Районын мунысь гажъясын пыр петкöдчöны Дiасёръяса клубысь челядьлöн да верстьöлöн сьылан-йöктан котыръяс. Найö пыр дасьöсь, оз повзьöд ни кузь туй ни поводдя. Уна национальносьта посёлокын век олiсны öтув, кокниа кыпавлiсны быд уджö, да сiйö руыс öнiöдз на эз вежсьы.
Наталья Сергеевна Пильщик челядьдырсянь котралiс клубö. Радейтiс сьывны-йöктыны, пырöдчис быд гажö. Клубöн веськöдлысь Валерий Валерьевич Васильев казялiс водзмöстчысь да енбиа аньöс, да кольöм вося апрельсянь сiйö уджалö клубын, öттшöтш велöдчö Сыктывкарса культуралöн колледжын. Челядь окотапырысь волывлöны аньöн котыртöм «Фламинго» да «Колибри» йöктан, «Зазеркалье» театрын да «Ключ» аканьясöн ворсысьяслöн кружокъясö. И налöн лыдыс пыр содö. Кольöм воын йöктысьяслы вурисны вöччан паськöм, да мича сарапанъясöн петкöдчöны оз сöмын посёлокын, но и ветлöны мукöдлаö.

• «Фламингокöд» тöвзьылiм Зимстанö «Уна рöма войыв» фестиваль вылö, кыкнан йöктан котырыскöд петкöдчим Бадьёльйылын да Скöрöдумын, «Ключ» котыркöд тшöкыда волам посёлокса садйö. Ме ачым радейта серпасасьны, кысьыны, вöчасьны бисерысь, быдторйö велöда и челядьöс. Став аканьсö кыи ачым, наöн и ворсам. Быд праздник кежлö вöчам открыткаяс, козинъяс да уна мукöдтор. Ворса волейболысь да пионерболысь, котыркöд ветлам ордйысьны районса сикт-посёлокъясö. Дзоньвидза оласногö ышöда и челядьöс,- кыпыд руöн сёрнитiс Наталья Сергеевна.
  Кольöм воын жö районлöн чужан лунö Дiасёръя петкöдчис аслас овмöдчöминса йöрöн да лоис мöдöн. Таысь вичмис сьöма сертификат. Сiйöс сетiсны клублы, вурисны сцена вылö мича занавес. Дiасёръяын кык вонас öтчыд мунö «Кодзувъяса гожöм» фестиваль, чукöртчылöны районысь сьылан-йöктан котыръяс.
  Клубын пыр уна йöза. Гажöдчыны ышöдöны челядьöс, томуловöс, верстьööс и олöмаясöс. Ыджыд удж öтув бергöдöны В.В.Васильев, Н.С.Пильщик да библиотекаса уджалысь Е.В.Курочкина посёлокын олöмсö гажöдöм да мичмöдöм могысь.
  Марина Дадашова.
  Снимок Н.С.Пильщиклöн чукöртöмысь.