Каля

[ A+ ] /[ A- ]

Эжва дорын сэтшöм гажа! Уялöны челядь, нимкодясьöны гожöмлы. Енэжын абу весиг кымöртор. Пöжö, а ю дорын ыркыд, лолыдлы кокни. 
Рытланьыс, кор берег дорын йöзыс чиныштiсны, локтiс вугыр шатина олöма айлов, босьтчис кыйсьыны. Лэптiс ваысь некымын чери, сэсся горöдiс: 
— На-на! На-на! 
Мый нö сiйö лоис, кодлы тадзисö горзö? Гашкö, мыйкö миянлысь кöсйö юавны да? Друг мöдар берегсяньыс миянладорланьö лэбзис каля, лайкыда легöдiс паськыд бордъяснас. Ачыс мича, лым еджыд. Локтiс да кутiс гöгравны айлов весьттi. Збыль али мый каляыс локтiс сылöн горöдöм вылö? Олöма морт шыблалiс черисö вывлань, а лэбач куталiс. Номсасянтор бырöм бöрын каля пуксис кер пом вылö, тыдалö, виччысис, оз-ö нöшта мыйкö сетыштны. Айлов шудаа нюмъялiгтыр кыйсис водзö, кыйöмторсö сеталiс калялы «на-на, на-на» шуалiгмоз. Сiйö нюмъялiс и ми нюмъялiм, сэтшöм виччысьтöмтор аддзим да. 
Бöрыннас олöма морткöд воим сёрни вылö. Сiйö висьталiс, мый 50 во нин олö чужан сиктысь бокын, но век аддзö кад волыны Кулöмдiнö, бать-мамыслöн керкаö, кодi сулалö дзик Эжва бокын. Зэв ёна радейтö тайö гажаинъяссö. Калясö велöдiс посни чери шыблалöмöн. Шуа пö вöлi: на-на, сёй. Тадзи и нимыс лоис. 
Тшöкыда на аддзылiм чери кыйысь дядьööс, и век дiнас гöгралiс каля. Эжва юыслöн мичлун, шоныд гожöм, На-на нима мича еджыд каля — тайö ставыс колис паметьö, сьöлöмö зэв донаторйöн. 

Агафья Уляшева. 
Кулöмдiн.

Комментарии:

Добавить комментарий

Свежий выпуск: 28 марта

Осторожно — мошенники!