Монди СЛПК

Кольöм воын тырис дас во, кыдзи районса администрация да «Монди СЛПК» акционер котыр вöчисны социально-экономичекскöй ёртасьöм йылысь сёрнитчöм, код серти «Мондиöн» вичмöдöм сьöм вылö пöртсисны олöмö балаяс да вайисны районлы сöмын бур. Сiдзсö тайö вöр заптысь ыджыд котыр районкöд ёртасьö 15 во нин. Районса администрацияын «Монди СЛПК» акционер котырысь вöрöн веськöдлöм кузя службаысь сертификация да экология юкöнса начальник Марина Петровна Королевакöд да юрнуöдысь инженер Кристина Александровна Сидинакöд аддзысьлiгöн районысь кывкутысь йöз висьталiсны, мый вöчисны «Монди» отсöгöн дас воöн да таво, мый нöшта кöсйöны збыльмöдны локтан воясын.
Видз-му овмöс юкöнса веськöдлысьлысь могъяс олöмö пöртысь Нина Александровна Скрыгонюк пасйис, мый ёртасьöм йылысь сёрнитчöм серти кыпалiсны скöт картаяс — öти «Пожöг» да кык «Помöсдiн» кооперативъясын, крестьянин овмöс кутысьяс Леонид Юрьевич Еповлöн да Елена Евгеньевна Тарабукиналöн. Ньöбисны кöрым заптан техника, йöв провод. Таво вичмис матö 1,5 миллион шайт. Öти миллион сетiсны «Помöсдiн» кооперативлы ньöбны выль скöт картаö йöв провод, Ягкöджысь Василий Анатольевич Черкасовлы трактор ныр вылö 134,45 сюрс шайт. Сiйö техникасö уджöдö оз сöмын ас вылас, но и овмöдчöминса администрациялы отсалö кутны туйяс. Тимшерысь Николай Васильевич Паршуковлы турун топöдан вылö вичмис 300 сюрс шайт. Сы отсöгöн лоис ёна кокни заптыны кöрым, тайö сетас позянлун содтысьны скöт юрöн да турун пуктöмöн. Н.А.Срыгонюк висьталiс, мый таво видз-му овмöс министерствосянь грантъяс шедöдiсны крестьянин овмöс кутысьяс Кулöмдiнысь Сергей Алексеевич Тимушев да Дереваннöйысь Татьяна Александровна Попова. Босьтчисны кыпöдны фермаяс, да лоас бур, вичмас кö и налы «Мондисянь» отсöг. Овмöсъяс эз чинтыны уджалысьяслысь лыд, фермеръяс, кодъяс стрöитчöны, босьтiсны выль йöзöс. Нина Александровна аттьöалiс «Монди СЛПК» котырöс видз-му овмöс юкöнлöн сöвмöмö ыджыд пай пуктöмысь. Сиис ён дзоньвидзалун, уджын вермöмъяс, бура бергöдчыны сьöмöн да водзö ёртасьны районкöд.
Велöдан управлениеса начальник Оксана Васильевна Лебедева висьталiс, мый дас воöн «Монди» отсöгöн олöмö пöртсисны зэв тöдчана балаяс. Матö быд садйö да школаö нюжöдiсны ва да вöчисны канализация. Таво ыджыд удж бергöдiсны Кулöмдiнса шöр школаын. Ньöбны да вежлавны сантехника, вужвыйöн дзоньтавны актöвöй зал «Мондисянь» торйöдiсны 1,5 миллион шайт. Дзоньнас вежисны джоджсö, сцена, пуктiсны пластик öшиньяс, кöрт öдзöсъяс, стенъяссö штукатурисны да мавтiсны, ньöбисны да вурисны выль занавесъяс. Мичлунсö да кыпыдлунсö донъялiсны август 28-öд лунö сиктса школалы сиöм лунлы ыджыд чукöртчöм вылö республика пасьтаысь воысьяс.
