Ичöтсянь тöдлiс сьöкыд удж

[ A+ ] /[ A- ]

Кöнi чужи, сэнi кола 

Август пансигöн Ручысь Мария Васильевна Поповалы тырис 81 арöс. Сiйö ичöтик тушаа, варов, мича нюмбана, йöз дорö сибыд морт. Кöть бать-мамыслöн, Василий Ефимовичлöн да Анна Степановналöн, сiйö вöлi öтнас (вокъясыс кувсисны ичöтöн), но бергöдчисны сьöкыда. Школаö котралiс сизим классöдз, велöдчис бура, сöмын «4» да «5» вылö. Водзö тöдöмлун босьтны эз мойви. Зэв эськö ёна кöсйис велöдчыны Ульянаса видз-му овмöс техникумын зоотехникö либö агрономö, но мамыс эз лэдз сэтчö муннысö. Сiйö и гöгöрвоана, öд сылы öтнаслы ковмис пыкны-кутны овмöссö медся сьöкыд война да сы бöрся воясö. Верöссö босьтiсны фронт вылö война пансигас на. Нуигас ёна и топöдлiс Аннушсö морöс бердас да шуис: «Аннуш, колхозсьыд эн пет, Машуктö бура видз». Усис кöнкö Москва дорын. Мамыслы волiс бумага, мый вошис юöртöг. Ань 31 арöсöн колис дöваöн. Уджалiс сiйö колхозын, мырсис сэнi водз асывсянь сёр рытöдз, со и колiс гортгöгöрса удж бергöдны отсавны сылы. Прöст здукъясö мамыс пуксьылiс кысян удж сайö. Сылöн мастер киясöн артмылiсны ок и мича кыöмторъяс. Кужлöма и веськöдчыны. Öнi на сиктсаясыс бурöн казьтывлöны сiйöс. 
Мария Васильевна колхозын ичöтсянь мамыслы отсасьöмсянь пыр тöдiс сьöкыд удж. Колхозын сэсся совхозын вöдитiс градвыв пуктасъяс. Гожöмын муяс вылын уджалöмысь кындзи мöдöдлiсны видз вылö турун пуктыны. Ставсö вöчлiсны кипомысь на. Нелямын лун чöж ытшкасны вöлi, сэсся куртасны-зорöдаласны. Кöть и сьöкыд, но сiйö кадыс вöлi медся кыпыд здукъясöн. Майбыр, том дырйиыд мудз он тöдлы. Быд удж бергöдлiсны сьылiгтырйи. Сэнi жö и паныдалiс верöссö, Алексей Васильевичöс. Сiйö вöлi трактористöн. Зэв уджач, тэрыб вöраса. Уджавлiс пемыдсянь пемыдöдз жö. Торйöн нин гöра-кöдза дырйи да турун пуктiгöн эз чеччыв трактор вывсьыс. Пыр дзудзис «кöрт вöвсö»: сöмын на помасясны пуктысян уджъяс, дзоньталö-дасьтö нин сiйöс видз вылö петiгкежлö. А сы бöрын — арся страдна кежлö. И сiдзи во гöгöр чöж. Гозъя коркö тай удитлiсны жö волыны гортаныс. Вевъялiсны на лöсьöдны-быдтыны кöкъямыс челядьöс, вит нылöс да куим пиöс. Ичöтсянь жö велöдiсны найöс уджö. Кор дiнаныс на найö вöлiны, майбыр, эз ков тшöктыны-индыны, асьныс нин бергöдiсны гортгöгöрса уджтö. Гöгöрвоисны, мый бать-мам удж вылысь локтасны мудзöсь. Ковмылiс кö налы, шуам, мича платтьö ли нöшта мыйкö, асьныс корсьлiсны удж, медасьлiсны кодлыкö мöс видзны либö турун пуктыны. Бать-мамлысь та вылö сьöм эз нин корлыны. 
Важ кадсö, семьяыскöд кыпыд олöмсö казьтывлiгöн, Мария Васильевна быдсöн чужöм вылас томмывлö. Да сöмын тай öнi верöсыс важöн нин абу дiнас, кувсьылiс томöн, кор сылы вöлi 57 арöс. Сiйöс, дерт жö, жугöдiс ичöтсянь помтöм сьöкыд уджыс, кынмалöмыс да война кадö тшыгъялöмыс. Гортас пуксьывны эз удитлы ни, öд пыр олiсны скöтöн. Некор эз орлыны яйысь ни йöла вöлöгаысь. Мария Васильевна öтнас олiгöн сюруктö дыр на видзис. Квайтымын арöс бöрын нин, кор киясыс эз кутны кывзысьны, сöмын лэдзчысис сыысь. Аньлысь сьöлöмсö жугöдö и сiйö, мый кык пиöс да кык нылöс нин лоис дзебны. Тамара нылыс кувсьöм бöрын ковмис на видзны сылысь кык писö. Кыдз нö мöдногыс, öд аслас жö виртусьяс. 
Мария Васильевна öнi олö Ирина нылыскöд да Анастасия внучкаыскöд — сылöн отсасьысь-гажöдысьяскöд. Волывлöны да шоныдлунöн кытшалöны сiйöс и мукöд челядьыс да внук-внучкаясыс. Оз вунöд и ичöтдырся нывъёртыс, Галина Васильевна Юдина, кодкöд радейтöны сьывны, мед сöмын сюрлас прöст здук. Öти лун кö оз аддзысьлыны, сэсся, чукöрмас сёрнитанторйыс да, варовитны вермасны лунтыръясöн. Висьтавнысö тай век мыйкö сюрö. Тшöкыда казьтывлöны томдырся кадсö, важ олöмсö. Аньлöн сэкъя кадыс ставыс на вежöрас. 
81 арöс тыран чужан лунöн чолöмавны ветлiм и ми Анна Ильинична Адамовакöд. Морöс бердö топöдлöмöн сиим дона аньлы ён дзоньвидзалун да дыр на овны. Козинтор вичмöдöмысь сылы лоис зэв на и нимкодь. Чай юигмоз варовитiм дыркодь. Миянöс колльöдiгмоз ошйысис, мый внукыс лэптiс выль пывсян. Майбыр, позьö на пö вöльнöй свет вылас овны — нимкодясис олöмнас. 
Екатерина УЛЬНЫРОВА. 
Руч. 
Снимок вылын: М.В.Попова 
шуйгавывсянь мöдыс.

Комментарии:

Добавить комментарий

Свежий выпуск: 28 марта

Осторожно — мошенники!