Май 14-öд лунö районса депутатъяслöн чукöртчылöм вылын ыджыд вермöмöн чолöмалісны Помöсдінса шöр школаысь коми кыв да литература велöдысь Татьяна Владимировна Уляшеваöс. 
Районса администрацияöн веськöдлысь С.В.Рубан юöртіс, мый тавося апрель лоис районса велöдан юкöнлы зэв тöдчанаöн – «Вося медбур велöдысь» республикаса конкурсын вермис Кулöмдінса шöр школаын суйöрсайса кывъяс велöдысь Ольга Михайловна Сковородникова, коми кыв кузя республикаса медбур велöдысьлысь ним шедöдіс Татьяна Владимировна Уляшева. С.В.Рубан чолöмаліс Татьяна Владимировнаöс да аттьöаліс кывкутöмысь, водзмöстчöмысь. Пасйис, мый сійö вевъялö и школаын бура уджавны, и гортгöгöрса овмöс бегöдны, и «Радлун» котырын сьывны, и сиктса олöмын водзмöстчыны. И медся тöдчанаыс — ассьыс удж радейтöм, сылы сьöлöмöн сетчöм. Тайö сетіс позянлун вермыны тöдчана конкурсын. С.В.Рубан вичмöдіс Татьяна Владимировналы районса администрациясянь козин да аттьöалан гижöд. 
Т.В.Уляшеваöс сідзжö чолöмаліс Госсöветса депутат В.А.Косов. Сійö пасйис: 
— Велöдысьяс – миян страналöн медся ыджыд донъясянтор. Меным нимкодь, мый бара кутісны пуктыны пыдди тайö профессиясö. Талун велöдысьяс дорö зэв ыджыд корöмъяс, уджыс вывті кывкутана, сьöкыд. Велöдысьлы колö сяммыны матыстчыны быд кага дорö, мед восьтны сылысь енби, а сідзжö бать-мам дорö. 
В.А.Косов козьналіс Т.В.Уляшевалы Коми Республикаса Госсöветсянь аттьöалан гижöд да планшет. 
Татьяна Владимировна аттьöаліс конкурсö пырöдчыны ышöдöмысь велöдан управлениеса начальник О.В.Лебедеваöс да пасйис, мый пуктіс став вын, медым вермыны. 
Лидия Липина. 
Снимок Татьяна Тимошиналöн.