Сюйисны ва да лöсьöдiсны канализация Немдiнса да Улыс Вочса садъясö. Вочын абу ва визь да колiс кодйысьны. Бур, мый сюрис бур ва. Садъясын сувтöдiсны унитазъяс, ва киссьö кранысь. Водзö вылö колö вужвыйöн вежны тöвнырöн жуглöм Ручса школалысь вевт, дзоньтавны Кулöмдiнса школа, кöнi пыр мунöны район пасьтаысь велöдысьяслöн да челядьлöн чукöртчöмъяс, да мед сiйö лöсялiс став корöмъяслы. Оксана Васильевна аттьöалiс «Монди» котырöс велöдан юкöнлы ыджыд отсöг сетöмысь. Буретш налöн сьöмöн восьтöм вöр-ва вöсна тöдждысьысьяслöн «Мырпом» лагер лоис республикалöн тöдчанлунаöн. Кулöмдiнса школаын 10-11-öд классъясын öттшöтш велöдöны и кутшöмсюрö специальносьтъясö да тайö зэв бур.
Олöмаяслöн районса котырöн юрнуöдысь Галина Арсеньевна Кравченко пасйис, мый «Мондилöн» санаторий-профилакторийын 2010-öд восянь шойччöны-ёнмöдчöны вöр овмöсын вöвлöм уджалысьяс. Медводдза кадас вонас ветлiс 15 морт, но вочасöн содтысисны, да бöръя воясын шойччисны 40-öн нин. Сетiсны позянлун ёнмöдчыны и олöмын водзмöстчысьяслы. Окотитысьыс вывтi уна да 2022-öд воöдз нин пасйöма, кодлы кор мунны. Ставныслы сьöлöм выланыс воисны бурдöдöм, сэнi уджалысьяслöн йöз вöсна тöждысьöм, быдöнöс гöгöрвоöм. Зэв бур, мый бöръя кадас котыртöма и прöст кад коллялöм. Бергöдчöны сöмын бур казьтылöмъясöн: и бурдöдчим пö, и шойччим, сьылiм-йöктiм и. Г.А.Кравченко аттьöалiс «Монди» котырöс да районса администрацияöс олöмаяс вöсна ыджыд тöждысь.
«Коми войтыр» öтмунöмлöн районса представительствоöн юрнуöдысь Надежда Васильевна Русинова серти, «Мондилöн» сöвмöм да уджын ыджыд вермöмъяс — котырлöн бизнескöд да общественносьткöд ёртасьöм йылысь сёрнитчöм да бур йитöдъяс лöсьöдöм сайын. Быд во дас гöгöр бала пöртсьö олöмö миян районын. Медводз найöс видлалöны, донъялöны йöз водзын, коми йöзöн бöрйöмъяслöн чукöртчылiгöн, кутшöмъяс медтöдчанаöсь да кутшöмъясöс колö пöртны олöмö медводз. Кывзöны да тöд вылö босьтöны йöзлысь вöзйöмъяссö да корöмъяссö. Экономика боксянь кö, сетöны тöдчанлун сэтшöм балаяслы, код серти кöсйöны йöзöс могмöдны уджöн либö кöсйöны босьтчыны асшöр уджö, торйöн нин томъяс, кодъяслы отсалö районса администрацияысь экономика да вот юкöн. Тöдчана и сiйö, мый «Мондисянь» вичмöдöм сьöм веськöдöны социальнöй юкöнлы да дзоньталöны школаяс, садъяс да культура керкаяс. Дзоньталöны и туйяс да посъяс. «Монди» котырысь кывкутысь йöз быд во волöны «Коми войтырлöн» чукöртчылiгöн, вочавидзöны йöзлöн юалöмъяс вылö, кывзöны налысь корöмъяс. Артмöны кö мытшöдъяс, райадминистрация «Мондикöд» öтув сёрнитöны-видлалöны гöгрöс пызан сайын да пыр мунöны воча öта-мöдыслы. Тадзи вöлi таво июльын, кор разисны йöз да вöр-ва вöсна тöжда Николай Николаевич Кармановлысь шыöдчöм кузя гöрöд. Сiйö петкöдлiс снимокъяс да корис сöстöммöдны вöвлöм пуръясянiнъяс да кылöдчанiнъяс. Зэра гожöмöн эз артмы, да «Монди» öнi петкöдö провод чукöр да мукöд колясъяс. Надежда Васильевна эскö, мый и водзö «Мондикöд» ёртасьöм йылысь сёрнитчöм серти кутасны уджавны öтув, овны йöзлöн тöжд-могъясöн.
