Матысмöны тöдчана гажъяс: Победалы 74 во тырöм, районлöн да Кулöмдiнлöн чужан лунъяс. Татшöминъясö торйöдлöны пельöс, кöнi тшöтш петкöдлöны чукöртöм уна пасйöдъясöн, казьтылöмъясöн, снимокъясöн Кулöмдiнлы сиöм альбомъяс. Позьö шуны: тайö альбомъясас — юрсиктлöн сöвмöмыс, йöзлöн олöмыс. Збыль тадз и эм. Листыштлам. Со Ыджыд Войналы сиöм некымын альбом, кöнi висьталöма Кулöмдiнысь тыш вылö ветлысьяс да тылын олöм кутысьяс йылысь. Сьöлöм вöрзьöдö сiйö, мый унджыкыс нин мунiсны миян дорысь, а гижöдъясын найö быттьö ловъяöсь. Водзö гижöй на йылысь. 
Эмöсь альбомъяс, кöнi Кулöмдiн йылысь висьтасьöмыс Кывтыдсянь Катыдöдз мунöмöн. Мед лоö гöгöрвоана лыддьысьысьлы, стöчмöда, мый Кулöмдiн, кыдзи и мукöд коми сикт, юксьылiс торъя нимъясöн шорсянь мöд шорöдз босьтöмöн. И быд грездлöн вöлi аслас олöм: колхозъясын удж, совхозъясö котыртчöм, предприятиеяслöн да учреждениеяслöн сöвмöм, тöдчана пасъяс да водзмöстчысьясöс нимöдöм, мукöдтор. Бур йöз отсöгöн грездъяслы восьтöм альбомъясö унатор жö гижöма нин. Но колины на куш лист бокъяс. Медся жеб висьтасьöмъяс бырöм предприятиеяс да сэнi уджалысьяс йылысь. Пöшти нинöм абу Кулöмдiнса леспромхоз, кылöдчан контора, промкомбинат, Верхне-Вычегодскöй леспромхоз, райпотребсоюз, би сетан вöвлöм станция, начкысянiн, «Сельхозтехника», йöв завод, киносеть да мукöд уджаланiнъяс йылысь. 
Тöдöмысь, уналöн гортаныс эмöсь снимокъяс, казьтывланныд и уджалан вояс, ёртъяс йылысь — корам юксьыштны тайöн альбом вöчысьяскöд. Вöчанныд татшöм воськов, водзöсыс бергöдчас талунъя олысьяссянь, быдмысь войтырсянь, кодъяслы сiдзжö колö тöдны чужанiныслысь олöм-вылöмсö, ыджыд аттьöалöмöн. Пыртны позьö шöр библиотекаö «Нина Буткиналы» пасöн. 
Водзвыв аттьöалам да виччысям выль юöръяс. 

Нина Буткина. 
Кулöмдін.