Войналысь курыд кöрсö апыштiсны быд семьяын. Фронт вылö мунiсны пиян, верöсъяс, нывъяс да гöтыръяс. Сьöд кымöрыс öшйылiс и миян семья весьтö.
Менам пöрысь ыджыд батьлöн Ким Афанасьевич Лобанов вокыс чужлiс 1925-öд вося ноябрын Коми АССР-ын Шойна районса Аныбын служащöйлöн семьяын. Октябрскöй революцияöдз олiсны ас овмöсöн, сы бöрын батьыс вöлi служащöйöн, уджавлiс бухгалтерöн, а мамыс горт олiс. 1931-öд воын вуджисны Кулöмдiн районса Ульянаö. Семьяын быдмис сизим пи да öти ныв. Сэки батьыс эз нин уджав, вöлi вермытöмöн. 1924-öд воын чужлöм Борис Афанасьевич воксö армияö босьтлiсны 1942-öд вося августын. Юрсö пуктiс вöрöгкöд тышын. 1944-öд воын Витебск дорын дзебисны пöгибнитöм салдатъяскöд öти гуö.
Ким Афанасьевич Ульянаын начальнöй школа помалöм бöрын сизимöд классöдз велöдчис Кулöмдiнса шöр школаын. 1940-öд воын пырис Ульянаса видз-му овмöс техникумö му вöдитысьяслöн юкöнö. 1941-öд восянь öттшöтш и радисталiс. 1942-öд вося ноябрын тырис 17 арöс, а декабрын Кулöмдiнса райвоенкомат сiйöс босьтiс армияö.
1943-öд вося январ-июнь тöлысьясö служитiс миномётчикъяслöн велöдчан шöринын лыйсьысьяслöн 68-öд запаснöй полкын. Сетiсны младшöй лейтенантлысь чин. Июньын жö мöдöдiсны нин фронт вылö миномётчикъяслöн командирöн. 1943-öд вося июньсянь 1944-öд вося мартöдз вöлi связь юкöнса командирöн Прибалтикаса фронт вылын коймöд Ударнöй армияысь лыйсьысьяслöн 312-öд полкын. Вöрöгысь мездiсны Калинин обласьт да Латвияса ССР. 1944-öд вося февральын сiйöс вуджöдiсны лыйсьысьяслöн 33-öд дивизияын связьлöн 488-öд торъя ротаö, а ноябрын — сiйö жö дивизияын 77-öд торъя батальонö, вöлi связь юкöнса командирöн.
1945-öд вося январын коймöд Ударнöй армияса часьтъясöс вуджöдiсны первой Белорусскöй фронтö.
Ким Афанасьевич вöрöгысь мездiс Польша, немечьяскöд тышкасис Германияын. Белорусскöй фронтлöн Берлин вылö уськöдчигöн вöлi связь юкöнса командирöн, кывкутiс лыйсьысь полклöн связь вöсна. Сiйöс пленö эз босьтлыны, эз доймавлi. Повтöмлунысь пасйылiсны орденъясöн да медальясöн. Гижлiсны: «Младший сержант Лобанов бесстрашный линейный надсморщик. При прорыве сильно укреплённой обороны противника на р.Великая с 25 марта 1944 быстро устранил порывы телефонной линии под сильным обстрелом противника». « Под разрывом артснарядов и мин тов.Лобанов, укрываясь в воронках, связывал концы повреждений линии, перебегая с одной воронки в другую. Как в период активных наступательных действий по взлому обороны противника, так и при отражении его яростных контратак за возврат утраченных опорных пунктов тов.Лобанов беспрерывно находился на линии, своевременно устранял порывы, чем обеспечил возможность маневрировать подразделениями на поле боя, за 3 дня боёв он устранил свыше 100 порывов линии».
Война вылын вöлi 1943-öд вося июльсянь 1945-öд вося май 2-öд лунöдз. 1946-öд воын Ульнаса видз-му овмöс техникум помалöм бöрын водзö велöдчис Коми пединститутлöн естествознание факультетын. Велöдчöм пома-лöм бöрын сетiсны майорлысь чин. 1947-öд воын гöтрасис öтлаын велöдчысь Екатерина Васильевна Турьева вылö. Семьяын чужисны челядь: ас олöмö петкöдiсны Евгений, Светлана, Виталий, Владимир да Василийöс.
Институт помалöм бöрын Ким Афанасьевич Ульянаса техникумын вöлi директорöс вежысьöн. Сэнi жö велöдiс и гöтырыс. Сэсся вуджисны ов-ны Кулöмдiнö. 1956-öд вося октябрсянь 1958-öд вося декабрöдз вöлi КПСС райком-лöн пропоганда да агитация юкöнöн веськöдлысьöн. 1959-öд вося августöдз — районса велöдан юкöнысь методистъяслöн уджöн веськöдлысьöн. 1959-1962-öд воясö веськöд-лiс районса велöдан юкöнöн. Водзö велöдiс химия да биология, öттшöтш завучалiс кöкъямыс класса Кебанъёльса школаын. 1965-1970-öд воясын велöдiс, а сэсся индiсны директорöн Кулöмдiнса кöкъямыс класса шко-лаын.
Войнаса ветеран йылысь гижöд дасьтiгöн воддзасö казьтылiсны, отсалiсны Ким Афанасьевичлöн Евгений вокыс, Альберт вокыслöн Людмила Александровна гöтырыс да чожöн шуысь менам ыджыд мам Лариса Альбертовна Липина. Унатор тöдмалi-босьтi райвоенкоматысь. Ким Афанасьевич велöдлiс ыджыд мамöс биологияысь. Зэв пö вöлi сюсь, енбиа велöдысьöн. Сёрнитлiс лöня. Лöсявлiс быдöнкöд, сiйöс пыдди пуктiсны велöдчысьяс. Ким Афанасьевич ветлiс Москваö, восьлалiс Победалöн парадын.
1972-öд воын, гöтырыслöн кулöм бöрын, петiс пенсия вылö. Но шойччыны эз лэдзны, корисны велöдны Носимö. Ветлöдлiс подöн. Колiс чеччыны вывтi водз, волiс гортас рытнас öкмыс час гöгöр. Пусис на и. Медся сьöкыд вöлi арнас наридз мунiгöн, вуджлiс вöсни йи кузя. 1990-öд воясын Ким Афанасьевич инструкторалiс Петыр Павел вичкодорса тирын. Нэмсö уджалiс челядькöд. Вöлi бур семья кутысьöн. Гöтыртöг ачыс сувтöдiс ныв-пиянсö кок вылö, ставнысö велöдiс. Владимир уджалiс хирургöн районса шöр бурдöдчанiнын, сэсся Сыктывкарын. Светлана вöлi фармацевтöн, Евгений — спортын инструкторöн, Виталий — Воркутаын геологöн.
Радейтiс вöр-ва, ёна вотчис, вöдитiс градвыв пуктас.
Ким Афанасьевич кулiс 2001-öд вося май 16-öд лунö. Сы йылысь колисны сöмын бур казьтылöмъяс. Миян семья да ыджыд рöдвуж ог вунöдöй сiйöс, пыр кутам паметьын.
Денис Липин,
Кулöмдiнса шöр школаысь 4 «А» класса велöдчысь.