[ A+ ] /[ A- ]
- Бур рыт, Пожöг сиктсöветувса войтыр, сёрнитö школаса радиоузел. Кывзöй передача, кодöс сиöма Победа лунсянь 45 во тыригкежлö.
Татшöм панасöн 1985-öд да 1990-öд воясö май тöлысьö петавлiсны эфирö По-жöг школаысь гырысь класса велöдчысьяс. Эфирö петан аппаратураыс вöлi директор жырйын, код пыр ми йитчывлiм став посёлок-грездкöд. Тöдмöдiм выльторъясöн, школалöн олöмöн. А май 9-öд лун кежлö дас лун чöж рытъяснас нимöдiм войнаса да тылса ветеранъясöс, налöн корöм серти дасьтывлiм висьталанторъяс. Школаын чужан му туялан удж нуöдöмысь кывкутысь Н.А.Шомысовалöн юрнуöдöмöн сэки став коланасö чукöртiс дзик быд велöдчысь. Сiйö жö и гижис велöдчысьяскöд радиогижöдъяс нуöданног. Ыджыд пай пуктiсны программаяс дасьтöмас сэки 10-öд классын велöдчысьяс Нина Сенькина, Татьяна Третьякова, Наталья Шебырева, Ольга Печеницына, Мария Сенькина, Ольга Третьякова да мукöд. Аппаратура вöсна кывкутiсны Н.С.Чувьюров да В.И.Шомысов. Бöръяыс жö уджалiс том дикторъяслöн сёрнитанног да эфирын культура вылын. Сьöлöм сетiс та вылö школаса директор Жан Валентинович Сумароков. Мичаа да шыльыда сёрнитысь велöдчысьясöс водзвыв гижлiс магнитофон плёнка вылö, да тайö гижöдъяссö сетлiм рытъяснас. Чайта, тайö гижöдыс некодöс оз коль веськодьöн, тшöктас выль ног видзöдлыны олöм вылас. Дерт, унаöс оз ло казьтыштöма, сы вöсна мый некутшöм гижöд эз сюрлы. А куйлö кö татшöм материалыс (письмöяс, казьтылöмъяс, дневникъяс, важ фотояс…), вайны некор абу сёр. Коркö да быть лоö йöзöдöма. - Талунъя передача сиöма Пожöг сикт улö пырысь грездъясысь тылын уджалысьяс-лы. Миян оланiнъяс тышкасянiнъясысь бокын. Пуляяс эз лэбавны, вирöн ойдöмаяс эз куйлыны му вылын, снарядъяс эз кисьтны оланiнъяс. Но сьöд войналöн бордыс буриника чишкалiс-швачöдiс сэнi олысьяссö. Танi вöлi мöд фронт, колöкö, мукöддырйиыс сьöкыдджык на. Öд ставыс усис нывбабаяс, сöвмытöм на челядь да дыр нин олöма йöзлöн нэриник пельпомъяс вылö. Кыдзи и став сöветскöй йöз, пожöгсаяс тöдмалiсны война сувтöм йылысь июнь 22-öд лунö. А июнь 23-öд лунö Эжва кыркöтшын перевоз весьтын кылiс нин гудöк шы улын сьыланкывъяс да бöрдöм — колльöдiсны тыш вылö медводдза мунысьясöс. Пуксьöдiсны вöла додьясö да мöдöдiсны телега туй кузя Кулöмдiнлань. Быдöн кутiс лача, мый вöрöг лоö вöтлöма öдйö да регыдöн бергöдчасны гортö мам, гöтыр да ныв-пиян дорö. И колисны сиктö нывбабаяс да челядь…
Великöй Отечественнöй война помасьöм бöрас Сöветскöй Союзса маршал А.В.Василевский юалiс Верховнöй Главнокомандующöйлысь Генералиссимус И.В.Сталинлысь, кыдзи сiйö думайтö, мыйла ми вермим медся ён да тышъяс кежлö бура дасьтысьöм гитлеровскöй армияöс, кодi сулалiс нин Москвасянь кызь верст сайын? Сталин зэв дженьыда вочавидзис: «Тышкасисны эз армияяс, а тыл».
