«Кувлытöм полклöн» восьлалöмö пырöдчисны Дiасёръяса олысьяс. Май öкмысöд лунö школа дорö чукöртчис сёысь унджык морт, мунiгöн öтувтчисны посёлокса мукöд олысьяс. 
Посёлок кытшовтöм бöрын война вылын вöвлöмъясöс казьтылан пас дорö пуктiм дзоридзьяс да венокъяс. Юралысь М.В.Опарина казьтылiс батьяслысь да пöльяслысь повтöмлунсö, найöс, кодъяс вöрöгкöд тышын пуктiсны юр либö вошисны туй ни пом. Ыджыд вермöмлöн тöдчанлун йылысь висьталiс В.В.Насирова. Став чукöртчысьöс чолöмалi и ме. Лыддьöдлi найöс, кодъяс ловъяöн бергöдчисны война вылысь да уджавлiсны Помöсдiнса леспромхозлöн Вöльскöйса лесопунктын. Войнаса ветеранъяс кузя юöръяс чукöртi рöдвужыслысь. Гажöдiсны садса да школаса челядь, «Вкус» да «Вöльса аньяс» котыръяс. 
Тылса уджалысьяскöд да войнакадся челядькöд чай юигöн казьтылiм сiйö кадсö, кор став сьöкыдыс усис налöн пельпомъяс вылö. Найö эз тöдлыны шуда челядьдыр, уджалiсны верстьöкöд öттшöтш. Волiс 13 морт. Медся олöмаыс К.С.Чисталёва, кодi чужис 1925-öд воын. 
Аттьö посёлокса юралысь М.В.Опариналы, кодi аслас машинаöн вайис и нуис олöмаясöс. Аттьö и олысьяслы, кодъяс Победа лун кежлö пелькöдiсны гöгöрбок. 
Ставныслы водзвыв гортас ветлöмöн сетiм гöснечьяс. Югыдтыдорсаяслы олöмаяслöн районса котырсянь козинъяс нуам ва усьöм бöрын. 
Нина ШАТОХИНА, 
олöмаяслöн Дiасёръяса котырöн юрнуöдысь. 
Снимок гижысьлöн.