Культура да национальнöй туйвизь кузя управлениеса начальник Анастасия Владимировна Голайдо висьталiс, мый кольöм воын «Монди» отсöгöн вежисны вевт Пузласа клублысь, таво — Кужса культура керкалысь. Бöръяас öти вевт улын и библиотека. Гажъясöн, велöдöмöн да быдсикас уджöн шымыртöма уна йöзöс. Кужлы вичмис 350 сюрс шайт. Вöльдiнын клуб кыпöдöм кузя бала лöсьöдны сетiсны öти миллион шайт. Вичмис и нуöдны овмöдчöминъяслы гажъяс да сикт-грездъяслысь тшупöда пасъяс. 300 во тырис Великопольелы, Донлы, Парчлы да Скöрöдумлы, 90 во районлы. Локтан во тшупöда пасъяс лоасны Ручлöн, Лопъювадлöн да Носимлöн. Вевт колö вежны уна культура керкалысь да клублысь на. Кирпичысь кыпöдлöм Югыдъягса культура керка медбуръяс лыдын. Сэнi вевтсö бытьысь колö вежны матысса воö. Окота, мед быдлаын вöлi кыпыд, шоныд да югыд да мед сэтчö йöз локтiсны кыпыд ловкылöмъясöн. А.В.Голайдо аттьöалiс «Мондиöс» социальнöй юкöнлы, торйöн нин культуралы, тöдчана отсöгысь.
Районса администрацияысь экономика да вот юкöнöн веськöдлысь Елена Владимировна Цгоева да «Монди» котырысь кывкутысь йöз кытшовтiсны уджалан котыръяс, кодъяслы ёртасьöм серти вичмис отсöг. Пыралiсны Кулöмдiнса школалöн кыпыд да югыд актöвöй залö.
— Аттьö «Мондилы» челядь вöсна тöждысь. Тiян отсöгöн вужвыйöн дзоньталiм чукöртчыланiн. Важ öшиньяс пыр пöльтiс-пырис кöдзыд, öнi выльяснад шоныд да позяс нин пасьтасьны кокниа. Челядьлы зэв ёна воис сьöлöм выланыс, — сёрнитiс информатика велöдысь Владимир Алексеевич Уляшев.
Асшöр уджалысь Роберт Васильевич Третьяков петкöдлiс сöвтчан агрегата выль трактор, кодöс ньöбис «Монди» отсöгöн. Сылöн котыр вöчö-дзоньталö туйяс, тöлын сикт-посёлокъясын весалö лым, нюжöдö ва визь да вöчö мукöд удж. Выль техника, а сылöн эм и ныр, зэв лöсялас тöлын ёна лымъялiгöн. Мукöд техникаöн тшöтш позяс öтпырйö уджавны некымын сиктын. Босьтiс и выль уджалысьöс.
— Тайö техникаыс зэв колана миян уджын. Аттьö «Мондилы» да районса администрациялы, кодi пыр отсалö быд ногыс, — висьталiс Р.В.Третьяков.
Татшöм жö техника «Монди» отсöгöн ньöбис Помöсдiнысь «Оптималес» котыр, кодi вöчö вöр да кутö Дiасёръя-Помöсдiн туй кост, весалö лымйысь Бадьёльйылöдз, Сордйылöдз. Кöсйö босьтны и Помöсдiн пытшкын туйяс. Öнi дзоньталiсны Дiасёръя-Помöсдiн туй кост, нёль пос.
