Немдiн сиктлöн Кармансикт — Лазарсикт местаяс юкö шор. Тайö увтасас джуджыд лайков. Сиктöдыс подаяслы муннысö öти туй. Шор вомöныс нюжалöма 30 метра кузя пу пос, кодöс вочасöн колö дзоньтавны. Сійöс вöчлісны выльöс, но сэсянь коли нин 10 во. Кадыд босьтö ассьыс… Пос кутiс киссьыны – чегъясисны плакаясыс, ачыс нёровтчис. Тайö зэв ёна майшöдліс сэтчöс олысьясöс. Йöз кыпöдiсны пос вöчöм йылысь сёрни, корисны сиктса администрациялысь отсöг.
Öтcöгласöн шуим вöчны поссö шойччан лунъясö. Уджö босьтчим сентябр 21-öд лунö да сигöртiм 23-öд лунö. Уджалiм водз асывсяньыс рöмдытöдзыс. Локтiсны верстьö и том, мужичöйяс и нывбабаяс, ставнас 11 морт. Сиктса администрация могмöдiс уджалысьясöс кер-плакаöн, кöрт тув-скöбаöн. Пос артмис ён, зумыд, чача кодь мича.
Кöсъя шуны зэв ыджыд аттьö отсасьысьяслы: Сергей Игнатовлы, Роман Кустовлы, Öлексей Евсеевлы, Зоя Мамонтовалы да Öндрей пиыслы, Василий, Иван да Öлексан Мамонтовъяслы, Минке Öлексанлы, Александра Кармановалы да сылöн Анна чойыслы.
Öтлаын ми унатор на вермам вöчны!

Анатолий Пименов,
Немдiн сиктса юралысь.
Гижысьлöн
снимок вылын:
тадзи вöлі, тадзи лоис.