Йöзöс уджöн могмöдан районса шöрин зiльö быд шыöдчысьлы корсьны да аддзыны колана, сьöлöм сертиыс удж, босьтны выль специальносьт, могмöдны регыд кежлö да общественнöй уджъясöн, ышöдны да отсавны асшöр уджö босьтчысьяслы. /нi шöринын 10 морт. Ыджыд сяма специалистъяс Наталья Николаевна Липина, Эльвира Викторовна Решетняк, Галина Николаевна Турьева, Елена Николаевна Мусина туйдiсны-велöдiсны 2011-öд восянь шöринö том локтысьяс Нина Александровна Лодыгинаöс, Ольга Викторовна Шешуковаöс, Анна Николаевна Тюрнинаöс, Александра Валериевна Булышеваöс, Ольга Павловна Денисенкоöс, Ольга Павловна Поповаöс, кодi 2017-öд вося июль 27-öд лунсянь директор. Кольöм восянь водителялö Илья Андреевич Лопырев. 
Удж воштысьлы отсалö психолог. Сiйö жö висьталö, кодлы кутшöм удж лöсялö. Велöдö, кыдзи удж корсигöн сёрнитны веськöдлысьяскöд, мый юавны, кыдзи кутчысьны, юöртö, мый удж позьö аддзыны газетъяс, юöръяс да интернет пыр. 
Шöрин бур йитöда сикт-посёлокса юралысьяскöд, уджалан котыръясöн веськöдлысьяскöд. Найö шöринын пасйысьысьясöс тöлысь кежлö босьтöны общественнöй да недыркадся уджъяс вылö. Кодъяслы сьöкыд корсьны удж, найöс вермасны босьтны кык тöлысьöдз. Тайö челядьöс öткöн быдтысьяс, уна челядяяс, вермытöмъяс, армияысь локтысьяс, пукаланiнъясысь бергöдчысьяс, велöдчанiнъяс помалысьяс да с.в. 
Отсалöны техникум, колледж, вылыс тшупöда велöдчанiнъяс помалысьяслы. Морт кö шыöдчö шöринö, специалистъяс шыöдчöны сэтшöм котыръясö, кöнi эм сылöн специальносьт серти удж. Котыръясöн веськöдлысьяс и асьныс шыöдчöны шöринö, корсьöны колана специалистöс. Босьтöны кö уджавны, том мортлы медводдза тöлысьын удждон кындзи сьöм вичмöдö и шöрин. Бура кö петкöдлас асьсö, веськöдлысь коляс уджавны. Отсалöны и вермытöмъяслы. Босьтiсны кö сiйöс удж вылö да лöсьöдiсны уджаланiн, то сьöм вичмöдö уджöн могмöдан да йöзöс социальнöя доръян министерство. 
Шöрин ыстö и велöдчыны. Эмöсь йöз, кодъяс вöзйысьöны велöдчыны асьныс. Шыöдчöны и уджалан котыръясöн веськöдлысьяс, мед велöдiсны налы колана специалистöс. Велöдöны и пенсионеръясöс да вермытöмъясöс. 
Шöрин отсалö 14-сянь 18 арöсöдз тыр арлыдтöмъяслы. Таво урчитiсны могмöдны уджöн 450 томуловöс. 
Тавося январсянь «Уджöн могмöдöм йылысь» законö пыртiсны вежсьöмъяс. Водзтi кö асшöр уджö босьтчысьяслы шöринсянь сетiсны 58,8 сюрс, то öнi 96 сюрс шайт. Уджтöмалöмысь медся ичöт сьöма отсöг вöлi 1020, а öнi 1800 шайт. Сетöны налы, кодъяс уджавлiсны 26 вежонысь этшаджык, петiсны асьныс либö вöтлiсны, кодъяс эз на уджавлыны, кöсйöны уджавны коставлöм бöрын да с.в. Вештасны куим тöлысь. Медся ыджыд сьöма отсöг вöлi 5880, лоис 9600 шайт. Водзтi босьтлiсны во чöж, öнi сöмын квайт тöлысь. Сiйöс сетöны налы, кодъяс удж вылысь петiсны бöръя 12 тöлысьöн да уджалiсны 26 вежон. Медводдза куим тöлысьсö кутас воны шöркодь удждонлöн 75, мöд куим тöлысьнас 60 процент. Кöть вöлi ыджыд удждон, 9,6 сюрсысь унджык оз сетны. Вöлi кö ичöт удждон, сы серти жö и арталасны сьöма отсöг. 
Тöдвылö босьтiсны йöзöс, кодъяслы пенсияöдз колис вит во. Мед найöс пасйыны шöринын, колö пенсия фондлöн управлениеысь босьтны эскöдан гижöд. Во чöж вештасны 1800 шайт налы, кодъяс 12 тöлысьöн уджавлiсны 26 вежон. Та мында жö, но сöмын куим тöлысь вештасны налы, кодъяс эз на уджавлыны да корсьöны удж, водзтi уджавлiсны, шöрин ыстывлiс велöдчыны да вöтлiсны велöдчанiнысь. Позяс пасйысьны водзö, но сьöма отсöг босьтас сöмын во мысти. Медся ыджыд сьöма отсöгыс öнi 13536 шайт, кодi вичмö во чöж. Сiйöс сетöны налы, кодъяс удж вылысь петiсны бöръя 12 тöлысьöн да уджалiсны 26 вежон. Медводдза куим тöлысьöн вештасны шöркодь удждонысь 75, нёль тöлысьсö 60 да мукöдсö 45 процент. 
Уджöн могмöдан шöрин быд во чукöртлö гырысь классъясса велöдчысьясöс. Волöны техникумъясысь, колледжъясысь, вузъясысь веськöдлысьяс, тöдмöдöны, кöнi да кодö велöдöны. Чукöртлö и удж корсьысьясöс, тöдмöдö, кутшöм специалистъяс кытчö колöны. Ветлö и сикт-грездъясö. 

Марина ДАДАШОВА. 
Гижысьлöн снимок вылын: шöринын уджалысьяслöн котыр.