— Районса администрация пыр отсалö «Экономика сöвмöдöм» программа серти, а «Мондисянь» медводдзаысь на сетiсны да висьталам зэв ыджыд аттьö. Тöв кежлö сöвтчансö вежам ныр вылö, босьтам содтöд уджалысьöс. Водзö вылö кöсъям вöр колясъясысь вöчны ломтас да лоас зэв бур, вичмас кö нöшта отсöг, — сёрнитiс «Оптималес» котырса директорöс вежысь Алексей Викторович Минаков.
Кежавлiсны и «Помöсдiн» кооперативлöн 200 юрлы выль скöт картаö, кытчö мöсъяс вуджасны матысса кадö нин. 2017-öд воын босьтчыны тайö уджас артмис буретш «Монди» отсöгöн. Асланыс сьöм эз вöв. Кöть и пырöдчисны грантъяслöн конкурсö да вермисны, сьöм сетiсны удж вöчöм бöрын. Ыджыд котырöн вичмöдöм 2,2 миллион шайт вылö лöсьöдiсны подувсö. 2018-öдын сетöм 2,8 миллион веськöдiсны кöртысь конструкция вылö. Таво «Мондисянь» öти миллион шайт вылö босьтiсны йöв провод да лысьтысьны коланаторъяс.
— Медводз кöсйим вужвыйöн дзоньтавны 1978-öд воын кыпöдöм важ фермасö. Но сiйö кад кежлö некытчö пыртны скöтсö да баласö вежим выль скöт карта кыпöдöм вылö. Выльлаын тöдчымöн чинас кипом удж. Кокни лоас уджалысьяслы, бур лоас и мöсъяслы. Ме 2011-öд восянь нин веськöдла кооперативлöн правлениеöн да тайö кадколастнас «Мондисянь» балаяс пöртны олöмö вичмис 13 миллион шайт. Уджавны босьтчан воын вичмис куим миллион да сы вылö ньöбим кöрым заптан бур техника. Нöшта на сетлiсны да босьтлiм сенаж вöчан техника. Буретш сiйö и дорйис таво зэра гожöмын. Урчитöм öти сюрс тонна сенаж пыдди вöчим кыкöс, вермим петны сьöкыд- лунъясысь. Важ видзаснас тырмас тöвйыны, — пасйис отсöглысь тöдчанлунсö Т.В.Уляшева да М.П.Королевалы сетiс аттьöалан гижöд, козьналiс сохозлöн да кооперативлöн 50 во тыригкежлö лэдзöм книга, кöнi гижöма и «Монди» акционер котырса генеральнöй директор Клаус Пеллерлöн кооперативö волöм йылысь.
— Ми талун видзöдлiм да донъялiм, кыдзи ёртасьöм серти сетöм сьöм вылö пöртiсны олöмö балаяс. Нимкодь, мый збыльмöдiсны став урчитöмсö. И вöчöмыс тыдалö. Бур, мый отсöгысь 60 процентсö веськöдiсны выль уджалан местаяс восьтöм вылö. Медтöдчанаыс, эз чинтысьны уджалысьясöн, босьтiсны выльясöс, мед сиктса йöзлы овсис бурджыка да сöвмис район, — кывкöртiс Марина Петровна Королева.
Ветлiсны и Ыджыд Кужйö. Пыралiсны культура керкаö, кодлысь «Монди» отсöгöн вужвыйöн вежисны вевт.

Марина Дадашова.
Гижысьлöн снимокъяс вылын: «Мондилöн» отсöгысь аттьöалан гижöд М.П.Королевалы вичмöдiс «Помöсдiн» кооператив правлениеöн юрнуöдысь Т.В.Уляшева; Кулöмдiнса школалöн вужвыйöн дзоньталöм актöвöй зал; асшöр уджалысь Р.В.Третьяков выль техника вылö пысалiс «Мондилысь» пас; «Помöсдiн» кооперативлöн выль лысьтысян аппаратъяс.