины. Ачыс öтарö жö корсьысис да содтiс сямсö, велöдöмас пыртiс мöвпыштöмторъяс, медым паськöдны челядьыслысь вежöртассö, чужтыны муслун коми небöгъяс дорö, кужны донъявны коми гижöдъяс да с.в. «Чугра», «Алöй лента» да мукöд нималана гижöдъяс серти велöдiс гижны бур рефератъяс, урокъяс да кружокъяс вылын некор эз öлöдлы вензьöмысь: тадз пö найö велöдчисны мöвпавны да висьтасьны. Дерт, мый индöма велöдан программаын, пöртны быть. Но Нина Михайловна корсис позянлунъяс паськöдчыны тема гöгöрыс, ыззьöдiс корсьысьны и челядьсö. 
— Кык кöч кыйи: медводз — небöгъяс лыддьытöг некыдз он вермы вöчны бур уджъяс. Лыддьысянiнын весиг казялiсны, мый коми небöгъяс ветлöны киысь киö. Урок кадыс эз тырмыв гижöд йывсьыс висьтасьны да чукöртчывлiм урокъяс бöрын. Унджыкыс волiсны, гижöдсö лыддьöм бöрад пöсь вензьöм артмывлiс. Мем тайö и колiс: вензьöмыс, öта-мöдлысь мöвпъяссö сюркнялöмыс отсалiс велöдчысьяслы бурджыка гöгöрвоны темасö. Сочинение гижöм водзвылын шулi: эн йöртöй мöвпъяснытö, лэдзöй вöляöн гуляйтны. Мед сöмын эз вошны пуктöм могсьыныс. Зэв бур сочинениеяс вöлiны, менам велöдчысьяс петкöдлiсны бур тöдöмлунъяс и олимпиадаяс вылын. 
Уна альбом колис казьтылöм вылö чужан сикт йылысь. Кор чуйдiс тайö корсьысьöмсö, ыззисны челядькöд бать-мам, пöль-пöч, чой-вок и рöдвуж. Торъя лист бокъяс сиöма гижöдъясöн, серпасъясöн, снимокъясöн вичколы, совхозлы, сельполы, школалы, интернатлы, велöдысьяслы, Ыджыд война пыр мунысьяслы, дöваяслы, тылса уджалысьяслы да уна-уна мукöдлы. Некымынöн туялöмаöсь Немдiнын чужлöм журналист да поэт Эдуард Тимушевлысь олан туйсö да гижанногсö. Кодсюрö весиг экзаменсö сдайтiсны корсьысян удж восьтöмöн. Комиссия сэк вылö донъялiс уджсö Анатолий Игнатовлысь, кодi Гриша дедыскöд дзолясянь ветлывлiс вöравны да пöльыслöн казьтылöмъясысь гижöма бур удж коми вöралысь йылысь. Гижöдсö озырмöдöма чöс туйяс, кыйдöсъяс, кöм-пась, вöр керка, лямпа да вöралысь йылысь уна мукöд серпасöн, вöр-валысь мичлунсö кыйöма фотоаппаратöн. 
Тайö уджъяссö урокъяс вылö босьтлöны öнiя велöдысьяс. А ассьыс сямсö Нина Михайловна сетiс томджыкъяслы. Тшöтш школаö практика вылö волысьяслы. Сы дорын уджалан сям босьтiсны öнi бур велöдысь Тамара Кокко, учёнöй Олег Уляшев, сылöн гöтыр Мария Игнатова, öнiя чина йöз Татьяна Канева, Людмила Игнатова, Светлана Мамонтова. Унаöн мунiсны сылöн кок туйöд. Весиг дзик роч каръясын эмöсь велöдысьяс. Со Воркутаын коми кыв пестö Светлана Тимушева, Ухтаын – Светлана Евсеева. 
Тайö аньсö тöда нöшта районнöй газеткöд йитöдъяс серти. Менам уджалiгöн на ки пыр мунлiсны сылöн гижöдъясыс. Тöдчис сямыс, коми кывсö радейтöмыс, сикт вöсна тöждыс, йöзсö пыдди пуктöмыс – ни öти гижöд эгö бöрыньтлöй, ставсö йöзöдлiм. Лыддьысьысьяслы сiйö козьналiс сiдзжö и чожъяс Сандрик Микол да Сандрик Ёгор, налöн ныв-пи йылысь казьтылöмъяс, висьтавлiс аддзысьлöмъяссö нöшта öти чож Сандрик Педьöкöд, кодi олiс да уджалiс Оренбург обласьтса Магнитогорск карын. Уна гижöд сиис сиктсаяслы. И, дерт жö, сьöлöмыс пыр на висьö мам кыв вöсна. Торйöн öнi, кор сиктса челядь рочмöны, школаын чинö коми кыв велöдан кад, а унджык бать-мамлы таысь веськодь. Но Нина Михайловналöн эм на эскöм, мый коми кыв, культура, коми ног олöмыс дзикöдз оз бырны, и сы ног мöвпалысьыс уна. Аскоддьöмыскöд сиктса культура керкаö чукöртчывлiгöн тай пырджык лывкйöдлöны коми сьыланкывъяс, кысигöн корсялöны коми серъяс, вичкоö мунiгöн сьöрсьыныс нуöны коми нога пöжас… 
Аски Нина Михайловна Гуляевалöн ыджыд юбилей. Чолöмалам! 
Нина Буткина. 
Надежда Игнатовалöн снимок вылын: Н.М.Гуляева медводдза радын веськыдвылын.

Комментарии:

Добавить комментарий

Свежий выпуск: за 5 декабря