Кадетъяслöн öтмунöмлы вит во

[ A+ ] /[ A- ]


Кадет — чужан му, ас войтырöс радейтысь, пыр дась дорйыны айму, ёртъясöс, бать-мамöс, сьöлöмсянь зiльысь, повтöм морт. Олöмö нин пырис, мый ноябр нёльöд лунö — йöзлöн öтувтчан лунö да пытшкöсса делöяс кузя юкöнъясын уджалысьяслöн лун водзын (а пасъям ми сiйöс ноябр 10-öд лунö), Кулöмдiнса школаысь нывкаясöс да зонкаясöс кыпыда примитöны кадетъясö. Ёртъяс, бать-мам да велöдысьяс водзын таво кадетлысь кыпыд кöсйысьöм сьöрсьöн-бöрсьöн сетiс витöд «К» класса 17 велöдчысь. Салдатъяс моз мичаа восьлалöмöн петiсны районса культура керкалöн сцена вылö, сёрнитiсны гораа да кыпыда. Кöсйысьöмъяссö кывзiс да кадетъясöн лоысьясöс чолöмалiс пытшкöсса делöяс кузя министерстволöн районса юкöнысь общественнöй пöрадок видзöм кузя полицияса начальникöс вежысь А.В.Хлопин, корис велöдчысьясöс пыр кутчысьны сетöм кывъясö да висьталiс, мый быдмöм да водзö велöдчöм бöраныс виччысьö найöс уджавны полицияö.
Кулöмдiн районын Россияысь пытшкöсса делöяс министерстволöн юкöнöн веськöдлысь Андрей Михайлович Литвинов пасйис, мый тайö лунсянь кадетъяслöн олöмын медтöдчана могыс — лоны кывкутысьöн, мед велöдчысьяс оз уськöдны морттуйсö, бура велöдчасны, лоасны пыр дасьöн уськöдчыны отсöгöн, повтöг вуджасны став сьöкыдсö. Сиис вермыны быд босьтчöмын, пыдди пуктöмöн новлöдлыны кадетлысь ним.

