Июль 1 лун — тыш-косьса ветеранъяслöн лун

[ A+ ] /[ A- ]

Волiс Сирияöдз

Коймöд во нин республикаын кутам пасйыны тыш-косьса ветеранъяслысь лун. Ичöт Кужйысь Игорь Николаевич Тарабукин кöть и том на, но ветеран нин.

— Школа помалöм бöрын мунi велöдчыны Сыктывкарса вöр институтö, — панiс сёрнисö Игорь Николаевич. — Артмис сiдз, мый 2015-öд воын, 4 во велöдчöм бöрын, контракт серти мунi служитны армияö, веськалi Мурманск обласьтö Спутник посёлокö. 2016-öд вося январсянь апрельöдз часьтнымöс мöдöдiсны командировкаö Сирияö видзны Хмеймим авиабаза. Сэсся бöр бергöдчим Мурманск обласьтö. Медводдзаысьсö контракт кырымавлi кык во кежлö, а сэсся быд во нюжöдi во кежлö.

Но кыскис чужанiн. 2022-öд воын бергöдчис 6 во служитöм бöрын. Удж корсигöн ёртъясыс вöзйисны шыöдчыны пытшкöсса делöяс кузя министерстволöн районса юкöнö, буретш ГИББД-лöн районса юкöнö корсисны уджалысьясöс.

— 2022-öд вося июньсянь октябрöдз стажёралi, тöдмаси уджыскöд. Туйдысьöн-велöдысьöн индiсны туйвыв патруль службаын инспектор, полицияса лейтенант Богдан Сергеевич Кипрушевöс. Гожöмнас жö велöдчи да босьтi водительлысь удостоверние. Сiйö жö вося декабрын сетiсны младший лейтенант чин. Сэсся велöдчи пытшкöсса делöяс министерство бердын уджалысьясöс дасьтан шöринын, — сёрнитiс том морт.

Игорь Николаевич туйвыв патруль службаын инспектор. Лун-вой ветлöны Кулöмдiнын, петавлöны районö. Шойччан лунъясö волöны Помöсдiн, Немдiн, Зимстанö да мукöд ылi сикт-посёлокъясö. Öлöдöны, велöдöны челядьöс видзчысьны туй вылын неминучаысь, эрдöдöны код юрöн да правотöг руль сайö пуксьысьясöс, пасйытöм машинаöн ветлысьясöс, штраф вештытöмъясöс да с.в.
Алёна ЕРМАКОВА.
Марина Дадашовалöн снимок вылын Игорь Николаевич Тарабукин.

Комментарии:

Добавить комментарий

Свежий выпуск: 18 апреля

Осторожно — мошенники!