Юрий Николаевич Ерчинöс (снимок вылын) индісны Кулöмдін районса судöн веськöдлысьöн 2011-öд вося август 3-öд лунö. Сiйö и висьталö асланыс удж йылысь. 
— Юрий Николаевич, кымын судья районса судын, тырмöны-ö найö? 
— Судöн веськöдлысьöн менö индöмсянь кöкъямыс воöн вежсис став судьяыс. Меысь кындзи уджалöны судьяяс Ольга Васильевна Барбуца, Александр Владимирович Лавров, Надежда Николаевна Костюнина да Татьяна Викторовна Мартынюк. Ставыс колö вит судья, сы мындаöн и эмöсь. Судьяяс-криминалистъяс видлалöны уголовнöй делöяс, а судьяяс-цивилистъяс административнöйясöс. 
— Кыдзи юканныд судьяяслы делöяс, öд öти делö кокниджык, мöд сьöкыдджык, либö вермас лоны, мый кутшöмкö делö кузя мунö судьялöн тöдсаыс да сiйö синас асланьыс? 
— Делöяс «юклö» компьютер, сэтчö судьяяс йылысь став юöр сюйöм бöрын. 
— Уджалан могысь, кöнкö, эм став коланторйыс? 
— Эм суд нуöдан нёль жыр. Дзик быдын — сёрни гижан аппаратура. Öти жырйын видеоконференция йитöда аппаратура. Сiйö эм да оз ков некодöс нуöдлыны мöд районö либö весиг мöд регионö, колö кö тайöс вöчны быть. Таысь видзтысьö бюджетысь уна сьöм. Сёрни гижан аппаратураöн йöз сёрнитöны кутчысьöмöн, мöвпалöмöн, öд мыйкö кö ылöдласны либö кодöскö дойдаласны лёк кывъясöн, бöрыннас соссьыны оз вермыны. 
— Кутшöм выльторъяс нöшта пырисны районса судлöн уджö? 
— 2017-öд вося январ 1-öд лунсянь суд вöдитчö «Электроннöй правосудие» юöртан системаöн. Районса судлöн сайт вылын «Подача процессуальных документов в электронном виде» юкöнын позьö восьтны «личнöй кабинет» да шыöдчöм мöдöдны сы пыр Кулöмдінö волытöг. Видлалан делö йылысь юöръяс йöзлы воöны интернет пыр либö смс отсöгöн. Кöні омöль сотöвöй йитöд да лёка уджалö интернет, сэтчö юöръяс важ моз мöдöдам почта пыр. 
— Кымын делö видлаліс районса суд 2018-öд воын? 
— Кольöм воын видлалім 96 уголовнöй делö. 73 кузя вынсьöдім мыждан кывкöртöд. 17 уголовнöй делö дугöдiм, сы вöсна мый йöз миритчисны, нёль делö бергöдiм прокурорлы. 63 делö, кор мыждан морт эз соссьы вöчöмторйысь, судьяяс видлалісны торъя пöрадокын. 
— Кутшöмджык уголовнöй делöяс видлалінныд? 
— Став видлалöм делöяс пиысь 40 процентыс – гусясьöм либö эмбур асалöм. Кызвын мыжсö вöчисны код юрöн, йöзлöн эмбур вылö горшасьöмöн. 15 процент — мортлöн дзоньвидзалунлы ыджыд либö шöркодь лёктор вöчöм. Мыж вöчысьяс вöліны код юраöсь, мортöс дойдалісны öружиöн либö сы пыдди босьтöмторйöн. Квайт делö видлалім административнöй надзор кузя урчитöмторъяс торкалöмысь. Шуам, мортöс лэдзисны урчитöмысь водзджык, и сылы колö овны ютöг, лöня, зыксьытöг, пукавны гортын 10 час рытсянь 6 час асылöдз да с.в. Кык делö видлалім водительяс кузя, кодъяс пуксисны машина руль сайö код юрöн, торкисны туй вывтi ветлöм кузя урчитöмторъяс, мыйысь кувсис морт, öтиöс водитель кузя, кодлöн торкöмысь кувсисны кыкöн. Вöлі машина гусялöм кузя вит делö. Öти делö видлалім Россия Федерацияса Уголовнöй кодексысь 207-öд статья серти, коді гежöда овлö районын – ыджыд лёктор дасьтöм йылысь ылöдчöмöн юöртöм. 
— Кор да кöнi тайö вöлi? 
— Тайö вöлi Кулöмдiнын 2018-öд вося февраль 6-öд лунö. Код юра М. звöнитіс сотöвöй телефонöн «02» номерö да шуис: «Здравствуйте. Кулöмдінса öтиöд номера садйö пуктöма бомба». Юöр воöм бöрын сад дорö пыр жö локтісны полицияса уджалысьяс, доръян службаяс. Челядьöс да уджалысьясöс садйысь пыр жö петкöдісны да нуисны мöдлаö. Полиция гöгöр видлаліс, но грымöбтантор эз аддзы. Судын М. вöчöмторйысь эз соссьы, шуис, мый тырвыйö каитчö, да корис видлавны делöсö торъя пöрадокын. Ставсö гöгöрбок видлалöмöн да донъялöмöн, суд шуис пуксьöдны М.-öс стрöг режима колонияö куим во кежлö. 
