Июль 27-öд лун — вузасян юкöнса уджалысьяслöн лун

[ A+ ] /[ A- ]

Лариса Сергеевна Голосова школа помалöм бöрын кöсйис велöдчыны кооперативнöй институтын, но туйсö «вомöналiс» ыджыд мамыс. Миян пö рöдын сiдз нин уна вузасьысьыс, а сиктын медся пыдди пуктана уджыс велöдысьлöн. Кывзысис, пырис Сыктывкарса öтиöд номера педучилищеö, лоис ичöт классъяс велöдысьöн. Уджалiс Сыктывкарса школаын, öттшöтш велöдчис коми пединститутын. Но пыр кылiс, мый тайö уджыс абу сылöн, да петiс. Секретаралiс ыджыд уджалан котыръясын. 
— Вузасьысьöн лоны мöвп юрысь эз петав. Сёрнитiм верöскöд да шуим петны ас нянь вылö. Зэв бур, мый республикаын сетöны ыджыд тöдчанлун асшöр удж сöвмöдöмлы, велöдöны босьтчысьясöс, отсалöны и водзö. 2014-öд воын Эжваын велöдчи бизнес-инкубаторын. Сiйö жö воын бергöдчи чужанiнö, Помöсдiнö. Танi эз вöв мебельöн вузасянiн. Лавкаясö вайлiсны корöм серти, йöз асьныс ветлiсны юрсиктö да юркарö, тайö сувтлiс вель дона. Лыддим зэв коланаöн медводз восьтны мебельöн вузасянiн. Помöсдiнын эм бурдöдчанiн, сберкассалöн юкöн, вузасянiнъяс да мукöд котыръяс. Сиктö быд лун волывлöны «Дiасёръя», «Вöльдiн», весиг «Пожöг» овмöдчöминъясысь, да йöзлы зэв воис сьöлöм выланыс. Öнiя кадся пызан-пуклöс, крöвать-шкап да мукöдтор ваям Россия пасьтаысь мебель кызь вöчанiнысь, Кировын вöчöны йöзлöн корöм серти. Донъяс серти эм мый бöрйыны и томъяслы, и олöмаяслы. Мебель выльмöдны окотитысьяс шыöдчöны телефон да интернет пыр. Помöсдiнын вайöмсö нуам гортöдзныс, а Кулöмдiнын сёрнитчим öти водителькöд да налы, кодъяс ньöбасисны 30 сюрс шайтысь унджык, гортöдзныс ваям дон босьттöг. 2016-öд вося февральын татшöм жö лавка восьтi Кулöмдiнын, майын — сёян-юанöн вузасянiн Помöсдiнын. Но став керкасö кöртымала да кольöм во помын Помöсдiнын асьным кыпöдiм сэндвич панельясысь лавка, колис вöчны пытшкöс уджъяс. Лоас и склад. Эм кык машина, лавкаясö став коланасö ваялöны верöсöй да ыджыд пиöй. Уджöн могмöдi сизим мортöс. Медым аслым удж кузя быдмыны водзö, кольöм во помын велöдчи асшöр уджалысьяслы отсöг сетан «Шондi» шöринын, — сёрнитiс ань. 
Локтан воын жö Скöрöдумын босьтчисны кыпöдны керка. Резьöдiсны пöрысь ыджыд мамыслöн керкалысь öтарладорсö, а олiсны мöдарас. Выльö пырисны нин. Верöсыс Визинысь. Эз вöв паныд гöтырлöн чужанiнö локтöмысь. Сылы сьöлöм вылас воисны татчöсiнъяс, йöзыс. 
Марина ДАДАШОВА. 
Снимок Лариса Голосовалöн чукöртöмысь.

Комментарии:

Добавить комментарий

Свежий выпуск: за 26 марта