1941-öд воö июль 5-6-öд лунъясö А.М.Михайлов Кулöмдiн районысь партияса первой секретар ВКП(б)-лöн 6-öд пленум дырйи шыöдчис чукöртчöм йöз дорö татшöм кывъясöн: «Победаыд шедöдсьö оз сöмын фронт вылын, но и тылын. Абу некутшöм торъялöм тайö кык кыв костас. Ми ставным танi лоам армияын и пуктам став вын победа матыстöмö».
1941-öд вося сентябр 24-öд лун кежлö государстволöн оборона фондö мöдöдiсны 73 килограмм вый, 5488 килограмм яй, 6115 литра йöв, 20 пась, 200 ыж ку, 41 фуфайка, 87 гынсапöг гоз, 97 ватнöй гач. Ноябр 21-öд лунö вöскресник вылын уджалiс 1200 морт. Нажöвитöм 4500 шайт мöдöдiсны танк вöчöм вылö.
1945-öд вося август 17-öд лунö Коми АССР-са Верховнöй Сöветлöн 7-öд сессия вылын Кулöмдiн райисполкомса председатель Е.А.Габов аслас докладын вайöдiс татшöм пасйöдъяс, кöнi висьтавсис фашистскöй Германияöс вермöмö районлöн пай йылысь. Колхозникъяс нёль воöн государстволы сдайтiсны: тусь — 6030, картупель — 8638, градвыв пуктас — 1240, яй — 1240 тонна, комын сайö сюрс горт-са пемöсъяслысь ку, зэв уна пыш да вöрса пемöсъяслысь ку. Пöрöдiсны 959000 кубометр вöр. Уна сё посылка колхозникъяс ыстiсны сёянöн да новлан кöлуйöн. Сьöмöн сетöма 1431 сюрс шайт. И ставсö тайöс лоис чукöртöма нывбабаяслöн да челядьлöн киöн. Татчö колö нöшта содтыны государственнöй заём облигация (мырдöн сеталiсны йöзыслы, öнöдз на жытник пыдöсын кутшöмсюрö куйлö), таысь öкмис 1000 шайт.
Со кыдзи казьтывлö война сувтöм йылысь сэки «Беляков» колхозса бригадир Мария Назаровна Третьякова: «Тайö вöлi Полльö Микола лунö. Ми, ныв чукöр мöдöд-чим Полльö грездö гажöдчыны. Гораа сералiм да сьылiм. Недыр мысти миянöс суис верзьöма вöв вылын Пырей Вась да горöдiс: - Зэв тай, эськö, ёна серавланныд да регыд сiйö помасяс!
Сiйö, вöлöм, мунö Польеö митинг вöчны, юöртны война пансьöм йылысь. Пожöгдiнын йöзсö чукöртлöма нин. А ми туй шöрад веськалiм да нинöмсö эг и тöдлöй. Тайö лун бöрас пöшти быд лун кодöскö да кодöскö босьтлiсны война вылö. И кушмöм грездъясö колисны сöмын нывбабаяс, челядь да пöрысь. Лун и вой помасьлытöм сьöкыд удж. Кодi мый вермис сетiс бöръя вынъяссö да дзоньвидзалунсö Победа матыстöмö.
Ок и сьöкыдöн да кузьöн вöлi сiйö нёль воыс. Гожöмын, арын, тöлын и тулысын юрвывтыр, вевся помасьтöм удж».
Со кыдзи казьтывлöны кольöм сьöкыд вояссö Пожöгдiнса нывбабаяс:
«Мый миян пыр мунiс, мед, эськö, некор эз бергöдчы бöр да эз тöдлыны миян внукъяс. Тайö эз вöв олöм, а пинь мурчкöмöн лов пыкöм. Тулысын муыс кын на, а тшöктöны нин гöрны петны. Ветымын лунöдз вöлi гöр вороптö ог лэдзлöй. Вöвъяс вöлi му шöрас водасны да чеччынысö оз вермыны мудзысла да тшыгысла. Гожöмнас помасьлытöм турун пуктöм. Сюсьджык да сöнöдджык нывбабаяс зорöд чöвтöны, челядь юр бöр куртöны, юр кыскалöны, лёддзасьöны. Кодi вермö нин кутны гöрбуш коса, водз асывсяньыс лысва косьмытöдз швичкöны-ниртöны помасьлытöм видзьяс. Мыйöн ар воас, нянь мöдам вундыны. Сэсся вартам, тöлöдам, изам. Няньтö чарлаöн вундам, некутшöм машина — механизмъяс та вылö эз вöвны, ставсö ки помысь лоис вöчны. Тöвнас турун ваялам. Öдва и воöны вöлi вöвъясыд ылi видзьяс вылысь скöт карта дорад, асьным, эськö, жуялöм тöрöканъяс кодьöсь нин да».