— А уна-ö видлалiнныд гражданскöй да административнöй делö? 
— Судö воис 517 гражданскöй да административнöй делö (2017-öд вося кольöм делöяс тöдвылö босьтöмöн). Видлалім шыöдчöмъяс, медым кыскыны йöзлысь банкъяслы уджйöзалöм сьöм. Йöз босьтöны кредитъяс, кредита картаяс, ыджыдсьыс-ыджыд процентъяс улö ичöт займъяс. Мортлöн олöмыс вежсьö лёклань, шуам, бырö удж, и сійö дугдö вештысьны уджйöзалöм сьöмысь ас кадö. Овлöны и сэтшöмъяс, кодъяс босьтöны кредит водзвыв тöдöмöн, мый вештыны налы лоас нинöмысь, да и оз кутны, сідзкö, водзвыв артыштöмöн, мый ылöдласны. Вöліны бать-мамлысь право киритöм, семья костын зыксьöм, удж вылын артмöм нелючкияс (оз сетавны удждон, закон торкöмöн вöтлісны удж вылысь да с.в.) кузя делöяс. Уна делö му да оланiнъяс кузя. 
— Кольö-ö судьяяслöн кад вöчны кутшöмкö общественнöй удж? 
— Ми волывлам школаясö, сёрнитам велöдчысьяскöд, кутшöм тöдчанлуныс юристлöн öнія олöмын, висьталам, кутшöм кывкутöмö вермасны кыскыны тыр арлыдтöмъясöс мыж вöчöмысь. Кольöм воын Кебанъёльса да Шöръягса велöдчысьяс волісны татчö. Ми тöдмöдім асланым уджöн, петкöдлім уджалан жыръяс, нуöдім викторина. Тыр арлыдтöмъяслöн социально-реабилитационнöй шöринса челядьлы гижöдім газетъяс-журналъяс. Отсалім сьöкыда олысь семьяяслы дасьтыны челядьöс школаö, чукöртім выль вося да Рöштвося козинъяс вылö сьöм. Сідзжö отсалім сьöмöн Ульянаса вичколы ньöбны жыннян, котыртны сьöкыда да гöля олысь семьяяслы Петыр-Павел вичкоын пажун. 
— Юрий Николаевич, висьтыштöй ас йывсьыныд, кыдзи ті бöрйинныд профессия? 
— Ме чужи да быдми Лопъювадын. Школа бöрын помалі автодорожнöй техникум. Босьтісны армияö. Кык во служиті Афганистанын. Сэсся помалі пытшкöсса делöяс кузя министерстволысь Санкт-Петербургса вылі тшупöда велöдчанін. Уджалі милицияын, вöлі начальникöс вежысьöн. 2000-öд воын локті уджавны районса судö, вöлі администраторöн, районса судöн веськöдлысьлы отсасьысьöн. 2006-öд воын сеті Сыктыв районса судöн веськöдлысь вылö шыöдчöм. Уджалі сэні судьяöн, а сэсся районса судöн веськöдлысьöн 2006-сянь 2011-öд воöдз. 2011-öд вося август 3-öд лунö Россияса президентöн кырымалöм 1044-öд номера индöдöн лои Кулöмдін районса судöн веськöдлысьöн. 
— Мый колö, медым лоны судьяöн? 
— Медым лоны судьяöн, быть колö велöдчыны юристö да уджавны тайö специальносьт серти вит воысь оз этшаджык. Сэсся колö сдайтны судья вылö экзамен (помшуöмыс вына куим во). Ставыс кö бур, экзамен кö сдайтöма, позьö сетны шыöдчöм, мый тэ кöсъян уджавны судьяöн. Судьяöн позьö уджавны 70 арöсöдз. 
— А кутшöм мортöн колö лоны судьялы? 
— Судьяяслöн ставроссияса чукöртчылöм вылын вынсьöдісны «Кодекс судебной этики», и быд судьялы быть колö кутчысьны сэні урчитöмторъясö. Ме серти, судьялы колö лоны веськыдöн, ылöдчытöмöн, авъя оласногаöн, мывкыдöн. Оз вермы морт, коді ачыс торкалö закон, мыждыны мукöдöс, гашкö, сійö жö мыжысь, кодöс вöчис ачыс. Мед кöть тайöс некод эз аддзыв. Мед эз вöв ни öти «сьöд чут». Ме серти, судья – тайö юристлöн профессия кузя медся вылі тшупöд, öд сылы сетöма позянлун, закон вылö мыджсьöмöн, мыждыны мортöс. 
— Сьöкыд-ö лоны судьяöн? 
— Сьöкыд. Судья быд делö видлалігöн, позьö шуны, пырö мортлöн ку пытшкас, зільö гöгöрвоны, мыйла сійö тадзи вöчис, кутшöмкö кад олö сылöн олöмöн. Ставыс тайö сы вöсна, медым мыждыны стрöга, но веськыда, закон вылö мыджсьöмöн. Мöд ногыс оз позь. 
Сёрнитіс Лидия Липина. 
Снимок гижысьлöн.