  • Позьö шуны, талун кадетъяслöн öтмунöмлöн тшупöда пас — тырис вит во, кыдзи котыртчис налöн медводдза класс. Тайö котырыс миян школаын витöд, ставнас 91 кадет, — сёрнитiс Кулöмдiнса школаысь директорöс вежысь Марина Константиновна Цан, а сэсся шыöдчис витöд класса нывкаяс да зонкаяс дорö, мед найö и олöмын, и велöдчöмын вöлiны медся бурöсь, öд на вылö видзöдöны школаса став велöдчысьыс. Аттьöа-лан гижöдъясöн пасйис бура велöд-чысьясöс да быдлаын водзмöстчысьясöс: Вероника Напалковаöс, Марина Тарабукинаöс, Екатерина Никоноваöс, Тимофей да Алексей Игнатовъясöс, Полина Костинаöс, Дарья Уляшеваöс, Николай Липинöс, Андрей Панюковöс, Дарина Петроваöс, Сергей Погуляевöс, а сiдз жö 9-öд «К» классöн веськöдлысь Олег Олегович Коноплёвöс да районса культура керкаысь гаж нуöдны отсасьысь художествоа веськöдлысь Ирина Александровна Гулькоöс.
  • Меным кольöм воын сетiсны кадетъяслысь 8-öд класс. Витöд классянь öтувтчисны да олöны-велöдчöны öта-мöдлы отсасьöмöн. Абу нин дзоляöсь, унатор вöчöны отсавтöг ас кежысь. Сёрнитам, да эмöсь военнöй вузъясö пырны окотитысьяс. Гöгöрвоана, мыйла бöрйисны. Кадетъясысь быдтам айму аскиа дорйысьясöс, ыджыд тöдчанлун сетам дзоньвидза оласноглы, ёнмöдчöмлы, мед кужисны дорйыны асьнысö да мукöдöс, — пасйис 9-öд «К» классöн веськöдлысь О.О.Коноплёв.
  • Ме во на и велöдча кадетъяслöн классын. Сöмын öти «4», сэсся ставыс «5». Ставсö кö ас кадö вöчан, удитан быдлаö. Ветлöдла киöн да дзюдоöн вермасян, картаöн да компасöн корсьысян секцияяс вылö, айму туялысьяслöн котырö да мукöдлаö. Отсала гортын бергöдны овмöс, рытъяснас ёртъяскöд гуляйтам на и, — висьталiс квайтöд класса велöдчысь Вероника Напалкова.
    Йöзлöн öтувтчан лунöн ставнысö чолöмалiс районса администрацияöн веськöдлысь Сергей Владимирович Рубан. Висьталiс тайö праздниклысь артмöмсö да тöдчанлунсö, мый офицеръяс петiсны кадетъяслöн велöдчанiнъясысь, суворовскöй училищеясысь. Талунсянь лоысь кадетъяслöн пансис зэв кывкутана выль олöм, кодi пуктас аскиа лунлы подув.
    Спорт шöринса директор Елена Дмитриевна Кузнецова пыдди пуктö спортын водзмöстысь кадетъясöс, кодъяс бура петкöдчöны районын да республикаын да вермöны. Документъяс сетiс картаöн да компасöн корсьöм, кырт йылö кайöм, туристалöм, спортпоход кузя разряд шедöдысьяслы, аттьöалiс челядьöс да отсöгысь налысь бать-мамöс. Шахматöн ворсöмын разряд босьтысьясöс пасйис да сетiс книжкаяс содтöд тöдöмлун сетысь Андрей Сергеевич Третьяков.
    Кадетъяс петкöдлiсны сьылан, йöктан, вермасян сям. Витöд класса велöдчысьяс сюся видзöдiсны ыдж-ыдджыкъяс вылö. Найö тшöтш кöсйöны лоны на кодьöн жö. Сьöкыдлунъясысь эз повзьыны Агния Витальевна Зезегова да сылöн Элеонора нылыс.
  • Олöмыс сэтшöм, мый öнiя челядьöс колö велöдны быдторйö. Буретш кадетъяслöн классын велöдöны овны ас мывкыдöн, öта-мöдлы отсасьöмöн, сьöкыдлунъяс венöмöн да с.в. Эска, сьöкыдлунъяс вылö видзöдтöг, кутам велöдчыны ыджыд кывкутöмöн, — висьталiс ань.
  • Кадетъяслöн велöдчöмлöн да олöмлöн подулын дисциплина, мый ёна колö öнiя челядьлы. Бур, мый тайö челядьсö дон босьттöг содтöд новлöдлöны велöдчыны-ёнмöдчыны «Олимпикö». Миян семьяын ыджыд тöдчанлун сетам спортлы, пикöд öнiсянь дасьтысям лоны военнöйöн, — содтiс Виталий Александрович Обрезков, кодлöн пиыс лоис кадетöн.
    Кадетъяслысь витöд класс сетiсны Никита Иванович Поповлы, ОБЖ велöдысьлы.
  • Челядькöд уджала витöд во. Кольöм воын нин висьталiсны, мый менам лоас тайö классыс. Ме велöда кадетъяслысь мукöд классъяс да висьтала, мый найö кывкутысь, шань, зiль челядь. Эска, и менам классаяс лоасны сэтшöмöн жö. Кутам уджавны уна да ёна бать-мамкöд öтув, — кывкöртiс Н.И.Попов.
    Марина Дадашова.
    Гижысьлöн снимокъяс вылын: кадетъяскöд классöн веськöдлысь Н.И.Попов;
    А.С.Третьяков шахматöн ворсöмын разряд босьтысьяскöд.

Комментарии:

Добавить комментарий

Свежий выпуск: за 7 ноября