«Мужикъяс мунöм бöрад ок и сьöкыд лоис нуны гортгöгöрса уджтö. Вель унаöн сэки мöсъястö сдайтiсны — нинöмöн вöлi верднысö. Кутшöм нин скöт бöрся дöзьöр, кор асьным гили-голи кодь вöлiм, лы чукöр выланым ляксьöм кучик. Но кодъяс мöсъястö сдайтiсны, да вöлiны нöшта уна челядяöсь — ок ёна и тшыгъялiсны. Унаöн пыкталiсны кырсьтö сёйöмысь да усины кок вывсьыс. Уджалысьыд нöшта на чинiс. Но мыйкö пыр жö легöдчим — вöчим».
«Уджалiгад весиг сёйны вöлi ог пуксьылöй. А кор посни картупельтö му вылад пуасны, öтик-öтикöн вöлi юклöны. Удж вылысь локтiгъясöн вöрö на вöлi пыравлам пелысь кор, тшак вотны. Асывнас шондi петтöдз, шыбитчывлам сиктгöгöрса вöраинас чöдла. Лымйыс вöлi оз на удит сывны, а собалам нин вöлi муяс вылö корсьны сiсь картупель, сёркни, кöчан коръяс, усьöм шепъяс. Сiсь картупельтö вöлi пач трубаö лясйöдлам да пöжалам. Зэв чöскыдöн кажитчывлiс, любöпырысь нимтывлiм мöд шондi няньöн. Со тадзи и кыским ловнымöс лун бöрся лун, мыйöнкö öд кынöмпöттö колö вöлi шедöдны».
«Прамöй паськöмыд эз вöв, ставыс киссьöма, ротсьöма. Кокад сюйны вöлi нинöм да сира пыдöса гынсапöгъясöн ветлöдлiм. Найöс вурлiсны дöраысь, а пыдöссö мавтлiсны сирöн. Кодлöн вöлiны кучик кöмкотъяс, мавтлiсны сюмöдысь вийöдöм дьöгöтьöн небыдлунсö перйöм могысь да кок кöтöдöмысь. Бура кöдзыд, а ми гачтöмöсь, кысь сiйöс тайö кадас и босьтан».
Со мый казьтывлö Марфида Аверхиевна Третьякова: - Война вылö мунтöдз батьыс дзоляник Ивö пиыслы босьтiс волыса гач. Зонпосниыдлöн тай ставыс зэв öдйö киссьö. Розялiс и миян Ваньöлöн. Кöлуйыс эз вöв да мед дырджык лоö новлöма, еджыдöн ставсö дöми да подулас на содтыштi. И лоис выль гач. Ёна на сiйö кöлуйнад ризъялiс. Еджыд дöраыд лавкаясад эз жö вöв, асьным кылiм, кыдзи джодждöратö.
Екатерина Максимовна казьтывлö война кусан лунсö: « Кöть кутшöм эз вöв сьöкыд, но венiм ставсö да воис дыр виччысяна Победаыд! Кайим ми тайö лунас чожöяслы пес керавны. Унаöн и мöдöдчим. Но öти дышджык морт сюри жö миян чукöрысь. Ёна ылö колис удж вылö мунысьяссянь. Коркö некоркö, мойдын моз, мöдiс миянöс суöдны да ылiсянь на горзö: «Победа! Победа öд! Победа!!!» Ми шайпаймунiм виччысьтöм да сы кадö зэв ёна виччысяна кывйысь. - Эн ылöдлы, веритам тэнсьыд, кыдз жö, — артмис ставнымлöн миян.
- Онö кö веритöй меным, лэччывлöй кантораас, сэнi пызан нин дасьтöны. Аддзанныд асланыд синмöн.
Владимир Шомысов.
Снимокъясыс авторлöн чукöртöмысь.
(Водзö лоö на).
Комментарии: