Китайсянь Кулöмдiнöдз

[ A+ ] /[ A- ]

Китайсянь Кулöмдiнöдз
Кулöмдiнысь Вадим Яровлы 28 арöс. Ас вывтiыс том зон нуис унатор нин — тöдлiс радлун да шог. Школаын велöдчигöн кöкъямыс во чöж Валентин Николаевич Эрдни-Араев юрнуöдöмöн сiйö велöдчис киöн вермасьöмö. Куимысь лоис республикаса чемпионöн. Спорт кындзи том морт сизим во нырччис ворсны аккордеонöн. Весиг петкöдчылic «Василей» конкурсын. Но вермöмъяс вылö видзöдтöг, курыд юанторъяс видлöм заводитiс торкны Вадимлысь олöм-вылöмсö. Вайöдiс сэтчöдз, мый вит во эз вермы сувтны юöмысь. Став матыссаыс шогсисны, туйдiсны бур олöмö. Курыдтортö юигад некодöс ёна он кывзы. Чайтан ставыс бур, и олöмыд юигад визувтö «югыд» рöмъясöн. «Но тайö ылöдлана мöвпъяс,» — юксис том зон. 2013-öд воын öтчыд водз асывнас Вадим садьмис кутшöмкö юысьяслöн керкаын да аддзис ичöт кагукъясöс. Сылы сэтшöм жаль лоисны найö… Кутшöм олöм виччысьö тайö челядьсö?.. Сiйö дзик пыр звöнитiс мамыслы да шуис, мый талунсянь дугдас юны курыд вина. Вадим дугдöдчис вина юысьяскöд паныдасьлöмысь. Заводитiс ёртасьны накöд, кодi оз корсьысь сулея. Тадзи сылöн олöмыс вежсис бурланьö. Ывлаыс да йöзыс тыдовтчисны мöд рöмъясын – збыльысь югыдöн. Вадим гöгöрвоис, кутшöм ёна дойдалic мамлысь сьöлöмсö. Вина юны шыбитöм эз коль весьшöрö. Том мортлöн лоис бур удж, университетын велöдчöм, гöтыр да пи.
2019-öд воын Вадимöс корисны овны да уджавны Китайö. Зептас сэки вöлi сöмын 5000 шайт. Аслас винёвлун да тöдсаяс отсöгöн эз вош. Аддзис и оланiн, и удж. Овлiс Гонконг, Гуанчжоу да мукöд каръясын. Бöръя кадсö Вадим снимайтчис ыджыд бюджета фильмын. Кино снимайтiгöн чукöртiсны став мирысь уна пöлöс войтырöс. Вöлiны и Голливудысь нималана актёръяс. Вадим кужис веськöдлыны машинаöн, снимайтiгöн сiйöс пуксьöдiсны руль сайö. Фильмсö лöсьöдны помöдз эз удайтчи. Коронавирус торкис ставлысь кöсйöм-думыштöмсö. Суйöрсайысь воöм гöсьтъясöс мöдöдiсны гортаныс. Вадим öдва аддзис самолёт да Питер пыр бöр воис Кулöмдiнö. Вирус вылö Вадимöс видлалiсны вель унаысь — Китайын, Россияса аэропортын, Комиын. Нинöм эз аддзыны.
Лёк висьöмлöн чужöм йылысь эм уна версия. Китайысь воöм том мортлöн висьталöм серти Ухань карын кутшöмкö пöль пуöма бордашырысь шыд да висьмöма коронавирусöн.
Китайын олiгöн Вадимлы воис сьöлöм вылас сэтчöс культураыс, йöзыс. Но сёян-юан дорö сiдз эз и велав. «Найö сёйöны быдсяма гагъяс, гут да тöрöканъясöс. Сёяныс вывтi лэчыд кöра. Няньыс юмов. Яй вежöны сояöн. Та вöсна колö тöдны, кытысь мый позьö ньöбны,» — висьталiс Вадим. Свеклö Китайын оз быдтыны. Найö ёртыскöд корöмаöсь почта пыр свеклö да пуöмаöсь борщ.
Вадимöс бара нин корöны уджавны, но öнi Китай нин оз лэдз суйöрсайысь гöсьтъясöс. Лэдзасны кö, быть ковмас кык вежон пукавны йöртöмöн карантинын.
Вадим оз шогсьы. Вермас уджавны и Россияын. Май 7-öд лунö сылы тырас 29 арöс. Сиам сылы бура да дзоньвидзаа олöм.

Артур ГАРНОВ.

Комментарии:

Добавить комментарий

Свежий выпуск: за 9 июля