Ичöтсянь — лыжи вылын

[ A+ ] /[ A- ]


Скöрöдумысь Василий Николаевия Шомысов ичöтсянь ёртасьö спорткöд. Торйöн нин сьöлöм сертиыс лыжиöн котралöм. Медводдза воськовъяссö сы вылын вöчис, гашкö, школаö пыртöдз на. Сэсся мöдöд классын велöдчигöн школа бердын буретш восьтiсны лыжиöн котралöм кузя секция, кытчö дыр мöвпавтöг пыр жö и пырис. Челядьыс сэтчö ветлiс уна. Туйдiс-велöдiс Иван Дмитриевич Пашнин. Öти тренировка эз кольлы зонка, шойччан лунъясö весиг ветлывлiс кыкысьöдз на, мый вермис песiс ки-кок, котралiс подöн и лыжиöн, сьöлöмсяньыс вöчис тренерлысь быд индöмтор. Сыысь кындзи быд асыв панлiс зарядкасянь. И сiдз школаын велöдчан вояс чöж. Иван Дмитриевич казялiс сылысь нырччöмсö да кутiс босьтлыны ён спортсменъяскöд öтув ордйысьöмъяс вылö. Медводз районсаяс, сэсся республика тшупöдаяс вылö. Район вöсна петкöдчыны босьтчис сизимöд классын велöдчигöн на, а 9-10-öд классъясын, томъяслöн республикаса öтувъя котырö пырис да, — «Урожай» ДСО вöсна, республика вöсна нин. Тшöкыда петавлiс вермысьяс лыдö.
Дасöд класс помалöм бöрын том морт велöдчис Сыктывкарса мöдöд номера училищеын электрик-водительö. И сэнi эз на лэччысь спортысь. Тренируйтчис Сыктывкарса чипан видзан фабрикабердса лыжи базаын. Туйдiс Г.И.Богомолова. Пырис республикаса медвына лыжиöн котралысьяслöн öтувъя котырö. Рытыв-Войвыв юкöнса öтувъя котырлысь ним дорйöмöн кыкысь петкöдчис Россия тшупöдын, öтчыдысьсö Ленинград дорын. Спортын нырччöм, дерт жö, ёна отсалiс армияын служитiгöн.
Гортас бергöдчöм бöрын матö нёль во на тренируйтчис Скöрöдумын, ветлывлiс ордйысьöмъяс вылö. Сэки буретш уджалiс совхозын. Медводз электрикöн, сэсся, кор пансисны районса спорт фестивальяс, индiсны спорт кузя методистöн. Сiйö кадас öд матö быд уджаланiнын вöлiны спорт котыръяс, и налöн сiдз жö. Уджъёртъяссö новлöдлiс волейбол, теннис да мукöд сикас районса спорт ордйысьöмъяс вылö. Сёрöнджык совхозын водителялiс. Сэсся 12 во уджалiс жилкомхозын. Сэки кутшöмкö кад кежлö орöдчылiс котралöмысь. Да и кадыс эз вöв, керка кыпöдiс да. Öнi 13-öд во нин зiльö лунвыв электрическöй сетьлöн Помöсдiнса участокын электромонтёрöн, öти сайын вевъялö и водителявны. Сяммö бергöдны быд удж. Татчö вуджöмсянь, 2006-öд восянь, бöр сувтiс лыжи вылö, босьтчис тренируйтчыны. Асьсö пыр песö: асывнас — зарядка, котралöм, гожöмын журъялö роликъяс вылын, вуджö Помöсдiн-Кырныша туйкост. Петкöдчылö ас сиктса, районса, республикаса да Россияса ордйысьöмъясын, дорйö районса ветеранъяслöн да энергетикъяслöн котыръяслысь ним. Ветеранъяслöн котырö пырысьяс лыдын тшöтш Помöсдiнысь Алексей Уляшев, Кулöмдiнысь Александр Мамонтов, Фёдор да Николай Нестеровъяс, Александр Пименов да мукöд, кодъяскöд ветлывлö ордйысьöмъяс вылö. Василий Николаевич унапöрйö шедöдлiс вермöмъяс, мыйысь вичмöдлiсны медальяс да кубокъяс. Чукöрмисны найö бура уна нин — нимкодясянторъяс да важсö казьтыланторъяс.
Василий Николаевич ачыс нырччö спортö, таö ышöдö и ас сиктсаяссö, аслас, Шомысовлöн приз вылö уна во нин нуöдлö лыжиöн котралöм кузя Рöштвоса ордйысьöм. Сылöн чужан луныс январ сизимöд лунö, и коркö сiйö жö кадас котыртлывлö сiйöс, мед пö аддзысьлыны спорт радейтысьяскöд, тöдсаясыскöд. Чукöрмылöны зэв на и унаöн, и оз сöмын Помöсдiн вожсаяс, но и районсаяс. Айловъяслы, спортсменъяслы, урчитöма котöртны дас километр, аньяслы — витöс, а лыжиöн сiдзи ветлыны радейтысьяслы — витöс да куимöс. Волывлöны и челядь. Вермысьяслы вичмöдö кубок, кодi налöн киын олö куим во, коймöд бöрас вуджö выль вермысьяслы либö коляс налы жö, петкöдласны кö медся тэрыблун. Помöсдiнсаяслы, дерт, зэв нимкодь, мый эм татшöм водзмöстчысь, найöс спортö сюртчыны ышöдысь морт.
Эз весьшöрö сылысь портретсö öшöдны «Помöсдiн» администрациялöн Почёт пöв вылö, а, дерт жö, мед нимöдны кыдз сиктса пыдди пуктана, водзмöстчысь мортöс да нималана спортсменöс.
Галина Нестерова.
Снимок вылын: В.Н.Шомысов 2018-öд воын «Россети» компаниялöн лыжиöн котралöм кузя Россияса ордйысьöм вылын,
кöнi шедöдiс вермöм.

Комментарии:

Добавить комментарий

Свежий выпуск: за 13 февраля