Кадысь водз эштöдiсны Кулöмдiнса Ленин улича вылын уна патераа керкалысь вевт вужвыйöн дзоньталöм. Урчитлiсны август 30-öд лунö, а сигöртiсны август 8-öд лунö. Сизим час асыв бöрын уджалысьяс вöлiны нин керка вевт вылын. Сизим час рытын пыр на клёнöдчисны, вундасисны-тувъясисны. Уджалiсны и шойччан лунъясö. Зэв сюся ветлiсны вильснитöмысь да усьöмысь видзанторъясöн да кутöдъясöн. Тадзи кадöн артасьтöг зiлис Сыктывкарысь асшöр уджалысь Евгения Сергеевна Чувьюровалöн вит морта котыр. 

— Босьтчим июль 8-öд лунö. Перйим важ шипер да стрöпилöяс вылысь пöвъяссö, стрöпилöяссö мавтiм öзйылöмысь видзан сорасöн, вольсалiм шоныд кутöд, профнастил улö пуктiм кöтасьöмысь видзан изоспан. Резьöдiм да вылысь тэчим вевт вылысь тшын петан трубаяс. Найöс эжим кöрт листöн, вылас вöчим зонтик сямаöс. Тадзи ми кирпичсö видзам ваысь да шондiысь, да и бурджыка кутас кыскыны. Вöчим лöскö каян да вевт вылö петан выль öдзöсъяс, вевт вылын лым кутöдъяс да трубаяс бокын посъяс. Асланым уджысь кывкутам вит во. Коркö вужвыйöн жö вежим Воркутаса öти керкалысь вевт, кад кольöм бöрын звöнитiсны, виялö пö. Мунi, олысьыс вевт вылö лэптöма антенна да сiйöс сувтöдiгöн кабель перйöм могысь вöчöма ыджыд розь. Танi ми абу мыжаöсь, тадзи вöчны оз позь, — сёрнитiс мастер Максим Владимирович Кочанов. 

Август 14-öд лунö донъя-лiсны вöчöмсö. Волiсны районса администрацияöн веськöдлысьöс вежысь Василий Витальевич Бадьин, мутас сöвмöм кузя юкöнöн веськöдлысь Николай Иванович Пашнин, «Кулöмдiн» овмöдчöминса администрацияöн веськöдлысьöс вежысь Виктор Петрович Нестеров, асшöр уджалысь Евгения Сергеевна Чувьюрова, «Вужвыйöн дзоньталöм» республикаса операторсянь Евгений Владимирович Оботуров. Вöлiны и патера кутысьяс. 

— Фондса специалистъяс волiм уджö босьтчытöдз да видзöдлiм, ставсö донъялiм-арталiм, дасьтiм смета. Аукцион вылын вермис асшöр уджалысь Е.С.Чувьюрова. Вежон либö кык вежонö öтчыд волывлi да видзöдi, мед уджалысьяс кутчысисны дзонтасьöмын урчитöмторъясö. Торкалöмъяс эз вöвны. Тайö жö улича вылын Евгения Сергеевналöн мöд котыр вежис нин уна патераа керкалысь вевт, сiйöс примитiм жö, — висьталiс Евгений Владимирович. 
— Водзтi олысьяс асьныс дöмлiсны вевт вияланiнъяс, а öнi выль вöчöмöн керкаыс быттьö нюммунiс, — кыпыд русö эз дзеб патера кутысьясöн юрнуöдысь Ирина Александровна Сурнина. 
Пасъям, Евгения Сергеевналöн уджалысь котыр таво вужвыйöн вежас вевт и Помöсдiнын. 2014-öд восянь тайö программаö районысь веськалiс 7 керка, 2017-öдын — 2, 2018-öдын – 3, 2019-ын – 1. Кöнкö öтувъя ветланiнысь вежисны би провод, кöнкö вежисны вевт. Локтан воын тайö программаас урчитiсны уна патераа 9 керка. 
Марина Дадашова. 
Снимокъяс гижысьлöн.